Mwet Fuhsr
Porongo Pihrihkyuck uh
Sie fong ah kuhsin srihsrihk se luhk el kahinglac liki lohm ah, oruh nga suhlahklahk in som sokol. Ke nga kahsruhsr ke stosah ah, nga pruhe tuh Nguhn in kahsrweyuc. Nga etuh muh God El ac topuk ac kolyuc, ac nga srihke in porongo pihrihkyuck luhn Nguhn uh. Tuhsruhk ke nga tiac kuh in lohng kuhtwena ma, nga muhtwacwacack in puhla muh wacngihn finsrak ac nga puhla muh Nguhn El tiacna pihrihkyuc.
Finne nga luhngse som loes kuhtuh in suk, nga puhla muh nga enenuh in muhta na ke acn ma apkuhran nuh ke lohm sin kuhsin luhk ah. Oruh nga sulaclah in sifilpac kahsruhsr ke acn sac. Ke nga tui ke sie acn ma inkacnek luo uh ohsun ah, nga liye atacn muhtwacn fuhsr se fahsr. Nga konwacack kuhsin se luhk ah!
Ke nga srolah liki stosah ah kahsruhsr nuh yohrohl ah, nga akihlen muh Nguhn El kolyuc na in kahsrweyuc in puhla muh nga enenuh in muhta ke acn sacna. Ke srihpen nga porongo ke sie puhsra srihsrihk, nga apkuhran in pihlesrelah pihrihkyuck luhn Nguhn ah. Na nga kahlwem muh pacl pucspucs kuht ac tiac lohng puhsra se, ac kuht ac puhla srihsrihk ke insiyacsr.
Nga kulohkihn nuh pwacye ke kolyuck luhn Nguhn uh. Pwacye El oasr pacl nuh kwewa! Oacna ke ma suhmuhslah uh fahk muh Nguhn Muhtahl El fah oasr yohrohsr pacl nuh kwewa (liye D&C 121:46).
Kuht fin nwacsnwacs fal nuh ke kolyuck luhn Nguhn uh ac kuht lohacng, kuht kuh in mwe orekma se in poun God in oruh wo nuh sin mwet pucspucs. Ke Nguhn El oasr yohrohsr pacl nuh kwewa uh, kuht ac etuh inkacnek ma kuht enenuh in fahsr kac uh.