Klumech er a First Presidency, Ongeteruich me a Ongerung el Buil 2012
Lemuut el metik er a Reng er a Kurismas
Betok el rak er a memong er a ak ngeasek el elder, e ngak me a rebebil a mlo er a osbitar er a Salt Lake City el mlo omesterir a klengeltengat a rengalek el smecher. Me a ki msiseb, e a ki milsa belsiochel e dmiich el kerkerul a Kurismas me a kmal ungil blail el beresent el nga er a cheungel. A ki mirrael a delongelel aika el delmerab el mla er ngii e mekekerei el sechal me a redil—el bebil er tir a selement a chimorir me a lechub eng ocherir, me a rebebil el secherir a diak el sebechel mukar eng di te kmal mle merreched—el outkeu er kemam el klikmechur a mederir.
A kekerei, e kmal smecher el buik a uleker ngak, “Ng techa ngklem?”
A kuluchais er ngii er a ngklek, eng uleker, “Ng sebechem el meskak a klengeltengat?”
Ak milsa klengeltengat, e a ki morech er kemam el merael, eng dula el kmo, “Ke kmal mesaul.”
Aki mla ngmai a tela el bakes, e ak rirengesii el melekoi, “Oi, Brother Monson, Ungil Kurismas el mo er kau.” E kmal mlo klikmechur osengel.
Ngika el buik a uleba reng er a Kurimas. A Reng er a Kurismas a chimo el tekoi el kuureng me kid el rokui a mo oba el nga er a rengud me a klengar er kid—er a diak el dil chelecha el taem ng dirrek el bek el rak.
Sel doba reng er a Kurismas, e kede melbedebek er Ngii el cherellel a doldeu er ngii er chelechal taem: “Chelechal sils e a Osebeliu el ngii a Kristus el Rubak, a mlechell er a belual a David” Lukas 2:11).
Chelechal taem e sel reng er a kauberesent a kmal klou a belkul er a temel a Kurismas. Ak melbedebek el kmo ng locha mo klungioled omko kede oker kid el kmo, “Ngera el beresent a soal a Rubak ak bsang malechub ak mesterir a rebebil er chelechal taem?
Ak kmul kmo a Demad er a Babeluades a bai soal a dersta er kid a debsa Ngii me a Ngelekel a beresent er a olengesenges. Ak dirrek el omelchesiu el kmo Ngii a soal a bo de bekerurau e diak de bechechelingaol malechub el merechoreh a rengud malechub e de kaungeroel el uai a tekingel a mekreos el Ngelekel el nga er a chelsel a Babier er a Mormon:
“Leng klemerang, ng klemerang, me ak subedemiu, ngikei el ngar er ngii a reng er a klautok a diak lenga er ngak, e bai ngar er a diablong, el … mo ongasech a rengrir a rechad el kirel a tang me a tang me te mo kautok.
Tiang a diak losischeklek el mo olengasech a rengrir a rechad el kirel a tang me a tang; ngbai tiakid osisecheklek el kmo, chouaikang el tekoi a kirel mo diak. (3 Nephi 11:29–30).
Me a chelsel chelechal taem er a cherrengelel a rokui el tekoi, e a techelled el mo oubeltikelreng e bekerurau a diak a telkelel, e dirrek el diak el ngemed. Chelechal sils e ngar er ngii a reng el doldeu, ungil tekoi el bo dedung, omeruul el bo dekedmokl, me a reng el bo dolsobel.
A ta el chad el dmolech osengel er a Kurismas a lilchesii tiakid el tekoi:
Ngak a Reng er a Kurismas—
Ak soiseb er a blirir a remechebuul, e mok osengir a rengalek, el rulterir el kmal mo mechas a rengrir.
Ak rulii a meringel el oureor meng mo chelelakl e osberberii a llomes er a rengul.
Ak rulterir a remechudelang el mo melatk a klengeasek er tir e mo ngara dereuakl el di uai a lengeasek.
A kurkedii a reng er a ultoir er a klengeasek e omekllomes a cheliuir loba ungil berrous.
Ak remuul a uach el mo sebechel melemiakl a terebel loba mui el deureng, e mechas a rengrir er a klungiolel a beluulechad.
Ak rulii a dengerenger el ngalek el mo chelellakl el telkib el taem, er a terrekakl el klengar e mo odureklii a kmo ngera el mo er a betik er a rengul—el rulii meng mo ungil a rengul e lmangel me a iuechel a medal mel suld a klengitelreng el mo diak.
Ak soiseb er a milkolk el blil a kelbus, el rulii a mla metemall el klengar meng ouchel uase ngera mle sebechel mekedmokel e melutk el bedul uchei el kirel a betok el ungil sils el dirk merael mei.
Ak mekekokak el mo soiseb er a kekerei el blai, el ngar er ngii a ringel er ngii, e a ngor el kmal mechitechut el diak el sebechel melekoi a di mo omritel er a luk, e di mo oureng a saul.
Chelsel a telael el teletael, e ngak a rulii a mesaul el beluulechad meng mo omes er bab el mo er a medal a Dios, e di telkib el taem eng obes a ike el mekekerei el tekoi el diak a ututelel.
Ngak a Reng er a Kurismas.1
Mei e bo dosiik er a meral reng er a Kurismas—el ngii a Reng er a Kristo.
© 2012 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/11. Kengei er a oidel: 6/11. Oidel a First Presidency Message, December 2012. Palauan. 10372 881
Osisecheklel Tia el Klumech
Sel bo mouchais er tia el klemechel a President Monson lobengkel a telungalek, molatk er sel ker el ngii a uleker ngii el kmo ngera el beresent a soal a Rubak ak nguu el msang malechub e ak mesterir a rebebil er chelechal taem. Mongesuseu er a rechedal a telungalek me lluches a uldesuir er a babier (malechub, a remekekerei el ngalek, bo loluches a sunga) el kmo ng mekerang a “deluut el metik er a reng er a Kurismas—el ngii a Reng er a Kristo.”