Lamharon
Ang Perpekto nga Bisperas sang Paskua
Sang bata pa ako, isa sang pinakamanami nga parte sang tagsa ka tuig amo ang Bisperas sang Paskua. Kami sang akon pamilya nagahimo sang pizza, nagapangaroling, kag dayon nagatipon para sa isa ka Christmas devotional. Nagakanta kami sang mga himno sa apat ka tono nga daw medyo libagon kag nagatukar sing matunog sang mga daigon sa di-kinaandan nga nagkalainlain nga mga instrumento. Si Tatay nagahingapos pirme sang gab-i sa [pagbilin sang] isa ka hunahuna para sa Paskua nga nagapahibi sa amon sa kalipay. Wala na sing masobra pa kanami sangsa Bisperas sang Paskua.
Sang pagdaku-dako ko na, si nanay nagsugod sa pagbantay sang isa ka bata nga kaingod namon, nga si Kelly. Si Kelly nagakadto sa amon balay adlaw-adlaw pagkatapos sang klase samtang ang iya nanay, nga si Patty, nagaobra. Si Kelly nagasunod-sunod sa akon nga daw tutoy—kagahod kag pirme lang may ginapangayo. Gakahaw-asan ako pirme kon sugaton na ni Patty ang iya bata kag bayaan ang amon puluy-an kag pamilya sa kalinong.
Isa ka Disyembre, nadismaya ako sang gin-imbitar ni nanay si Patty kag Kelly nga mag-upod sa amon sa pagsaulog sang Bisperas sang Paskua. Ang akon Bisperas sang Paskua. Si nanay nagyuhum kag nagpasalig sa akon, “Wala sang may maliwat.” Pero mas nakahibalo ako. Ubuson nila ang amon pizza. Kadlawan ni Kelly ang amon panganta. Ginbaton ko nalang nga amo ini ang mangin pinakalaw-ay nga Bisperas sang Paskua sa tanan.
Pagkagab-i, si Patty kag Kelly nag-entra sa amon, kag nag-inistorya kami kag nagkinadlaw kag nagkinanta. Husto si nanay. Nangin manami ini kaayo. Pag-abot sang tungang-gab-i ginpasalamatan nila kami kag naglakat nga daw wala gana magpauli. Nagtulog ako nga puno ang tagipusuon sang gugma kag kapasalamatan. Nadiskubrehan ko nga ang pinakamanami nga mga regalo sang Paskua indi mabuhinan kon ginapaambit. Sa baylo, mas naganami kag nagadamo ini kon aton ginapanghatag.