Cov Hluas
Mloog tej Kev Tshoov Siab
Muaj ib hmos kuv tus viv ncaus kwv tij uas tseem yau heev khiav mus lawm, ces kuv txawm maj ceev ceev mus nrhiav nws. Thaum kuv tsav tsheb, kuv thov Vajtswv kom tus Ntsuj Plig pab kuv. Kuv yeej paub hais tias Vajtswv yuav teb thiab coj kuv kev, ces kuv sim ua tib zoo mloog tus Ntsuj Plig tej kev tshoov siab. Tab sis thaum kuv tsis hnov dab tsi li, ces kuv txawm pib tas kev cia siab thiab xav tias tus Ntsuj Plig tsis qhia dab tsi rau kuv li.
Txawm tias kuv xav mus deb mus nrhiav, los ua cas kuv pheej xav tias kuv yuav tsum nyob ze rau ntawm thaj chaw ntawm tus viv ncaus kwv tij lub tsev. Ces kuv txiav txim siab tias tsav tsheb rov qab mus ncig thaj chaw ib zaug ntxiv. Thaum kuv nres ntawm ib txoj kev sib tshuam, kuv txawm pom ib tug duab zoo li ib tug me nyuam ntxhais taug kev. Kuv nrhiav tau kuv tus viv ncaus kwv tij lawm!
Thaum kuv tawm hauv tsheb thiab khiav los mus rau ntawm nws, kuv mam li paub hais tias tus Ntsuj Plig yeej pab coj kuv kev pab qhia rau kuv lub siab kom kuv nyob twj ywm ntawm tib qho chaw qub ntawd. Vim hais tias kuv pheej mloog zoo zoo saib puas hnov lub suab hais lus yau yau xwb, ces kuv twb yuav luag tsis ua raws li tus Ntsuj Plig txoj kev tshoov siab. Thaum ntawd kuv thiaj li to taub hais tias feem ntau peb yuav tsis hnov ib lub suab, tab sis peb yuav hnov hauv peb nruab siab xwb.
Kuv ua tsaug ntau rau tus Ntsuj Plig txoj kev coj. Muaj tseeb tiag nws yeej nyob ze txhua lub sij hawm! Ua li vaj lug kub hais, “Tus Vaj Ntsuj Plig Dawb Huv yuav nrog nraim koj nyob” (D&C 121:46).
Yog hais tias peb ua neeg tsim nyog tau tus Ntsuj Plig txoj kev coj thiab peb ua tib zoo mloog, ces peb yuav ua tau Vajtswv ob txhais tes los ua tau ntau yam zoo pab rau coob tug neeg. Thaum muaj tus Ntsuj Plig nrog nraim peb nyob, ces peb yuav paub hais tias peb yuav tsum mus rau qhov twg.