Agtutubo
Ti Naan-anay a Bisperas ti Paskua
Idi ubingak pay, maysa kadagiti kapintasan a paset ti tunggal tawen ket ti Bisperas ti Paskua. Nagaramidkami iti pamiliak iti pitsa, napankami nagkaroling, ket kalpasanna nagtitiponkami para iti maysa a debosional iti Paskua. Nagkantakami kadagiti himno iti mapagduaduaan nga uppat ti pasetna nga armonia ken impigsami ti nagtokar kadagiti kanta ti Paskua nga usarmi dagiti naidumduma a sabasabali nga instrumentomi iti musika. Kanayon ng igibus ni Tatang ti rabii babaen iti kapanunotan maipapan iti Paskua a nangpalua kadakami gapu iti ragsak. Saan a naragragsak pay ti biagmi no awan ti Bisperas ti Pakua.
Idi dumakdakkelakon, rinugian ti inak nga aywanan ti ubing a kaarrubami, ni Kelly. Umay ni Kelly iti balaymi iti inaldaw kalpasan ti panageskuelana bayat ti panagtrabaho ti inana, ni Patty. Surotsurotennak ni Kelly a kasla maysa nga uken—natagari ken agkasapulan iti panangasikaso. Kanayon a magin-awaanak no umay alaen ni Patty ti anakna a babai ket panawanda ti balayko ken pamiliak a sitatalna.
Maysa a Disiembre, nagamakak idi inawis ti inak da Patty ken Kelly tapno makaduami iti Bisperas ti Paskua. Ti Bisperas ti Paskuak. Immisem ti inak ket impanamnamana kaniak, “Awan ti balbaliwanna.” Ngem ammok unay nga adda balbaliwanna. Kanendanto amin ti pitsami. Katawaanto ni Kelly ti panagkantami. Ninamnamak ken inawatkon a daytoyto ti kalidayan a Bisperas ti Paskua.
Idi dumteng ti sardam, kinaduadakami da Patty ken Kelly, ket nagsasarita ken nagkakatawa ken nagkakantakami. Husto ni nanangko. Daytoy ti karagsakan. Iti tengnga ti rabii nagyamanda kadakami ket sikekedked a nagpakadada. Napanak naturog a napnuan rag-o ti pusok. Natakuatak a dagiti pudno a napapateg a sagut ti Paskua ket saan a mapukaw no maibinglay. Ngem ketdi magpasam-it ken umaduda no iparaburtayo dagitoy.