Pweng ke Forfor Luti, Jacnweri 2013

Orekma luhn Misineri

Lutlutkihn kuhfa inge ac, ke pacl fal, sramsramkihn yurin tahmtahel ma kowos muhtwacta nuh yohroh an. Orekmakihn kihsen siyuck an in kahsrwe kowos ahkkweye tahmtahel wiyowos an ac in oruh Rilif Sosaiti in ip utuftuf se ke moul lowos sifacna an. Nuh ke kuhtuh pac ma in etuh, som nuh ke reliefsociety.lds.org.

Petsac

Akucl luhn Rilif Sosaiti

Luhlahlfongi, Sucu, Kahsruh

Mwet Luhlahlfongi ke Lwen-sahflah uh enenuh in tuhkuh ke pacl ma fal nuh sin Leum in orekma ke imac Lal ke molwelah luhn nguhnin mwet (liye D&C 138:56), weacng pac orekma luhn misineri. Kuht tiacna enenuh pahng suwohs se nuh ke misin kuht in fahkwelihk wosasuc uh. Mwet sahyac suc moul la uh ac fah ahkinsewowoyeyucklac ke wosasuc uh oasr yohrohsr, ac ke kuht ahkoekuhtlac uh, Leum El ac fah orekmakihn kuht. Mwet forfor luti uh kuh in ahokkuhnlah ma kunaclos in nguhn ac kahsruh in oruh in oasr moul kawihl ac moul ma pahtpaht luhn mwet uh (liye Moses 1:39).

Ke Mwet Pahluh Joseph Smith el akiyac Rilif Sosaiti ke yac 1842, el fahk muh muhtwacn uh ac tiac karihngihn mwet suhkahsruhp muhkwena ac in molwelah pac nguhn.¹ Srackna srihpacsr pa inge.

“Leum … El sang luhlahlfongi ke ma pwacye nuh selos suc ac fahkwelihk nuh sin mwet sahyac,” Prestuhn Dieter F. Uchtdorf el fahk, Mwet in Kahsruh Ahkluo ke Prestuhnsi se Met. Oacyacpac, Leum el enenuh kuht suc wi Alu fohlohkyak Lal uh in ikacslah inwacluhsr pacl nuh kwewa ac fahkwelihk wosasuc Lal uh ke puhsren engan (liye D&C 28:16). … Kuhtuh pacl uh fahk sefanna ke luhlahlfongi kuh in oruh ma in mukwikwi ma ac ekuhllah moul luhn mwet se nwe tok ma pahtpaht.²

Ke Ma Suhmuhslah uh

Liye Doctrine and Covenants 1:20–23; 18:15; 123:12

Ke Sramsram Mahtuh Lasr

Sramsram se kacl Olga Kovářová suc muhta acn se ma met ah pahngpahng Czechoslovakia el sie mwe srihkasrak luhn mempucr suc oruh orekma luhn misineri suc mwet ke sramsram mahtuh luhn Rilif Sosaiti. Ke puhluhn pacl 1970, Olga el sie mwet lutlut ke taktuh suc arulacna ke ahkyohkye moul in nguhn lal. El akihlen Otakar Vojkůvka, sie Mwet Luhlahlfongi ke Lwen-sahflah suc yac 75. “Nuh sihk el luhman yac itngucul limekohsr ke matwacl tuhsruhk ke insiyacl apkuhran nuh ke yac singucul oalkosr ac sesseslah ke engan,” el fahk.“Ma inge arulacna sakihrihk ke acn Czechoslovakia ke pacl sacn ma wacngihn mwet luhlahlfongi sie sin sie.”

Olga el siyuck sel Otakar ac sucu lal lah meac elos oruh in konwacack engan. Elos oruh el in etuh kuhtuh pac mempucr ke Alu uh ac sang nuh sel sie Puk luhn Mormon. El riti ke insacnweacng ac el sa na pacptaislac ac ahkkweyeyucklac. E ke pacl sac Olga el sie mwet suc ahkyohkye ma wo ke facl se ma oasr ma lain ma mwet oruh ke kafucrmacn uh ac ma lain luhlahlfongi kuh alu luhn mwet uh. El kuhlwacnsap ke ma kunen Prestuhn ke Rilif Sosaiti ke pracns srihsrihk se lal ah ac kahsruh in molwelah nguhn luhn mwet sahyac ke el kohlohlos nuh yurin Kraist.³

Meac Nga Kuh In Oruh Uh?

Kuh nga ukwe pihrihkyuck luhn Nguhn Muhtahl ke nga fahkwack luhlahlfongi luhk yurin tahmtahel ma nga muhtwacta yohroh uh?
Nga kahsruh fuhkah tahmtahel ma nga liyacacng uh in etwaclah wosasuc uh?

© 2013 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/12. Ahkkweyeyucklac ke lweng: 6/12. Lwenglah luhn Visiting Teaching Message, January 2013. Kosraean. 10661 868