Mensahe sa Visiting Teaching, Enero 2013

Pang-misyonaryo nga buluhaton

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita.Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi. Para sa dugang nga impormasyon, mag-logon sa reliefsociety.lds.org.

Litrato

Selyo sang Relief Society

Pagtuo, Pamilya, Bulig

Ang mga Santos sa Ulihing mga Adlaw ginpadala sa “pagtrabaho sa ubasan [sang Ginuo] para sa kaluwasan sang mga kalag sang tawo” (tan-awa sa D&C 138:56), nga nagalakip sang pang-misyonaryo nga buluhaton. Indi naton kinahanglan ang pormal nga tawag sa misyon para magpaambit sang ebanghelyo. Ginapalibutan kita sang iban nga ang mga kabuhi mahimo pagabugayan sang ebanghelyo, kag samtang nagahanda kita sang aton mga kaugalingon, ang Ginuo magagamit sa aton. Ang mga visiting teachers sarang magbaton sang ila espirituhanon nga mga responsibilidad, kag magbulig sa “pagpahanabo sang imortalidad kag wala’y katapusan nga kabuhi sang tawo” (tan-awa saMoses 1:39).

Sang gin-organisar sang Propetang Joseph Smith ang Relief Society sang 1842, nagsiling sia nga ang mga babayi indi lamang magtatap sang mga imol kundi magluwas man sang mga kalag.¹ Amo man ini gihapon ang aton katuyuan.

“Ang Ginuo … nagatugyan sang panaksihon sang kamatuoran sa ila nga magapaambit sini sa iban,” hambal ni Pangulong Dieter F. Uchtdorf, Ika-duhang Manuglaygay sa Unang Panguluhan. “Labi pa gid, ang Ginuo nagapaabot sa mga miyembro sang Iya Simbahan nga ‘magbukas [sang ila mga baba] sa tanan nga tinion, nga nagapahayag sang [Iya] ebanghelyo upod ang tunog sang pagpangalipay’ (tan-awa sa D&C 28:16). …Kon kaisa ang isa ka pahayag sang panaksihon sarang magpahanabo sang mga butang nga mag-apekto sang kabuhi sang isa ka tawo sa wala’y katapusan.”²

Gikan sa Balaan nga mga Kasulatan

Doctrine and Covenants 1:20–23; 18:15; 123:12

Gikan sa Aton Kasaysayan

Ang sugilanon ni Olga Kovářová sang sadto anay nga Czechoslovakia isa ka halimbawa sang pang-misyonaryo nga buhat sang isa ka miyembro sa aton kasaysayan sang Relief Society. Sang mga tinuig nga 1970, si Olga isa ka estudyante sa pagkadoktor kag nagahandum sing mas madalom nga espirituhanon nga kabuhi. Natalupangdan niya ang 75-anyos nga si Otakar Vojkůvka, isa ka Santos sa Ulihing mga Adlaw. “Sa panulok ko daw sitenta’y singko anyos na sia pero sa iya tagipusuon daw halos dise-otso kag puno sing kalipay,” siling niya.“Indi ini kinaandan sa Czechoslovakia sa amo nga tion sang pagkanegatibo.”

Ginpamangkot ni Olga si Otakar kag ang iya pamilya kon paano nila nasalapuan ang kalipay. Ginpakilala sia nila sa iban pa nga mga miyembro sang Simbahan kag ginhatagan sang Libro ni Mormon. Maukod niya ini nga ginbasa kag wala madugayi ginbunyagan kag ginkumpirmahan. Sugod sadto nga tion si Olga nangin isa ka impluwensya para sa kaayuhan sa isa ka kalibutan sang politikal nga opresyon kag pagpigos sa pagtuluohan. Nag-alagad sia nga pangulo sang Relief Society sa ila gamay nga branch kag nagbulig sa pagluwas sang mga kalag sang iban paagi sa pagdala sa ila kay Cristo.³

Ano ang Sarang Ko Mahimo?

Ginasunod ko bala ang mga paggiya sang Balaan nga Espiritu samtang nagapaambit ako sang akon panaksihon sa mga sisters nga akon ginabisita?
Paano ko bala ginabuligan ang mga sisters nga akon ginabantayan nga magtuon sang ebanghelyo?

© 2013 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas.Petsa sang pagtugot sa Ingles: 6/11.Petsa sang pagtugot sa paglubad: 6/11.Paglubad sang Visiting Teaching Message, January 2013. Hiligaynon. 10661 861