Mensahe ti Umuna a Panguluen, Disiembre 2012
Panangtakuat Manen iti Kaipapanan ti Paskua
Tawtawen ti napalabasen idi agtutuboak pay nga elder, naawaganak a kaduak dagiti dadduma pay iti maysa nga ospital idiay Salt Lake City tapno mangipaay iti pammendision kadagiti masakit nga ubbing. Iti iseserrekmi, nadlawmi ti maysa a Krismas tri nga addaan kadagiti naraniag ken makaay-ayo a silaw ken nakitami dagiti naannad ti pannakabungonna a pakete iti babaen dagiti nairangpaya a sangana. Kalpasanna napagnaanmi dagiti pasilio a yan dagiti ubbing a lallaki ken babbai—a nakabenda ti ima wenno takiagda, adda sakit dagiti dadduma pay a mabalin a saan a dagus a maagasan—a siiisemda a nangkablaaw kadakami.
Maysa nga ubing a masaksakit unay ti nagsaludsod kaniak, “Ania ti naganmo?”
Imbagak ti naganko, ket indawatna, “Bendisionannak man?”
Naipaay ti pammendision, ket idi agpakadakami a pumanaw iti abay ti katrena, kinunana, “Agyamanak unay kadakayo.”
Nakaaddangkami iti sumagmamano idi nangngegko nga inyawagna, “O, Brother Monson, naimbag a Paskuam.” Kalpasanna adda dakkel nga isem a timpuar iti rupana.
Addaan dayta nga ubing a lalaki iti kaipapanan ti Paskua. Ti kaipapanan ti Paskua ket maysa a banag a sapay koma ta adda iti puspuso ken biagtayo—saan laeng iti daytoy masinunuo a tiempo no di ketdi iti unos ti tawen.
No addaantayo iti kaipapanan ti Paskua, malaglagiptayo Isuna a ti kasangayna ket ramrambakantayo iti daytoy a tiempo ti tawen: “Ta nayanak kadakayo itoy nga aldaw iti siudad ni David ti maysa a Mangisalakan nga isu ni Cristo nga Apo” (Lucas 2:11).
Iti aldawtayo ti kaipapanan ti panangted kadagiti sagut ket dakkel ti papel nga ak-akmenna iti panangrambak iti tiempo ti Paskua. Pagsayaatantayo ngata no saludsodentayo iti bagbagitayo, Ania a sagsagut koma ti kayat ti Apo nga itedko Kenkuana wenno kadagiti sabali iti daytoy napateg a panawen ti tawen?
Mabalinko nga isingasing a kayat ti Nailangitan nga Amatayo nga ited koma ti tunggal maysa kadatayo Kenkuana ken iti Anakna ti sagut ti panagtulnog. Mariknak pay a kiddawenna kadatayo a tulongantayo dagiti sabali babaen ti panangusar iti sanikua ken talentotayo ken saantayo nga agbalin a naimot wenno managimbubukod wenno mannakiapa, kas iti isingasing ti napateg nga Anakna iti Libro ni Mormon:
“Pudno, pudno kunak kadakayo, saanko a kukua ti addaan iti espiritu ti pannakisuppiat, ngem kukua ti sairo, nga … kiburenna ti puso dagiti tao tapno pagpungtotenna ti tunggal maysa.
“Adtoy, saan a daytoy ti doktrinak, ti mangkibur iti puso ti tao tapno agpungtot, a maibusor iti sabali; ngem daytoy ti doktrinak, a rumbeng a maikkat dagiti kasta a banag” (3 Nephi 11:29–30).
Iti daytoy a datdatlag a dispensasion ti pakabuklan dagiti panawen, pudno a saan a limitado dagiti gundawaytayo a mangipateg ken mangted iti bagbagitayo, ngem saan a kanayon nga adda dagitoy a gundaway. Iti agdama adda dagiti puso a paragsaken, dagiti nasayaat a balikas a sawen, dagiti aramid nga aramiden, ken dagiti kararua nga isalakan.
Insurat ti maysa nga addaan iti nagagar a pannakaammo ken pannakaawat iti kaipapanan ti Paskua:
Siak ti Kaipapanan ti Paskua—
Sumrekak iti pagtaengan ti nakurapay, a mangigapu iti panagmulagat dagiti nabessag ti panagruprupana nga ubbing, gapu iti siddaaw.
Siak ti mangigapu iti panaglukay ti nairut nga ima ti managimbubukod a tao ket iti kasta maipintak iti kararuana ti maysa a naraniag a silaw.
Siak ti mangigapu iti lakay wenno baket a sumadiwa ti kinaagtutuboda ken agkatawada kas iti panagkatawada idi ubbingda pay.
Pagtalinaedek a sibibiag ti ayat iti puso ti kinaubing, ken pagraniagek ti pannaturog babaen kadagiti napipintas a dardarepdep.
Siak ti mangigapu iti nagagar a saka nga umuli a mangipaay iti tulong kadagiti agkasapulan, a mangpanaw kadagiti puspuso a masmasdaaw iti kinaimbag ti lubong.
Siak ti mangigapu iti nayaw-awan tapno mangisardeng iti apagkanito ti nagastar, nabuslon a wagasna ket mangipatulodak iti maysa a banag iti agur-uray nga ipatpateg nga aglulua gapu iti ragsak—dagiti lua a mangugas kadagiti kuretret gapu iti panagliday.
Sumrekak kadagiti nasipnget a selda ti pagbaludan, a mangipalpalagip iti namarkaan a kinalalaki ti no ania ti mabalin a mapaspasamak ken mangitudtudo kadagiti napipintas nga aldaw a sumangbay.
Umayak a siinnayad iti nalanay, puraw a pagtaengan ti saem, ken dagiti bibig a nakapuy unayen a mangisao laeng a sipipigerger iti naulimek, nalawag a panagyaman.
Iti rinibu a wagas, siak ti mangigapu iti nabannogen a lubong a mangkita iti rupa ti Dios, ket iti apagkanito manglipat kadagiti banag a babassit ken nanumo.
Siak ti Kaipapanan ti Paskua.1
Matakuatan koma manen ti tunggal maysa kadatayo ti kaipapanan ti Paskua—uray ti Espiritu ni Cristo.
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti First Presidency Message, December 2012. Ilokano. 10372 864
Panangisuro manipud iti Daytoy a Mensahe
Bayat ti panangibinglayyo iti mensahe ni Presidente Monson iti pamilia, ibilangyo ti panangyunay-unay iti saludsod a dinamagna maipapan iti no ania dagiti sagut a kayatna nga itedtayo Kenkuana wenno kadagiti sabali itoy a tiempo. Allukoyenyo dagiti miembro ti pamilia a mangisurat kadagiti kapanunotan ken ideyada (wenno, para kadagiti babassit nga ubbing, pagdrowingen ida iti ladawan) maipapan iti no kasano ti “mangtakuat manen iti kaipapanan ti Paskua—uray ti Espiritu ni Cristo.”