Mensahe iti Visiting Teaching, Disiembre 2012
Visiting Teaching, Maysa nga Aramid ti Pannakaisalakan
Sikakararag nga adalenyo daytoy a material ken, no maitutop, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.
Pammati, Pamilia, Tulong
Ti visiting teaching ti mangted kadagiti babbai iti gundaway a mangaywan, mangpapigsa, ken mangisuro iti tunggal maysa—pudno a daytoy ti maysa nga aramid ti pannakaisalakan. Babaen ti visiting teaching, agserbi dagiti kakabsat a babbai a maipaaay iti Mangisalakan ken tumulongda a mangisagana kadagiti babbai para kadagiti bendision ti agnanayon a biag.
“Datayo ti ‘mangballaag, mangilawlawag, mangigunamgunam, ken mangisuro, ken mangawis iti [amin] nga umasideg ken ni Cristo’ (DkK 20:59), kas iti kinuna ti Apo kadagiti paltiingna,” kinuna ni Presidente Spencer W. Kimball (1895–1985). Kinunana pay, ti pammaneknekyo ket maysa a nakaskasdaaw a wagas a panangisao iti mensahe.”1
No datayo kas visiting teacher ket umad-adu ti ammotayo maipapan kadagiti kinapudno ti ebanghelio, dagiti pammaneknektayo ti mangpapigsa ken mangtulong kadagiti kakabsat a babbai nga agsagsagana a mabuniagan ken makumpirmaan. Tulongantayo dagiti baro a miembro nga agbalin a naan-anay nga agbiag iti ebanghelio. Makatulong dagiti isasarungkar ken pammategtayo a “mangpasubli kadagitay kimmayakayen [ken] mangpapigsa iti pammaneknek dagitay nagbalinen a saan nga aktibo iti ebanghelio.”2 Ken allukoyentayo dagiti kakabsat a babbai nga umasideg ken ni Cristo babaen ti idadar-ay iti templo.
“Mapankayo mangisalakan kadagiti kararua,” kinuna ni Presidente Kimball kadagiti visiting teacher, “ken asino ti makaibaga nga adu kadagiti nasasayaat nga aktibo a tattao iti Simbaan ita ti aktibo gapu ta napankayo kadagiti pagtaenganda ket nangtedkayo iti maysa a baro a pannirigan, maysa a baro a parmata. Impakaammoyo kadakuada dagiti banag a saanda nga ammo ken maawatan. Inyatiddogyo dagiti patingga ti panagkitada. …
“Kitaenyo, saanyo laeng nga isalsalakan dagitoy a kakabsat a babbai, ngem nalabit nga isalsalakanyo pay dagiti assawada ken dagiti pagtaenganda.”3
Manipud kadagiti Nasantuan a Kasuratan
Manipud iti Pakasaritaantayo
Idi binukel ni Propeta Joseph Smith ti Relief Society, kinunana a dagiti babbai ket saanda laeng a mangaywan kadagiti napanglaw ngem ketdi mangisalakanda pay kadagiti kararua. Insurona pay nga addaan dagiti babbai iti Simbaan kadagiti napapateg nga akem iti plano ti Nailangitan nga Ama iti pannakaisalakan.4 Naiwanwan babaen dagiti pagbatayan nga insuro ni Propeta Joseph Smith, datayo kas kakabsat a babbai iti Relief Society ket makapagtitinnulongtayo a mangisagana kadagiti babbai ken dagiti pamiliada para kadagiti kaindaklanan a bendision ti Dios.
“Agkikinnaasitayo koma iti tunggal maysa,” kinuna ni Presidente Brigham Young (1801–77), “ket bay-antayo [dagitay]napigsa a siaayat a mangagas kadagiti nakapuy tapno mapapigsada, ken bay-antayo dagitay makakita a mangtarabay kadagiti bulsek agingga a makitada ti dalan para iti bagbagida.”5
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti Visiting Teaching Message, December 2012. Ilokano. 10372 864
Ania ti Maaramidko?
-
Kasano nga isagananak ti Relief Society para kadagiti bendision ti agnanayon a biag?
-
Ania ti maaramidko tapno mapapigsa ti pammati dagiti ay-aywanak?