Thawj Pawg Thawj Tswj Hwm tsab Xov, Ib Hlis Ntuj 2013
Tus Tswv lub Suab
Lus Qhuab Qhia thiab Kev Khi Lus caw txhua tus neeg hauv txhua txhia qhov chaw los mloog tus Tswv Yexus Khetos lub suab (saib D&C 1:2, 4, 11, 34; 25:16). Nov muaj Nws tej lus qhuab qhia, tej lus ceeb toom, thiab tej lus yaum kom ua raws li hais uas tau muab los ntawm kev tshwm sim rau cov yaj saub uas raug xaiv tseg lawm. Nyob hauv tej kev tshwm sim no peb yeej pom tau hais tias Vajtswv teb peb tej lus thov ntawm kev ntseeg nrog tej lus qhuab qhia, kev thaj yeeb, thiab lus ceeb toom.
Hauv peb tej kev thov Vajtswv peb xav paub seb Vajtswv xav kom peb ua dab tsi, peb yuav ua li cas thiaj li nrhiav tau kev thaj yeeb thiab kev zoo siab hauv lub neej no thiab lub neej tom ntej, thiab tias yuav muaj dab tsi rau peb rau yav tom ntej. Lus Qhuab Qhia thiab Kev Khi Lus yeej muaj tej lus teb rau cov neeg dog dig cov lus thov thiab rau cov yaj saub uas txo hwj chim thov Vajtswv. Nov yog ib qho kev coj zoo heev uas qhia peb seb peb yuav ua li cas txais tau tej lus teb rau peb cov lus nug txog kev noj qab nyob zoo ntawm lub cev thiab kev cawm seej uas nyob mus ib txhis.
Kev txo hwj chim thiab muaj kev ntseeg ntawm tus Tswv Yexus Khetos yog tej yam tseem ceeb. Oliver Cowdery tau txais lus teb ntawm tus Tswv uas hais txog nws txoj kev xav pab txhais Phau Ntawv Maumoos: “Nco ntsoov hais tias yog tsis muaj kev ntseeg ces koj ua tsis tau dab tsi li; ces cia thov nrog kev ntseeg. Tsis txhob muab tej no saib tsis rau nqi; tsis txhob thov tej yam uas tsis tsim nyog rau koj thov” (D&C 8:10).
Tus Tswv tau hais ntau zaus hauv Lus Qhuab Qhia thiab Kev Khi Lus, tias yuav tsum muaj kev ntseeg thiab kev txo hwj chim ua ntej tso Nws mam li pab. Vim li no ces lub ntsiab ntawm Nws tej lus teb yuav tsis yog teb raws li peb txoj kev xav tau. Qee lub sij hawm cov lus teb kuj yuav tsis yooj yim rau peb txais thiab.
Lub Koom Txoos tej keeb kwm thiab tej uas tau muaj yav tas los rau peb cov poj koob yawm txwv qhia tau hais tias qhov no muaj tseeb tiag. Kuv yawg koob Henry Eyring tau rau siab thov Vajtswv heev thaum nws tau hnov txog txoj moo zoo uas raug muab txum tim rov qab los thaum xyoo 1855. Cov lus teb tau los rau nws hauv ib qho kev npau suav.
Nws ua npau suav hais tias nws tau zaum ntawm ib lub rooj sab laj nrog Txwj Laug Erastus Snow hauv Pawg Kaum Ob Tug Thwj Tim thiab nrog rau ib tug txwj laug npe hu ua William Brown. Txwj Laug Snow tau qhia txog tej nsiab cai ntawm txoj moo zoo ntev yuav luag li ib teev. Ces Txwj Laug Snow tau hais tias, “Los ntawm Yexus Khetos lub npe kuv txib kom koj mus ua kev cai raus dej thiab tus txiv neej no [Txwj Laug Brown] … yuav muab koj ua kev cai raus dej.”1 Kuv tsev neeg zoo siab heev uas Henry Eyring tau muaj kev ntseeg thiab kev txo hwj chim los ua kev cai raus dej thaum 7:30 sawv ntxov hauv lub pas dej nag hauv St. Louis, Missouri, USA, tus muab nws ua kev cai raus dej yog Txwj Laug Brown.
Cov lus teb nws cov lus thov Vajtswv tsis yog ib lub suab hais lus nrov nrov los ntawm tus Tswv los. Cov lus teb los ntawm ib txog kev ua yog toog thiab kev npau suav hauv hmo ntuj, li uas tau teb rau Lihais (saib 1 Nifais 8:2).
Tus Tswv twb tau qhia rau peb lawm hais tias cov lus teb qee zaum yeej yuav los rau hauv peb tej siab li ib txoj kev xav thiab. Nyob hauv Lus Qhuab Qhia thiab Kev Khi Lus, Nws tau qhia rau Oliver Cowdery tias, “Saib seb, kuv yuav qhia rau koj nyob hauv koj lub siab ntsws, los ntawm tus Vaj Ntsuj Plig Dawb Huv, uas yuav los rau koj thiab yuav nyob rau hauv koj lub siab” (D&C 8:2).
Thiab Nws tau yaum Oliver li no hais tias: “Kuv tsis tau hais lus ua rau koj lub siab kaj txog qhov no los? Koj tseem yuav tau ib qho tim khawv dab tsi uas loj tshaj li qhov uas los ntawm Vajtswv los?” (D&C 6:23).
Lus Qhuab Qhia thiab Kev Khi Lus, lub Koom Txoos zaj keeb kwm, thiab zaj keeb kwm uas Henry Eyring tau sau tseg hais txog nws txoj kev ua tub txib tom qab nws txoj kev ua kev cai raus dej tau qhia rau kuv hais tias tej lus teb yeej yog cov lus ceeb toom thiab kev thaj yeeb tib si.
Thaum lub Plaub Hlis Ntuj 1857, Txwj Laug Parley P. Pratt ntawm Pawg Kaum Ob tug Thwj Tim tau mus koom ib lub rooj sab laj ntawm qhov chaw uas tam sim no yog Oklahoma, Teb Chaws Amelikas. Henry Eyring tau sau tseg hais tias Txwj Laug Pratt “nyuab siab thiab ntshai tias tsam muaj teeb meem dab tsi … , tsis paub txog yav tom ntej los sis yuav ua li cas thiaj li kiav dim li.”2 Henry tau sau txog tej xov xwm uas tu siab kawg txog Thwj Tim uas raug luag muab tua. Txawm hais tias Txwj Laug Pratt muaj ntsis ntshai los nws cia li taug kev mus li lawm thiab, ua ib yam li tus Yaj Saub Yauxej Xamiv tau ua thaum nws mus rau tom Carthage.
Kuv hais lus tim khawv hais tias tus Tswv yeej teb cov lus thov Vajtswv thaum peb txo hwj chim thiab muaj kev ntseeg thov txhua lub sij hawm. Lus Qhuab Qhia thiab Kev Khi Lus thiab tej yam uas tau muaj los rau peb tus kheej qhia rau peb kom ua li cas thiaj li paub txog tej lus teb thiab txais tej lus teb nrog kev ntseeg txawm hais tias yog lus coj kev, lus ua tim khawv txog qhov tseeb, los sis lus ceeb toom. Kuv thov Vajtswv kom txhua lub sij hawm peb yuav mloog thiab paub tus Tswv lub suab hlub.
© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus As Kiv: 6/12. Pub txhais ua lus Hmoob: 6/12. Kev txhais First Presidency Message, January 2013. Hmong. 10661 295
Qhia los ntawm tsab Xov No
1. Xav saib puas tsim nyog nyeem cov nqe lus uas hais txog kev thov Vajtswv hauv zaj lus no ua ke. Thaum koj nyeem, hais kom lawv ua tib zoo mloog saib Vajtswv ua li cas teb tej lus thov Vajtswv. Xav saib puas tsim nyog hais lus tim khawv txog qhov tseem ceeb ntawm kev thov Vajtswv.
2. Hauv Lus Qhuab Qhia thiab Kev Khi Lus muaj cov lus teb tej lus nug uas cov neeg thov Vajtswv txog. Yog hais tias tej lus teb rau lawv cov lus nug (kev tshwm sim) tsis muaj sau tseg ne, yuav zoo li cas? Yaum kom tsev neeg xyaum los paub thiab ua raws li tej kev tshoov siab ntawm tus Ntsuj Plig. Saib lawv puas xav sau tseg rau hauv lawv phau ntawv ceev xwm txheej tias lawv xav li cas txog kev thov Vajtswv.