Cov Hluas
Hmo Ua Ntej Christmas Zoo Tag Nrho
Thaum kuv tseem loj hlob tuaj, qhov uas kuv nyiam txhua xyoo yog Hmo Ua Ntej Christmas. Kuv thiab kuv tsev neeg ua pizza, mus hu nkauj, ces koom ua ke hawm Vajtswv thaum lub caij Christmas. Peb ua plaub lub suab hu nkauj thiab hu tej zaj nkauj Christmas nrov nrov thaum peb ntaus nkauj. Txhua zaus thaum hmo ntawd yuav tiav lawm kuv txiv yeej yuav qhia ib yam txog Christmas uas ua rau peb zoo siab los kua muag. Tsis muaj ib yam dab tsi zoo tshaj Hmo Ua Ntej Christmas.
Thaum kuv loj hlob tuaj me ntsis, kuv niam pib saib xyuas ib tug neeg zej zog tus me nyuam, hu ua Kelly. Kelly tuaj rau peb lub tsev txhua hnub tom qab nws kawm ntawv thaum nws niam, Patty, ua hauj lwm. Kelly lawv kuv qab zoo ib yam li ib tug me nyuam aub—nws nrov thiab pheej xav tau tej yam. Kuv yeej zoo siab thaum Patty los coj nws tus ntxhais mus thiab cia kuv tsev neeg nyob kaj siab lug.
Muaj ib zaug thaum lub Kaum Ob Hlis Ntuj, kuv ntseeg tsis tau hais tias kuv niam caw Patty thiab Kelly koom peb thaum Hmo Ua Ntej Christmas. Kuv Hmo Ua Ntej Christmas. Kuv niam luag nyav thiab hais kom kuv txhob txhawj hais tias, “Yeej yuav tsis hloov ib qho hlo li.” Tiam sis kuv paub tias yuav tsis yog li nws hais. Nkawd yuav noj tag nrho peb cov pizza. Kelly yuav thuam peb thaum peb hu nkauj. Kuv xav tias yuav muaj Hmo Ua Ntej Christmas tsis zoo hlo li.
Thaum txog hmo ntuj, Patty thiab Kelly los koom nrog peb, thiab peb sib tham thiab luag thiab hu nkauj. Kuv niam hais yog lawm. Txhua yam yeej zoo tag nrho. Thaum ib tag hmo nkawd ua peb tsaug thiab peb sib ncaim. Thaum kuv pw kuv lub siab puv npo. Kuv kawm tias tej txiaj ntsim uas muaj nqi tiag tiag hauv lub caij Christmas yeej tsis ploj mus thaum yus muab faib nrog lwm tus. Tej txiaj ntsim ntawd haj yam zoo thiab loj tuaj thaum peb muab rau lwm tus.