Mwet Fuhsr
Ekuh Wowo se Met liki Lwen in Christmas
Ke nga kapkapwack ah, sie sin ip wo emet ke yac nuh kwewa uh pa Ekuh Met liki Lwen in Christmas. Nga ac sucu luhk ah orwaclah pitsa, som fahsr on, na tuhkweni nuh ke sie alu in Christmas. Kuht onkihn on in alu uh ke puhsrwen on rarrar ahkosr ac sritaclkihn kuhfwen mwe on nahtuhsr uh arlac yohk puhsra. Pahpah el kwacna ahksahfyelah ekuh sacn ke sie nuhnak ke Christmas ma ahksohrohrye muhtahsr ke engan. Moul uh tiacna oreklac wo oacna Ekuh Met liki Lwen in Christmas uh.
Ke nga mahtuhack ah, ninac kiyuck ah muhtwacwacack karihngihn sie mwet tuhlan fuhsr, Kelly. Kelly el tuhkuh nuh lohm sesr ah lwen nuh kwewa tukun lutlut ah ke ninac kiyacl ah, Patty, el orekma uh. Kelly el ukweyuc oacna soko kosro srihsrihk—wohwohn ac enenuh. Kwacna mwe mongi se ke Patty elac sruhkwack tuhlihk muhtwacn se nahtuhl an ac som liki lohm sihk ac sucu luhk ah ke mihs uh.
Ke Tisacmpuh, nga elyahyak ke ninac el solwacl Patty ac Kelly in wi kuht ke Ekuh Met liki Lwen in Christmas ah. Ekuh Met liki Lwen in Christmas luhk. Ninac el isrwacsr ac ahkkweye nuh sihk, “Ac tiac ekuhllah kuhtwena ma.” Tuhsruhk nga etuhna lah ac ekuhllah ma. Eltahl ac kanglah nohfohn pitsa nwacsr ah. Kelly el ac isrucn onon lasr ah. Nga tuhpanna ac etuhna lah ac Ekuh Met liki Lwen in Christmas na koluk se.
Ke ekwelac ah, Patty ac Kelly wi kuhtyang, ac kuht sramsram ac isrwacsr ac on. Pwacye sin ninac kiyuck ah. Ma sac arulacna wo. Ke infulwacn fong ah elos fahk kuloh nuh sesr ac kohslah na som. Nga som mutullac ke inse sesseslah ke luhngse. Nga sokwack lah mwe sang sacohk na pwacye ke Christmas uh tiacna wacngihnlac ke kuht akacsruhi uh. Sahyacna elos wo likina ac puhseni ke kuht kihtacloslac uh.