Mensahe sang Unang Panguluhan, Enero 2013
Ang Tingug sang Ginuo
Ang Doctrine and Covenants nagaagda sang tanan nga katawhan sa bisan diin sa pagpamati sa tingug sang Ginuong Jesucristo (tan-awa sa D&C 1:2, 4, 11, 34; 25:16). Puno ini sang Iya mga mensahe, mga paandam, kag mga nagapaisog nga mga laygay nga ginhatag paagi sa bugna [revelation] sang pinili nga mga propeta. Sa sining mga bugna makita naton kon paano ang Dios sarang magsabat sang aton mga pangamuyo sang pagtuo paagi sa mga mensahe sang pagtudlo, paghidaet, kag paandam.
Sa aton mga pangamuyo ginahandum naton nga mahibaluan kon ano ang luyag sang Dios nga himuon naton, kon ano ang dapat naton himuon agud makasalapo sang paghidaet kag kalipayan sa sining kabuhi kag sa madason, kag kon ano ang yara sa aton palaabuton. Ang Doctrine and Covenants puno sang mga sabat sa subong nga mga pamangkutanon nga ginapamangkot sang ordinaryo nga mga tawo kag mga propeta sa mapainubuson nga pangamuyo. Sarang ini mangin isa ka importante nga giya sa pagtudlo sa aton kon paano magbaton sang mga sabat sa mga pamangkutanon parte sa aton temporal nga ikaayo kag wala’y katapusan nga kaluwasan.
Ang pagkamapainubuson kag pagtuo sa Ginuong Jesucristo amo ang yabi. Si Oliver Cowdery nagbaton sang sabat gikan sa Ginuo parte sa iya handum nga magbulig sa paglubad [translate] sang Libro ni Mormon: “Panumduma nga kon wala’y pagtuo wala ikaw sang sarang mahimo; gani magpangayo nga may pagtuo. Indi pag-ibalewala ining mga butang; indi magpangayo sinang indi mo dapat pangayuon” (tan-awa sa D&C 8:10).
Sa liwat-liwat sa Doctrine and Covenants, ang Ginuo nagapangayo sang pagtuo kag pagpaubos antes Sia maghatag sang Iya bulig. Isa sini ka rason amo nga ang Iya mga sabat mahimo nga indi mag-abot sa paagi nga ginapaabot naton. Indi man ini sila pirme mahapos batunon.
Ang kasaysayan sang Simbahan kag ang mga inagihan sang aton mga katigulangan nagapakita sining kamatuoran. Ang akon lolo sa tuhod nga si Henry Eyring hugot nga nagpangamuyo agud mahibaluan kon ano ang iya dapat himuon sang iya mabatian ang ginpanumbalik nga ebanghelyo nga ginatudlo sang 1855. Ang sabat nag-abot sa isa ka damgo.
Nagdamgo sia nga upod niya sa lamisa si Elder Erastus Snow sang Korum sang Napulo’g Duha ka mga Apostoles kag isa ka elder nga ginhingadlan William Brown. Si Elder Snow nagtudlo sang mga prinsipyo sang ebanghelyo sa sulod sang halos isa ka oras. Dayon si Elder Snow nagsiling, “Sa ngalan ni Jesucristo ginamanduan ko ikaw nga magpabunyag kag ining tawo [Elder Brown] …magabunyag sa imo.”1 Nagapasalamat ang akon pamilya nga si Henry Eyring may pagtuo kag mapainubuson agud mabunyagan sang 7:30 sang aga sa isa ka linaw sang tubig-ulan sa St. Louis, Missouri, USA, ni Elder Brown.
Ang sabat sa iya pangamuyo wala nag-abot sa isa ka mabatian nga tingug gikan sa Ginuo. Nag-abot ini sa isa ka palanan-awon kag damgo sa kagab-ihon, subong sa natabo kay Lehi (tan-awa sa 1 Nefi 8:2).
Ang Ginuo nagtudlo sa aton nga ang mga sabat sarang man mag-abot bilang mga balatyagon. Sa Doctrine and Covenants, gintudloan Niya si Oliver Cowdery, “Yari karon, ihambal ko sa inyo hunahuna kag sa inyo tagipusuon, paagi sa Balaan nga Espiritu, nga magaabot sa inyo kag magatiner sa inyo tagipusuon” (tan-awa saD&C 8:2).
Kag ginpaisog Niya si Oliver sa sining paagi: “Indi bala nga nagpabatyag ako sang katawhay sa inyo kaisipan parte sining butang? Wala na kamo sing sarang mabaton pa nga mas dako nga saksi kundi gikan sa Dios.” (Tan-awa saD&C 6:23).
Ang Doctrine and Covenants, kasaysayan sang Simbahan, kag ang kasaysayan nga gintipigan ni Henry Eyring sa iya misyon pagkatapos lang gid sang iya bunyag nagtudlo sa akon nga ang mga sabat sarang mabatyagan bilang mga paandam subong man bilang katawhay.
Sang Abril 1857, si Elder Parley P. Pratt sang Korum sang Napulo’g Duha ka mga Apostoles nagtambong sa isa ka komperensya sa ginatawag na sa karon nga Oklahoma, USA. Si Henry Eyring nagsulat nga ang kay Elder Pratt nga “kaisipan napun-an sang madulom nga mga pamensaron … , nga indi makakita sang palaabuton ukon bisan ano nga paagi sang pagpalagyo.” 2 Si Henry nagsulat sang masubo nga balita pagkatapos lang gid sadto parte sa kamatayon sang Apostoles. Si Elder Pratt nagpadayon gid sa iya pagpanglakaton wala’y sapayan sang mga nabatyagan nga peligro, pareho sa ginhimo sang Propetang Joseph sa pagkadto sa Carthage.
Panaksihon ko nga ang Ginuo pirme nagasabat sang mapainubuson nga pangamuyo sang pagtuo. Ang Doctrine and Covenants kag ang aton personal nga eksperiyensya nagatudlo sa aton sa pagkilala sining mga sabat kag sa pagbaton sini nga may pagtuo, bisan ang ini direksyon, pamatuod sang kamatuoran, ukon paandam. Kabay nga pirme gid kita magpamati kag magkilala sang mapinalanggaon nga tingug sang Ginuo.
© 2013 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas.Petsa sang pagtugot sa Ingles: 6/11.Petsa sang pagtugot sa paglubad: 6/11. Paglubad sang First Presidency Message, January 2013. Hiligaynon. 10661 861
Pagtudlo gikan sa Sining Mensahe
1. Binagbinaga ang pagbasa sing dulungan sang mga parapo parte sa pangamuyo sa sining mensahe. Samtang nagabasa kamo, pangabaya ang mga miyembro sang pamilya sa pagpamati sing maayo kon paano ginasabat sang Dios ang mga pangamuyo. Binagbinaga ang pagpanaksihon parte sa importansya sang pangamuyo.
2. Ang Doctrine and Covenants puno sang mga sabat sa mga pamangkutanon nga ginapamangkot sang mga tawo sa pangamuyo. Paano kon ang mga sabat sa ila mga pamangkot (mga bugna) wala gid masulat? Paisoga ang pamilya nga matun-an ang pagkilala kag pagsunod sang mga paggiya sang Espiritu. Pwede nila isulat ang ila mga panghunahuna parte sa pangamuyo sa ila mga journals.