Pweng luhn Prestuhnsi Se Met, Tisacmpuh 2012
Sifilpac konwacack Nguhnin Christmas
Oacna sie elder fuhsr ke yac somlah ah, pahngonyuck nga wi mwet sahyac nuh ke sie lohm ono fin acn Salt Lake City in sang ahkinsewowo nuh sin tuhlihk mas. Ke kuht utyak ah, kuht akihlen soko sahk in Christmas ke lahm na kahlwem ac wowo ac liye nuk pihplac arlac wo ye lah maelihk kac ah. Na kuht fahsr ahluhkwelah lun lohm sac nuh ke acn ma tuhlihk mukul ac muhtwacn srihsrihk ah—kuhtuh simacnlac paho kuh niyac ah, kuhtuh suhkahpahslah ma sahp tiac kuh in sa onweyucklac—pain kuht ke ngwetngwet kuhlwacng.
Sie tuhlihk mukul fuhsr, mas na upac pahngonyuc, “Suc inem an?”
Nga fahk nuh sel inek, ac el siyuck, “Kom kuh in ahkinsewowoyeyuclac?”
Ahkinsewowo sac ituckyang, ac ke kuht forlah in som liki siskacn mwe oan lal ah, el fahk, “Kuloh na ma luhlahp.”
Kuht fahsr nuh met kuhtuh, na nga lohng el pahng, “O, Tamuhlwel Monson, merry Christmas nuh sum.” Na sie isracsr na wowo oreklac ke muhtahl.
Oasr nguhnin Christmas sin tuhlihk mukul sac. Nguhnin Christmas pa sie ma nga finsrakkihn in oasr lasr nohfohn ke insiyacsr ac moul lasr uh—tiac ke puhlan pacl se inge muhkwena tuhsruhk ke yac na fohn sac.
Ke oasr nguhnin Christmas lasr uh, kuht ac esamuhl suc puhtte la ma kuht ahkfuhlwactye ke puhlan pacl se inge ke yac uh: “Tuh isuslac nuh suwos mihsenge in siti sel David sie Mwet Lahngo, suc Leum Christ” (Luke 2:11).
Ke lwen lasr uh nguhnin sang mwe sang uh oruh sie atac na yohk in ahkfuhlwactye pacl in Christmas uh. Nga nuhnkuh fin oasr ma kuht kuh in eis ke kuht sifacna siyuck, Mwe sang fuhkah ma Leum el kena ngan sang nuh Sel kuh nuh sin mwet sahyac uh ke pacl sacohk se inge ke yac se?
Lwelah nga in fahk lah Pahpah tuhmasr Inkuhsrao el luhngse kais sie sesr in fohlohkihn nuh Sel ac nuh sin Wen Nahtuhl mwe sang ke ahkostwen. Nga puhla pac lah El ac siyuck sesr in iskuhtyang sifacna ac tiac srohwohsr kuh rahpkuh kuh akuhkuhin, oacna ke Wen sacohk Nahtuhl fahk ke Puk luhn Mormon an:
Mwet Lahngo el luti lah elos suc oasr nguhn in akuhkuhin la uh tiac ma Sel tuhsruhk ma sel setuhn, suc pa pahpah tuhmuhn akuhkuhin ac suc moklweack insiacn mwet in akuhkuhin ke kasrkuhsrak nuh sin sie sin sie.
Mwet Lahngo el fahk lah tiac mwe luti Lal in moklweack insiyacn mwet uh ke kasrkuhsrak lain sie sin sie, tuhsruhk tuh mwe luti Lal pa kain ingacn in wacngihnlac (liye 3 Nephi 11:29 30).
Ke fihl in pacl wolacna ke fohnlah luhn pacl uh, pacl wo lasr in luhngse ac eiskuhtyang uh pwacyelah wacngihn sahflahiyac, tuhsruhk elos kuh pac in oasr muhkwena ke pacl fal nuh sesr in kahsruh uh. Mihsenge oasr inse in ahkenganye, kahs kuhlwacng in fahk, orekma in oreklac, ac nguhna in moliyucklac.
Sie mwet suc fokoko nuhnak la ke nguhnin Christmas suhmuhslah:
Nga pa nguhnin Christmas uh—
Nga utyak nuh in lohm luhn suhkahsruhp, orwaclah muhtuhn tuhlihk suhpwacr uh in ikucsaclihk muhtahltahl, ke nuhnak pwacr.
Nga orwaclah poun mwet rahpkuh se in monglac ac srolwaclah sie acn kahlwem ke nguhnal.
Nga orwaclah mwet mahtuh in ahksasucyelah pacl fuhsr lalos ac in isrwacsr oacna ke elos fuhsr ah.
Nga oruh luhngse moul na ke insiyacn tuhlihk ah, ac ahkwoye mutul lalos uh ke mwemwe wo.
Nga orwaclah niyac rahrah uh in sang kahsruh nuh sin mwet enenuh uh, fihliyac inse lut uh ke wolacna luhn facluh.
Nga orwaclah mwet suhnuhntac in tui kihtin pacl ke inkacnek upac, eis pacl ac suhpwaclah sie ma nuh sin sie mwet luhngse kena yohk ma fuhlwelah sronin muhta engan uh—sronin muhta ma eslah iken ahsor uh.
Nga ilyak nuh lun acn kaclpous lohsr uh, ahkacsmakihnye mukul kantweyucki uh ke ma kuh in sikyak ac ahkkahlwemye ke lwen wowo ma soenna sikyak uh.
Nga tuhkuh kahkahsrihk nuh ke sie lohm fasrfasr, mihs ke kweok, ac inngoasro ma muhnahs in sramsram tuh rarrar ke ahkkahlwemye tarilacna mihs.
Ke inkacnek tausin, nga oruh facluh muhnahs se in ngwetwack nuh ke muhtuhn God, ac ke kihtin pacl muhlkuhnlah ma ma srihk ac kweok uh.
Nga pa Nguhnin Christmas.1
Lwelah kais sie sesr in sifilpac sokwack nguhnin Christmas uh—finne ke Nguhn luhn Kraist.
© 2012 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/11. Ahkkweyeyucklac ke lweng: 6/11. Lwenglah luhn First Presidency Message, December 2012. Kosraean. 10372 868
Luti ke Pweng Se Inge
Ke kom akacsruhi ke pweng lal Prestuhn Monson yurin sucu an, nuhnkuh in ahkyohkye kihsen siyuck el siyuck ke mwe sang fuhkah ma Leum el ke kuht in sang nuh Sel kuh nuh sin mwet sahyac ke puhlan pacl se inge. Ahkkweye mwet ke sucu an in esamyac nuhnak ac mwe sramsram an (kuh, nuh sin tuhlihk srihsrihk an, in srolwaclah sie petsac) ke ohiyac in “sifilpac sokwack nguhnin Christmas—finne Nguhn luhn Kraist.”