Yut
Stap Lisin long Ol Filing blong Spirit
Wan naet, yangfala kasen sista blong mi i ronwe long haos, mekem se mi bin hariap blong go lukaotem hem. Taem mi stap draev i go, mi bin prea blong Spirit i helpem mi. Mi bin save se bae God i ansa mo i lidim mi, mo mi bin traem blong lisin long ol toktok blong Spirit. Be mi no save harem wan samting, nao mi stat blong filim nogud mo mi filim se Spirit i no bin stap toktok long mi.
Nomata mi bin wantem go longwe blong lukaotem kasen sista blong mi, mi bin filim se mi mas stap long ples raon long haos blong kasen sista blong mi. Mekem se mi draev raon long ples ia wan moa taem. Taem mi bin stop long wan krosrod, mi bin luk sado blong wan yang gel we i stap wokbaot. Mi bin faenem kasen sista blong mi!
Taem mi bin stap kamaot long trak mo ron i go long hem, mi bin luksave se Spirit i bin stap lidim mi nomo long ful taem ia, taem hem i bin stap helpem mi blong filim se mi mas stap raon long ples ia nomo. From se mi bin stap traem blong lisin long wan kwaet voes, kolosap mi no lisin long wan filing we i kam long Spirit. Long taem ia, mi bin andastanem se plante taem, bae yumi no harem wan voes, be bae yumi filim sam samting insaed long hat blong yumi.
Mi bin glad tumas we Spirit i bin lidim mi. I tru, Hem i stap oltaem! Ol skripja oli stap talem long yumi se Tabu Spirit, oltaem bae i kompanion blong yumi (luk long D&C 121:46).
Sapos yumi klin inaf blong Spirit i lidim yumi, mo yumi lisin gud, bae yumi save stap olsem ol tul long ol han blong God, blong mekem gud long plante pipol. Wetem Spirit olsem kompanion we i stap wetem yumi oltaem, bae yumi save rod we bae yumi mas folem.