Ua faatopahia te matahiti e titauhia no te taviniraa ei misionare

Na Heather Whittle Wrigley

Te mau parau apî e te mau ohipa a te Ekalesia

I te iritiraa o te 182raa o te amuiraa rahi afa matahiti, ua faaara te peresideni Thomas S. Monson e, mai teie atu taime, e haamata te mau tane i te ohipa misionare i te 18 o te matahiti, e te mau vahine i te 19 o te matahiti.

I muri mai, i roto i te hoê vauvauraa mana‘o i mua i te ve‘a, ua haapapû mai o Elder Russell M. Nelson, no te Pŭpŭ no te Tino Ahuru Ma Piti Aposetolo e, e ere teie tauiraa i te hoê faaheporaa : « Eiaha te feia apî tamaroa e te feia apî tamahine e haamata i ta ratou taviniraa hou a ineine ai ratou i te pae varua e i te pae tino », te na reira ra oia. Te haapiiraa, te huru oraraa o te utuafare e te ora maitai o te tino, e mau ohipa teie o te titauhia ia hi‘opo‘a maite hou a faaoti ai i te taime no te haere i te misioni.

Ua haamaramarama mai o Elder Jeffrey R. Holland, no te Pŭpŭ no te Tino Ahuru Ma Piti Aposetolo e, na te episekopo e te peresideni tĭtĭ e faatae i te parau aniraa ia rave i te ohipa misionare tamau, 120 mahana hou te 18raa o te mahana fanauraa o te taure‘are‘a, e aore râ, hou te taime e vata ai oia no teie ohipa. Titauhia i te feia apî tamaroa ia tomo atu i roto i te pû haapiipiiraa misionare i muri a‘e i te roaaraa ta’na parau tuite no te haapiiraa tuarua, e aore râ, te tahi parau tu‘ite aifaito i te reira, e te ti‘araa te matahiti i te 18. E tomo te mau vahine i roto i te pû haapiipiiraa i muri a‘e i te 19raa o to ratou mahana fanauraa.

Te titauhia nei te mau taure‘are‘a e faaineine nei no te misioni rave tamau, ia haamaitai i to ratou faaineineraa misionare hou te mahana a tomo ai ratou i roto i te pû haapiipiiraa.

Ua parau o Elder Holland e, « Te rû nei te Atua i Ta’na ohipa ». « E te hinaaro nei Oia e rave rahi atu â misionare aau tae e te parau ti‘a no te haaparare i te maramarama e te parau mau e te ti‘aturiraa e te faaoraraa o te evanelia a Iesu Mesia, i te hoê ao poiri e te măta‘u ».

Te parau ra o Elder Holland e, e mea papû e, e faatiahia te tahi atu mau misioni.

No te arairaa i te maraaraa o te numera o te mau misionare i roto i te mau misioni i te ao atoa nei, e faaitihia ïa te roaraa taime i roto i te pû haapiipiiraa misionare i te faito hoê i ni‘a i te toru no te taatoaraa o te mau misionare. Aita i maoro a‘e nei, ua tamatamatahia te hoê haapiiraa faaineineraa 12 hepetoma te maoro i roto i te misioni, na te reira e tauturu i te haamaitai roa’tu i te faaineineraa o te mau misionare.

I teie nei, e haamata te mau tane e te mau vahine i te rave i te misioni i te matahiti 18 no te tane, e te 19 no te vahine, ia au i te huru oraraa o te taata hoê, e ia au atoa i te faaotiraa a te feia faatere no te autahu‘araa.