2012
Mus Saib Xyuas tom Tsev, ib txoj Hauj Lwm Cawm Seej
December 2012

Cov Mus Saib Xyuas Tom Tsev tsab Xov, Kaum Ob Hlis Ntuj 2012

Mus Saib Xyuas tom Tsev, ib txoj Hauj Lwm Cawm Seej

Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.

Daim Duab
lub cim rau lub Koom Haum Niam Tsev

Kev Ntseeg, Tsev Neeg, Kev Pab

Qhov mus saib xyuas tom tsev ces mus cib fim cov rau poj niam saib xyuas, pab ntxiv dab zog, thiab qhia ib leeg rau ib leeg—nws yog ib txoj hauj lwm cawm seej tiag tiag. Los ntawm kev mus saib xyuas tom tsev, cov viv ncaus sawv tus Cawm Seej cev pab cov poj niam npaj txais cov koob hmoov ntawm txoj sia nyob mus ib txhis.

Tus Thawj Tswj Hwm Spencer W. Kimball (1895–1985) hais tias, “Peb yuav tsum ‘ceeb toom, piav, ntuas thiab qhia thiab caw [lwm tus] kom los cuag Khetos’ (D&C 20:59), raws li tus Tswv hais nyob hauv nws tej kev tshwm sim.” Nws hais ntxiv hais tias, “Nej zaj lus tim khawv yeej yuav pab nej ua li ntawd.”1

Thaum peb cov uas mus saib xyuas tom tsev kom peb txoj kev txawj ntse txog qhov tseeb ntawm txoj moo zoo loj tuaj, peb tej zaj lus tim khawv txhawb nqa cov viv ncaus uas npaj ua kev cai raus dej thiab txais kev pom zoo. Peb pab cov mej zeej tshiab muaj zog ntawm txoj moo zoo. Qhov uas peb mus xyuas tib neeg thiab hlub lawv pab “kom cov uas tau tawm ntawm peb mus rov qab los [thiab] ua rau cov uas tsis tshua ntseeg txoj moo zoo lawm rov qab muaj siab ntseeg.”2 Thiab peb yaum kom cov viv ncaus los cuag Khetos los ntawm qhov uas lawv mus rau lub tuam tsev.

Thawj Tswj Hwm Kimball hais rau cov poj niam uas mus saib xyuas tom tsev hais tias, “Nej yeej yuav cawm neeg txoj sia, thiab tej zaum cov neeg uas muaj siab ntseeg hauv lub Koom Txoos hnub no mas lawv muaj siab ntseeg vim nej tau mus xyuas lawv tom tsev thiab ua rau lawv muaj ib lub zeem muag tshiab. Nej ua rau lawv pom kev. Nej ua rau lawv pom tau deb dua li qub. …

“Nej tsis cawm cov viv ncaus no txoj sia xwb, tiam sis tej zaum nej kuj cawm lawv cov txiv thiab tsev neeg txoj sia.”3

Los ntawm cov Vaj Lug Kub

Doctrine and Covenants 20:59; 84:106; 138:56

Los ntawm Peb zaj Keeb Kwm

Thaum tus Yaj Saub Yauxej Xamiv txhim tsa lub Koom Haum Niam Tsev, nws hais tias cov poj niam yuav tsum tsis txhob saib xyaus cov neeg pluag xwb tiam sis lawv kuj yuav tsum cawm neeg txoj sia. Nws kuj qhia hais tias cov poj niam hauv lub Koom Txoos muaj tej luag hauj lwm tseem ceeb nyob hauv Leej Txiv Saum Ntuj Ceeb Tsheej txoj kev cawm seej.4 Thaum peb ua raws li tej ntsiab cai uas tus Yaj Saub Yauxej Xamiv qhia, peb cov viv ncaus nyob hauv lub Koom Haum Niam Tsev yuav ua hauj lwm ua ke npaj cov poj niam thiab lawv tsev neeg txais tau Vajtswv cov koob hmoov zoo tshaj plaws.

Tus Yaj Saub Brigham Young (1801–77) hais tias “Cia peb ib leeg muaj siab hlub ib leeg, thiab cia [cov uas] muaj zog ua tib zog txhawb nqa cov uas qaug zog kom lawv muaj zog zuj zus tuaj, thiab cia cov uas txawj pom kev coj cov neeg dig muag mus txog thaum lawv pom kev lawv tus kheej.”5

© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais Visiting Teaching Message, December 2012. Hmong. 10372 295

Lus Cim

  1. Spencer W. Kimball, nyob hauv Daughters in My Kingdom: The History and Work of Relief Society (2011), 116.

  2. Eliza R. Snow, nyob hauv Daughters in My Kingdom, 83.

  3. Spencer W. Kimball nyob hauv Daughters in My Kingdom, 117.

  4. Saib Joseph Smith, nyob hauv Daughters in My Kingdom, 171–72.

  5. Brigham Young, nyob hauv Daughters in My Kingdom, 107.

Kuv Yuav Pab Li Cas?

  1. Lub Koom Haum Niam Tsev pab kuv li cas npaj txais cov koob hmoov ntawm txoj sia nyob mus ib txhis?

  2. Kuv yuav ua li cas kom cov uas kuv saib xyuas txoj kev ntseeg loj tuaj?

Luam