Ua Faalauiloa Mai e le Ekalesia le Mataupu Aoaoina Fou mo le Autalavou mo le 2013
Ua faalauiloa mai e le Ekalesia se mataupu aoaoina fou—Sau, Mulimuli Mai ia te Au: O Punaoa e Aoao Ai mo le Autalavou—e mo Korama a le au Perisitua Arona, Tamaitai Talavou, ma vasega a le autalavou i le Aoga Sa mo le 2013.
O se tasi o sini autu o le Sau, Mulimuli Mai ia te Au o le fesoasoani lea i faiaoga—i le lotu atoa ai ma le aiga—ina ia aoao atu faapei o le Faaola, ma ia avea atili lesona o ni talanoaga e totonugalemu i le talalelei. O le a valaauliaina le autalavou ia avea ma a latou matafaioi sili atu le aoao atu ma le aoao mai.
“O le taulaiga autu o le faamalolosia lea ma le fausiaina o le faatuatua, liua, ma molimau, e faaaoga ai aoaoga sili ona lata mai mai le Au Pulega Aoao ma au peresitene aoao o ausilali,” o se tusi lea mai le tusi a le Au Peresitene Sili i le aso 12 Setema, 2012.
Sau, Mulimuli Mai ia te Au ua mamanuina i ni iunite lea e taulai atu i se autu faaleaoaoga faavae se tasi i masina taitasi ma e faaaogaina uma i vasega o le Aoga Sa, Tamaitai Talavou, ma le au Perisitua Arona.
E tofu le iunite ma ni lesona e sili atu nai lo le mea e mafai ona aoao atu i se masina se tasi, ma ua talosagaina ai faiaoga ma taitai ina ia sailia musumusuga ma ia feutagai e filifili po o fea o otootoga o lesona e faaaoga.
O le a fesoasoani se tusitaiala fou, Aoao Atu le Talalelei i le Ala a le Faaola, i taitai ma faiaoga ina ia malamalama atili i le auala e fetuunai ai lesona e tusa ai ma manaoga uiga ese o a latou talavou ma pe faapefea ona fesoasoani i le autalavou e aoao le talalelei.
E mafai ona lolomiina uma lesona mai le Initoneti. O le a maua ni lomiga ua lolomiina o le Sau, Mulimuli Mai ia te Au i se taimi mulimuli ane. E oo atu i le faaiuga o le 2012 o le a maua ia otootoga o lesona i luga o le initoneti i gagana e 23.
E mafai e tagata o le ekalesia, taitai, ma faiaoga ona sailiili i le mataupu aoaoina fou i luga o le initoneti i le lds.org/youth/learn.
O le a saunia e taitai o le eria ma le lotoifale ni fonotaga faaleaoaoga mo taitai ma faiaoga a o lei oo i le faaiuga o le 2012.
O le Sau, Mulimuli Mai ia te Au o se mataupu aoaoina fou o le a fesoasoani i faiaoga e aoao atu i le ala a le Faaola ma fesoasoani ai i le autalavou ina ia liua atoatoa i le talalelei.
Ata na saunia e Christina Smith, © IRI