Fas Presidensi Mesej, Jenuware 2013
Voes blong Lod
Doktrin mo Ol Kavenan i invaetem evri pipol long evri ples blong harem voes blong Lod Jisas Kraes (luk long D&C 1:2, 4, 11, 34; 25:16). Insaed long buk ia, i fulap long ol mesej blong Hem, ol woning mo ol strong toktok blong leftemap tingting we Lod i givim tru long revelesen long ol profet we Hem i bin jusum. Long ol revelesen ia, yumi luk olsem wanem God i save ansarem ol prea blong yumi blong fet, wetem ol mesej we i gat tijing, pis, mo woning.
Long ol prea blong yumi, yumi stap wantem save wanem God i wantem yumi blong mekem; wanem yumi mas mekem blong faenem pis mo hapines long laef ia mo long nekis laef, mo wanem i stap long fored blong yumi. Doktrin mo Ol Kavenan i fulap wetem ol ansa long ol kaen kwestin we ol man olbaot, mo ol profet oli stap askem long prea, wetem wan tingting we i stap daon. Hem i save stap olsem wan gudfala gaed blong tijim yumi olsem wanem blong kasem ol ansa long ol kwestin long saed blong gud laef blong yumi long wol ia, mo long saed blong fasin blong sevem man blong taem we i no save finis.
Ki, hem i blong gat fasin blong putum tingting i stap daon, mo blong gat fet long Lod Jisas Kraes. Oliva Kowdri i bin kasem wan ansa long Lod long saed blong tingting blong hem blong wantem givhan long wok blong transletem Buk blong Momon. Lod i bin talem bakegen long Oliva se sapos hem i no gat fet, hem i no save mekem wan samting; mo from hemia, Oliva i mas askem samting wetem fet. Lod i bin givim komanmen long Oliva blong hem i no pleiplei wetem ol samting long saed blong spirit; mo hem i no mas askem ol samting we i no blong hem i askem (luk long D&C 8:10).
Plante, plante taem insaed long Doktrin mo Ol Kavenan, Lod i askem blong wan i mas gat fet mo fasin blong putum tingting i stap daon bifo Hem i givim help blong Hem. Wan risen blong Hem i mekem olsem, i we ol ansa blong Hem, bae oli no kam folem rod ia we yumi tingting long hem. Mo tu, i no isi oltaem blong yumi akseptem ansa blong Hem.
Histri blong Jos mo ol eksperiens blong ol bubu blong yumi i soemaot gud se hemia i tru. Bigfala bubuman blong mi, Henri Aering, i bin prea strong blong save wanem hem i mas mekem taem hem i bin harem mesej blong gospel we i kambak, we oli stap tijim long yia 1855. Ansa i kam long wan drim.
Hem i bin drim se hem i bin stap sidaon long wan tebol wetem Elda Erastus Sno blong Kworom blong Olgeta Twelef Aposol, mo wetem wan elda, we nem blong hem i Wiliam Braon. Elda Sno i bin stap tijim ol prinsipol blong gospel blong wan aoa finis olsem. Afta, Elda Sno i bin talem, “Long nem blong Jisas Kraes, mi givim oda long yu blong yu kasem baptaes, mo man ia [Elda Braon] bae i baptaesem yu.”1 Famle blong mi i glad tumas se Henri Aering i bin gat fet mo tingting we i stap daon blong Elda Braon i baptaesem hem long haf pas seven long moning, insaed long wan pul blong wota blong ren long Sent Luis, Misuri, YSA.
Ansa blong prea blong hem i no bin kam tru long voes blong Lod we hem i save harem. Hem i kam long wan visen mo drim long naet, semmak olsem i bin hapen wetem Lihae (luk long 1 Nifae 8:2).
Lod i bin tijim yumi se ol ansa oli save kam tu olsem ol filing. Insaed long Doktrin mo Ol Kavenan, Hem i bin tijim Oliva Kowdri se bambae Hem i talemaot insaed long maen mo hat blong yumi, tru long Tabu Spirit, we bambae i kam insaed long yumi mo bambae i stap insaed long hat blong yumi (luk long D&C 8:2).
Mo Hem i bin leftemap tingting blong Oliva mo i bin talemaot long Oliva se Hem i bin givim filing blong pis long maen blong Oliva, mo hemia i wan witnes we i kam long Hem (luk long D&C 6:23).
Buk blong Doktrin mo Ol Kavenan, Jos Histri, mo histri we Henri Aering i bin raetemdaon long misin blong hem afta we hem i bin kasem baptaes, i bin tijim mi se ol ansa, yumi save filim olsem ol woning, mo tu, olsem wan filing blong pis.
Long Epril 1857, Elda Parli P. Prat blong Kworom blong Olgeta Twelef Aposol i bin go long wan konfrens long wan ples we naoia oli singaotem Oklahoma, YSA. Henri Aering i bin raetemdaon se “tingting blong Elda Prat i bin fulap wetem ol tingting blong givap … , from se hem i no save luksave fiuja, o wan rod blong save ronwe.”2 Be Elda Prat i bin go fored nomo long rod blong hem, nomata hem i gat ol filing blong denja, semmak olsem we Profet Josef i bin mekem taem hem i bin go long Katej.
Hem i testemoni blong mi, se oltaem, Lod i ansarem prea blong fet we wan i mekem wetem tingting we i stap daon. Buk blong Doktrin mo Ol Kavenan mo ekperiens blong yumiwan i tijim yumi olsem wanem blong luksave ol ansa ia, mo akseptem olgeta wetem fet, nomata oli givim wan rod blong folem, wan konfemesen blong wan trutok, o wan woning. Mi prea, se oltaem, bae yumi lisin mo luksave voes blong lav blong Lod.
© 2013 i kam long Intellectual Reserve, Inc. Oli holem evri raet. Oli printim long Vanuatu. Oli letem long Inglis: 6/12. Oli letem translesen: 6/12. Translesen blong First Presidency Message, January 2013. Bislama. 10661 852
Yusum Mesej Ia blong Tij
1. Tingting blong ridim tugeta, ol paragraf ia abaot prea we oli stap long mesej ia. Taem yufala i stap rid, askem ol memba blong famle blong lisin gud long olsem wanem nao, God i stap ansa long ol prea. Tingting blong testifae long olsem wanem nao prea hem i impoten.
2. Buk blong Doktrin mo Ol Kavenan i fulap wetem ol ansa blong ol kwestin we ol pipol oli stap askem long prea. Bae i olsem wanem nao sapos oli neva raetemdaon ol ansa blong ol kwestin blong olgeta (ol revelesen)? Leftemap tingting blong famle blong lanem blong luksave mo folem ol toktok blong Spirit. Ating oli save raetemdaon ol tingting blong olgeta long saed blong prea insaed long jenol blong olgeta.