Cov Mus Saib Xyuas Tom Tsev tsab Xov, Ib Hlis Ntuj 2013.
Cov Tub Txib txoj Hauj Lwm
Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej. Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Cov Neeg Ntseeg hauv Hnub Nyoog Kawg raug txib kom mus “ua hauj lwm hauv [tus Tswv] lub vaj uas yog cawm tib neeg txoj sia” (D&C 138:56), nov kuj suav cov tub txib tej hauj lwm thiab. Peb tsis tas yuav tsum raug hu mus ua tub txib es peb mam li qhia txoj moo zoo. Yeej muaj lwm cov neeg nyob ntawm peb ib ncig uas xav tau tej koob hmoov ntawm txoj moo zoo, thiab yog peb npaj peb tus kheej, ces tus Tswv thiaj yuav siv peb los pab. Cov mus saib xyuas tom tsev yuav ua lawv txoj hauj lwm thiab pab “kom tib neeg txais tau txoj kev tsis txawj tuag thiab txoj sia nyob mus ib txhis.” (Mauxes 1:39).
Thaum tus Yaj Saub Yauxej Xamiv txhim tsa lub Koom Haum Niam Tsev thaum xyoo 1842, nws tau hais tias cov poj niam tsis yog yuav tsum saib xyuas cov neeg pluag xwb tab sis yuav tsum cawm neeg txoj sia thiab.1 Peb lub hom phiaj tseem yog tib lub no.
“Tus Tswv … yuav muab tim khawv txog qhov tseeb rau cov neeg uas yuav qhia tau rau lwm tus neeg,” Thawj Tswj Hwm Dieter F. Uchtdorf, tus Pab Cuam thib Ob hauv Thawj Pawg Thawj Tswj Hwm tau hais. “Ntxiv mus, tus Tswv yeej xav kom cov neeg ntseeg hauv Nws lub Koom Txoos ‘qhib [lawv tej qhov ncauj] txhua lub sij hawm, los tshaj tawm [Nws] txoj moo zoo nrog kev zoo siab’ (D&C 28:16). … Qee zaum ib zag lus tim khawv yuav pab tau ib tug neeg lub neej mus ib txhis.”2
Los ntawm cov Vaj Lug Kub
Los ntawm Peb zaj Keeb Kwm
Olga Kovářová uas yog ib tug neeg uas thaum ub nyob hauv Czechoslovakia teb nws zaj dab neeg yog ib tug yam txwv uas qhia txog cov neeg ntseeg txoj kev ua tub txib nyob hauv peb lub Koom Haum Niam Tsev keeb kwm. Thaum xyoo 1970, Olga yog ib tug tub kawm ntawv qib siab (doctoral) thiab nws kuj au siab nrhiav lub neej ntawm sab ntsuj pliag. Nws pom ib tug neeg muaj 75 xyoos Otakar Vojkůvka, uas yog ib tug Neeg Ntseeg hauv Hnub Nyoog Kawg. “Kuv ntsia nws zoo li nws muaj xya caum tsib xyoos tiam sis hauv nws lub siab yog li kaum yim xyoo xwb thiab nws muaj kev xyiv fab puv npo,” Olga tau hais. “Qhov nov txawv heev vim hais tias hauv Czechoslovakia lub sij hawm ntawd yog ib lub sij hawm tsis muaj kev cia siab li.”
Olga tau nug Otakar thiab nws tsev neeg tias lawv ua li cas thiaj li muaj kev xyiv fab. Lawv tau qhia nws txog lwm cov Neeg Ntseeg ntawm lub Koom Txoos thiab tau muab ib Phau Ntawv Maumoos rau nws. Nws rau siab nyeem phau ntawv heev li thiab tsis ntev tom qab ntawd ces nws tau ua kev cai raus dej thiab tau raug kev pom zoo. Txij li thaum ntawd los ces Olga yeej tau ua qhov zoo los li lawm rau hauv ib ntiaj teb uas raug kev tsim txom ntawm kev coj noj coj ua thiab ntawm kev ntseeg. Nws tau ua ib tug Thawj Tswj Hwm hauv lub Koom Haum Niam Tsev rau nws ceg ntseeg uas muaj neeg tsawg tsawg thiab tau pab cawm neeg txoj sia los ntawm kev coj lawv los cuag Khetos.3
Kuv Yuav Pab Li Cas?
-
Kuv puas ua raws li kev tshoov siab ntawm tus Vaj Ntsuj Plig Dawb Huv thaum kuv hais kuv zaj lus tim khawv rau cov viv ncaus uas kuv mus xyuas?
-
Kuv ua li cas pab cov viv ncaus uas kuv yuav tsum saib xyuas los kawm txoj moo zoo?
© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus As Kiv: 6/12. Pub txhais ua lus Hmoob: 6/12 Kev txhais Visiting Teaching Message, January 2013. Hmong. 10661 295