Visiting Tijing Mesej, Jenuware 2013

Misinari Wok

Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yu.Blong kasem moa infomesen, go long reliefsociety.lds.org.

Pikja

Rilif Sosaeti sil

Fet • Famle • Help

Oli stap sendem Ol Lata-dei Sent blong wok long plantesen blong Lod from fasin blong sevem ol sol blong ol man (luk long D&C 138:56); mo misinari wok hem i wan. Yumi no nidim blong oli singaotem yumi long wan spesel misin blong serem gospel. Bae ol narafala laef we bae oli kasem blesing blong gospel, oli stap raonem yumi; mo taem yumi mekem yumi rere, Lod bae i yusum yumi. Ol visiting tija oli save akseptem responsabiliti blong olgeta long saed blong spirit, mo help blong mekem wok blong mekem man i nomo save ded mo mekem man i kasem laef we i no save finis (luk long Moses 1:39).

Taem Profet Josef Smit i bin oganaesem Rilif Sosaeti long yia 1842, hem i bin talem se ol woman oli bin stap lukluk long olgeta we oli pua, be tu, oli bin sevem ol sol.¹ Hemia i stamba tingting blong yumi yet.

“Lod … i givim wan testemoni abaot trutok long olgeta we bae oli serem wetem ol narafala man,” Presiden Dita F. Ukdof, Seken Kaonsela long Fas Presidensi i bin talem. “Moa long hemia, Lod i wantem luk ol memba blong Jos blong Hem oli openem maot blong olgeta long evri taem, blong talemaot gospel blong Hem, wetem saon blong glad (luk long D&C 28:16). … Samtaem, wan toktok blong testemoni nomo i save muvum ol samting insaed long laef blong wan, we bae i lidim hem long taem we i no save finis.”²

I Kamaot long Ol Skripja

Doctrine and Covenants 1:20–23; 18:15; 123:12

I Kamaot long Histri blong Yumi

Stori blong Olga Kovarova blong Tsekoslovakia, bifo, i wan eksampol blong wan memba misinari wok we i kamaot long histri blong yumi long Rilif Sosaeti. Long ol yia 1970, Olga i stadi long dokta pepa blong hem mo i hanggri from wan laef long spirit we i dip moa. Hem i bin luk Otakar Vokuvka, wan Lata-dei Sent we i gat 75 yia. Olga i talem: “Man ia, yu luk se hem i gat seventifaef yia, be hat blong hem i gat eitin yia mo i fulap long glad. Hemia i no hapen oltaem long Tsekoslovakia long taem ia we ol samting i no gud oltaem.”

Olga i bin askem Otakar mo famle blong hem, olsem wanem nao oli bin faenem glad. Oli bin tekem hem i mitim ol narafala memba blong Jos, mo oli givim hem wan Buk blong Momon. Hem i bin ridim gud buk ia, mo afta, hem i kasem baptaes mo konfemesen. Stat long taem ia, Olga i bin wan paoa blong mekem gud long wan wol we politik mo relijin i gat hadtaem. Otakar i bin stap olsem Rilif Sosaeti presiden long smol branj we hem i stap long hem, mo i bin help blong sevem ol sol blong ol narawan taem hem i tekem olgeta oli kam long Kraes.³

Wanem Mi Save Mekem?

Mi mi stap folem ol filing o toktok blong Tabu Spirit taem mi stap serem testemoni blong mi wetem ol sista we mi stap visitim?
Olsem wanem nao mi stap helpem ol sista we mi stap lukaotem blong oli lanem gospel?

© 2013 i kam long Intellectual Reserve, Inc. Oli holem evri raet. Oli printim long Vanuatu. Oli letem long Inglis: 6/12. Oli letem translesen: 6/12. Translesen blong Visiting Teaching Message, January 2013. Bislama. 10661 852