Thawj Pawg Thawj Tswj Hwm Tsab Xov, Kaum Ob Hlis Ntuj 2012
Rov Qab Nrhiav Tau lub Hwj Huam ntawm Christmas
Ntau xyoo tas los thaum kuv yog ib tug txwj laug hluas, lawv hu kuv nrog lwm tus mus xyuas ib lub tsev kho mob nyob hauv Salt Lake City foom koob hmoov rau cov me nyuam mob. Thaum peb nkag mus haud, peb pom ib tus ntoo Christmas uas muaj teeb ci ntsa iab thiab pom tej khoom plig uas tau muab qhwv cia hauv qab nws tej ceg ntoo uas nthuav lawm. Ces peb taug cov kev tsev mus ntsib cov me nyuam tub thiab ntxhais—tej tug muaj ntaub qhwv lawv txhais caj npab los yog txhais ceg, tej tug muaj qhov mob uas tsis yooj yim kho—lawv luag nyav rau peb.
Ib tug me nyuam tub uas mob heev hu rau kuv tias, “Koj lub npe hu li cas?”
Kuv qhia nws kuv lub npe hu li cas, thiab nws nug, “Koj puas kam foom koob hmoov rau kuv?”
Kuv foom koob hmoov rau nws tas, thiab thaum peb tab tom yuav ncaim nws lub txaj mus, nws hais tias, “Ua tsaug ntau.”
Peb taug mus ob peb ruam, ces kuv hnov nws hu tias, “Auj, Tij Laug Monson, nyob zoo Hnub Christmas rau koj.” Ces nws luag nyav loj heev.
Tus me nyuam tub muaj lub hwj huam ntawm Christmas. Lub hwj huam ntawm Christmas yog ib qho uas kuv xav kom peb txhua tus yuav muaj hauv peb lub siab thiab hauv peb lub neej—tsis yog thaum lub caij no xwb tiam sis txhua lub sij hawm thiab.
Thaum peb muaj lub hwj huam ntawm Christmas, peb nco ntsoov txog Nws tus uas peb ua koob tsheej txog (Lukas 2:11).
Nyob hauv peb lub caij nyoog no qhov uas peb muab txiaj ntsim rau lwm tus yog ib qho tseem ceeb hauv kev ua koob tsheej thaum lub caij Christmas. Kuv xav tias tej zaum peb yuav tau zoo yog peb nug peb tug kheej hais tias, Tus Tswv xav kom kuv muab txiaj ntsim dab tsi rau Nws los yog rau lwm tus thaum lub caij uas muaj nqi no?
Cia kuv qhia hais tias peb Leej Txiv Saum Ntuj Ceeb Tsheej xav kom peb muab lub txiaj ntsim ntawm kev mloog lus rau Nws thiab rau Nws Leej Tub. Kuv kuj xav tias Nws yuav xav kom peb muab peb tus kheej thiab xav kom peb tsis txhob ua neeg qia dub los sis cuaj khaum los sis txawj sib cav, raws li Nws Leej Tub uas muaj nqi heev hais nyob hauv Phau Ntawv Maumoos:
“Kuv hais tseeb tseeb rau nej, tus uas muaj tus ntsuj plig ntawm txoj kev sib cav tsis yog kuv li, tiam sis yog los ntawm tus dab, tus uas … txhib neeg tej siab kom ib leeg sib cav npau taws rau ib leeg.
“Saib seb, qhov no tsis yog kuv tej lus qhuab qhia, txhib kom neeg tej siab npau taws, ib leeg nkaug ib leeg; tiam sis qhov no yog kuv tej lus qhuab qhia, kom tsis txhob ua tej yam zoo li ntawd lawm” (3 Nifais 11:29–30).
Nyob hauv lub caij nyoog sij hawm uas muaj txhij txhua, peb yeej muaj cib fim hlub thiab muab peb tus kheej rau lwm tus txhua lub sij hawm, tiam sis tej cib fim ntawd txawj ploj mus thiab. Niaj hnub no muaj cib fim ua rau lwm tus zoo siab, hais lus siab zoo rau lwm tus, tej yam zoo yus ua tau, thiab muaj tib neeg uas xav tau kev cawm seej.
Ib tug uas paub zoo txog lub hwj huam ntawm Christmas sau hais tias:
Kuv yog lub Hwj Huam ntawm Christmas—
Kuv nkag mus hauv lub tsev ntawm neeg pluag, ua rau cov me nyuam uas muaj ntsej muag daj qhib qhov muag loj, vim lawv zoo siab xav tsis thoob.
Kuv ua rau tus neeg qia dub xav faib nws cov nyiaj rau lwm tus ua rau nws tus ntsuj plig ci ntsa iab.
Kuv ua rau cov neeg laus rov qab ua li neeg hluas thiab luag raws li tau ua dhau los.
Kuv ua rau cov me nyuam lub siab muaj kev hlub, thiab ua rau lawv txoj kev tsaug zog muaj zaj npau suav zoo.
Kuv ua rau cov neeg uas xav ua zoo nce ntaiv nrog tej pob tawb uas puv nkaus, uas ua rau lwm tus xav tsis thoob vim muaj tib neeg zoo npaum li no hauv lub ntiaj teb.
Kuv ua rau tus tub ua txhaum cia li xav ib me pliag thaum nws ua tej yam tsis muaj nqi thiab xa ib qho me me rau cov uas hlub nws uas ua rau lawv zoo siab los kua muag—cov kua muag uas ntxuav tau kev tu siab mus.
Kuv nkag mus hauv tej lub tsev rau txim uas tsaus ntuj, ua rau tib neeg ua txhaum loj nco qab tias lawv txhaum li cas thiab ua rau lawv xav txog tej hnub zoo rau yav tom ntej.
Kuv maj mam los rau cov neeg mob hauv lub tsev kho mob, thiab cov uas tsis muaj zog hais lus tshee tshee qhia tias lawv ua Vajtswv tsaug.
Muaj ntau yam kuv ua kom tib neeg nyuaj siab ntsia saud pom Vajtswv lub ntsej muag, thiab tau ib me pliag tsis nco qab txog tej yam me me thiab tej yam tsis zoo.
Kuv yog lub Hwj Huam ntawm Christmas.1
Thov kom peb yuav rov qab nrhiav tau lub hwj huam ntawm Christmas—uas twb yog Khetos lub Hwj Huam.
© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais First Presidency Message, December 2012. Hmong. 10372 295
Qhia los ntawm tsab Xov No
Thaum koj qhia Thawj Tswj Hwm Monson zaj lus no rau tsev neeg, cia li xav seb puas xav rov qab hais lo lus uas nws nug hais tias tus Tswv xav kom peb muab tej txiaj ntsim twg rau Nws los yog rau lwm tus thaum lub caij nyoog no. Yaum kom tsev neeg sau lawv tej kev xav thiab tej lub tswv yim (los sis, cia cov me nyuam kos duab) txog qhov uas yuav ua li cas “rov qab nrhiav tau lub hwj huam ntawm Christmas—uas twb yog Khetos lub Hwj Huam.”