Mensahe sang Unang Panguluhan, Disyembre 2012
Pagdiskubre liwat sang Espiritu sang Paskua
Madamo nga tinuig na ang nagligad bilang isa ka bataon nga elder, gintawag ako upod sang iban pa nga magkadto sa isa ka ospital sa Salt Lake City agud maghatag sang blessing sa nagamasakit nga kabataan Sa amon pagsulod, nakita namon ang isa ka Christmas tree nga may masanag kag manami nga mga suga kag ang mahipid nga mga pinutos sa idalom sang iya sini nagabunghay nga mga sanga. Dayon naglabay kami sa mga pasilyo sa diin ang magagmay nga kabataan nga lalaki kag babayi—ang pila sini may bendahe nga semento sa butkon ukon batiis, ang iban may mga balatian nga ayhan indi madali paayuhon—nagtamyaw sa amon nga nagayuhum.
Isa ka diutay, masakiton kaayo nga bata nga lalaki ang nagtawag sa akon, “Ano’ng ngalan mo?”
Ginsugiran ko sia sang ngalan ko, kag namangkot sia, “Pwede mo ako mahatagan sang blessing?”
Ang blessing ginhatag, kag sa amon paghalin sa kilid sang iya hiligdaan, nagsiling sia, “Madamo gid nga salamat.”
Nakalakat kami sang pila pa lang ka tikang, kag dayon nabatian ko sia nga nagsiling, “Ay, Brother Monson, malipayon nga Paskua sa imo.” Dayon isa ka manami nga yuhum ang naggwa sa iya guya.
Ato nga bata may espiritu sang Paskwa. Ang espiritu sang Paskua isa nga ginalauman ko nga maangkon naton tanan sa aton mga tagipusuon kag mga kabuhi—indi lamang sa sini nga tion kundi subong man sa bilog nga tuig.
Kon may espiritu kita sang Paskua, madumduman naton Sia nga ang Iya pagkatawo aton ginasaulog sa sini nga tion sang tuig: “Kay natawo sa inyo karon nga adlaw sa banwa ni David ang Manluluwas, nga si Cristo nga Ginuo” (Lucas 2:11).
Sa aton panahon ang espiritu sang paghatag sang mga regalo may daku nga papel sa pagsaulog sang tion sang Paskua. Ginahunahuna ko kon makabulig nga pamangkuton naton ang aton mga kaugalingon, Ano nga mga regalo ang luyag sang Ginuo nga ihatag ko sa Iya ukon sa iban sa sining importante nga tion sang tuig?
Luyag ko magsiling nga gusto sang aton Amay nga Langitnon nga ang tagsa sa aton maghatag sa Iya kag sa Iya Anak sang regalo sang pagkamatinumanon. Nabatyagan ko man nga luyag Niya magpangayo sa aton nga magbulig sa iban gamit ang aton kaugalingon nga mga ikasarang kag mga talento kag indi mangin maiya-iyahon ukon dalok ukon palaaway, pareho sang ginalaygay sang Iya pinalangga nga Anak sa Libro ni Mormon:
“Kay sa pagkamatuod, sa pagkamatuod ginasiling ko sa inyo, sia nga may espiritu sang pagbinaisay indi sa akon, kundi iya sang yawa, kag … ginasugyot niya ang mga tagipusuon sang mga tawo sa pagpakigbais nga may kaakig, ang isa batok sa isa.
“Yari karon, indi amo ini ang akon doktrina, nga sugyuton ang mga tagipusuon sang mga tawo sa kaakig, ang isa batok sa isa; kundi amo ini ang akon doktrina, nga ang subong nga mga butang pagadulaon” (3 Nefi 11:29–30).
Sa sining pinasahi nga dispensasyon sang kabug-osan sang panahon, ang aton mga oportunidad sa pagpalangga kag pag-alagad sa iban gamit ang aton kaugalingon nga mga ikasarang matuod gid nga wala sing katapusan, apang ang mga ini madali man madula kon indi pag-aktohan sa gilayon.Karon may mga tagipusuon nga dapat palipayon, malulo nga mga pulong nga dapat ihambal, mga buluhaton nga dapat himuon, kag mga kalag nga dapat luwason.
Ang isa nga may madalum nga paghangop sa espiritu sang Paskua nagsulat:
Ako ang Espiritu sang Paskua—
Nagasulod ako sa puluy-an sang kaimol, nga kabangdanan agud ang malapsi nga kabataan magdaku ang mga mata, sa tuman nga kalipay.
Ginapalugak ko ang kuom nga mga kamot sang kuripot kag gani ginapakita ang isa ka masanag nga parte sa iya kalag.
Ginapabalik ko sa mga tigulang ang handurawan sang ila pagkalamharon kag ginapakadlaw kasubong sang sila bataon pa.
Ginabuhi ko ang kapagsik sa tagipusuon sang mga bata, kag ginapasanagan ang katulugon sang manami nga mga damgo.
Ginatulod ko ang handa nga mga tiil nga magsaka sa madulom nga mga hagdanan agud magbulig sa mga nagakinahanglan, nga nagabilin sang mga tagipusuon nga nahalawhaw sa kaayo sang kalibutan.
Ginapauntat ko sing makadali ang buhaha sa iya wala’y disiplina, mausik nga pamatasan kag magpadala sing bisan diutay lang nga handumanan sa isa ka nagakabalaka nga pinalangga nga rason agud magtulo ang mga luha sang kalipay—mga luha nga nagapanas sang madalum nga mga marka sang kasubo.
Nagasulod ako sa madulom nga mga selda, nga ginapahanumdum ang namantsahan nga pagkatawo sang kon ano kuntani ang mahimo natabo kag nagatudlo pakadto sa masanag pa nga palaabuton.
Nagasulod ako sing hinay-hinay sa malinong, masubo nga puluy-an sang kasakit, kag ang mga bibig nga tuman ka luya sa paghambal nagakurog lang sa mahipos, makatalandog nga kapasalamatan.
Sa linibo ka mga paagi, ginapatangla ko ang kapoy nga kalibutan sa nawong sang Dios, kag sa makadali malipatan ang mga butang nga indi importante kag wala’y pulos.
Ako ang Espiritu sang Paskua.1
Kabay nga ang tagsa sa aton liwat nga madiskubrehan ang espiritu sang Paskua—ang Espiritu ni Cristo.
© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas.Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang First Presidency Message, December 2012. Hiligaynon. 10372 861
Pagtudlo gikan sa Sining Mensahe
Sa inyo pagpaambit sang mensahe ni Pangulong Monson sa pamilya, binag-binaga ang paggamit sang pamangkutanon nga iya ginpresentar parte sa mga regalo nga luyag sang Dios nga ihatag naton sa Iya ukon sa iban sa sini nga tion. Paisoga ang mga miyembro sang pamilya sa pagsulat sang ila mga hunahuna kag mga ideya (ukon, para sa magagmay nga kabataan, magdrowing sang isa ka larawan) parte sa kon paano “liwat nga madiskubrehan ang espiritu sang Paskua—ang Espiritu ni Cristo.”