Mensahe sa Visiting Teaching, Disyembre 2012

Visiting Teaching, isa ka Buluhaton sang Kaluwasan

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita.Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi.

Litrato

Selyo sang Relief Society

Pagtuo • Pamilya • Bulig

Ang visiting teaching nagahatag sa mga babayi sang oportunidad sa pagbantay, pagpabakod, kag pagtudlo sa isa kag isa—ini matuod gid nga isa ka buluhaton sang kaluwasan. Paagi sa visiting teaching, ang mga sister nagaalagad bilang mga tiglawas sang Manluluwas kag nagabulig sa paghanda sang mga babayi para sa mga bugay sang kabuhi nga wala’y katapusan.

“Dapat kita ‘magpaandam, magpaathag, magpaisog, kag magtudlo, kag mag-agda [sang iban] nga magkari kay Cristo’ (D&C 20:59), subong sang ginsiling sang Ginuo sa iya diosnon nga mga pahayag,” hambal ni Pangulong Spencer W. Kimball (1895–1985).Dugang pa, sia nagsiling, “Ang inyo panaksihon manami nga pamaagi sa pagpahayag sing mensahe.”¹

Kon kita bilang mga visiting teachers magdugang sang aton ihibalo sa mga kamatuoran sang ebanghelyo, ang aton mga panaksihon magapabakod kag magasuporta sang mga sisters nga nagahanda nga mabunyagan kag makumpirmahan.Ginabuligan naton ang bag-o nga mga miyembro nga mangin lubos ang dedikasyon sa ebanghelyo.Ang aton mga pagbisita kag pagpalangga nagabulig “pabalik sinang mga nagtalang [kag] nagapainit sang mga tagipusuon sinang mga naglas-ay sa ebanghelyo.”² Kag ginapaisog naton ang mga sisters nga magkari kay Cristo paagi sa pagsulod sa templo.

“Magaluwas kamo sang mga kalag,” siling ni Pangulong Kimball sa mga visiting teachers, “kag sin-o ang makasiling kundi nga ang madamo sang mga maayo, aktibo nga mga tawo sa Simbahan karon mga aktibo bangud nagkadto kamo sa ila mga puluy-an kag naghatag sa ila sang bag-o nga panglantaw [sa kabuhi], isa ka bag-o nga panan-awan. Ginpakita ninyo sa ila ang mga butang nga wala pa nila mahangpan. Ginpalapad ninyo ang ila panan-awan. …

“Nakahibalo bala kamo, indi lamang ining mga sisters ang inyo ginaluwas, kundi ayhan ang ila man mga bana kag ila mga panimalay.”³

Gikan sa Balaan nga mga Kasulatan

Doctrine and Covenants 20:59; 84:106; 138:56

Gikan sa Aton Kasaysayan

Sang ang Propetang si Joseph Smith nagpasad sang Relief Society, nagsiling sia nga ang mga babayi indi lang kay mag-atipan sang mga imol kundi magluwas man sang mga kalag. Nagtudlo man sia nga ang mga babayi sa Simbahan may importante kaayo nga papel sa plano sang kaluwasan sang Amay nga Langitnon.⁴ Tungod ginagiyahan kita sang mga prinsipyo nga gintudlo sang Propetang si Joseph Smith, kita bilang mga sisters sa Relief Society sarang magbinuligay agud ihanda ang mga kababayin-an kag ila mga pamilya para sa pinakadaku nga mga bugay sang Dios.

“Mangin maluluy-on kita sa isa kag isa,” siling ni Pangulong Brigham Young (1801–77), “kag tugoti [inang mga] mabaskog nga magbatiti sing mahinalungon sang mga maluya tubtob magbakod, kag tugoti inang mga makakita nga maggiya sa mga bulag tubtob nga sila mismo makakita na sang alagyan.”⁵

© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas.Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang Visiting Teaching Message, December 2012. Hiligaynon. 10372 861

Ano ang Sarang Ko Mahimo?

Paano ang Relief Society nagahanda sa akon para sa mga bugay sang kabuhi nga wala’y katapusan?
Ano ang mahimo ko agud madugangan ang pagtuo sinang akon mga ginabantayan?