Lamharon
Pagpamati sa mga Paggiya
Isa ka gab-i ang akon bataon pa nga pakaisa nga babayi naglayas sa ila balay, gani dali-dali ko sia nga ginpangita. Samtang nagamaneho sang salakyan, nangamuyo ako nga buligan ako sang Espiritu. Nakahibalo ako nga ang Dios magasabat kag magagiya sa akon, kag gintinguhaan ko nga magpamati sa mga paggiya sang Espiritu. Pero sang wala ako sing may mabatian, nagsugod ako nga mangin desperado kag nagbatyag nga wala ako ginagiyahan sang Espiritu.
Bisan gusto ko nga magpalayo-layo sa pagpangita, nabatyagan ko nga dapat dira lang ako mangita sa lugar malapit sa balay sang akon pakaisa. Gani nagdesisyon ako nga maglibot liwat sa sina nga lugar. Sang pagpundo ko sa interseksyon, nakita ko ang bayhon sang isa ka bataon nga babayi nga nagalakat. Nakita ko ang akon pakaisa!
Sang naggwa ako sa salakyan kag nagdalagan sa iya, narealisar ko nga ang Espiritu gali nagasige na tudlo sa akon paagi sa pagpabatyag sa akon nga dapat ako magpangita sa amo lang nga lugar. Tungod nagapaabot ako nga makabati sang malinong nga tingug, halos ko na mabale-wala ang mga paggiya sang Espiritu. Didto ko nahangpan nga sa madamo nga beses indi kita makabati sang tingug, kundi makabatyag kita sang mga paggiya sa aton mga tagipusuon.
Nagapasalamat gid ako sa paggiya sang Espiritu. Matuod gid nga yara Sia pirme! Pareho sang nasiling sa balaan nga mga kasulatan, “Ang Balaan nga Espiritu mangin inyo dalayon nga kaupod” tan-awa sa D&C 121:46).
Kon takos ukon worthy kita sa paggiya sang Espiritu kag nagapamati kita, sarang kita mangin mga instrumento sa mga kamot sang Dios sa paghimo sang kaayuhan para sa madamo nga mga tawo. Sa dalayon nga pagpakig-upod sang Espiritu, mahibaluan naton ang dalan nga dapat agyan.