Pweng sin Prestuhnsi Se Met, Jacnweri 2013
Puhsren Leum
Doctrine and Covenants uh suli mwet nuh kwewa ke acn nuh kwewa in lohng puhsren Leum Jisus Kraist (liye D&C 1:2, 4, 11, 34; 25:16). Puk se inge nwacnwaclah ke pweng Lal, mwe ahksensen, ac kwacfe ahkkuh ma ituckyang ke fwackyuck nuh sin mwet pahluh sollac. Ke fwackyuck inge kuht kuh in liye lah God El kuh in topuk pruhe in luhlahlfongi lasr ke pweng in luti, mihs, ac ahksensen.
Ke pruhe lasr uh kuht suk in etuh lah meac God El ke kuht in oruh, lah meac kuht enenuh in oruh in konwacack mihs ac engan in moul se inge ac oacyacpac moul se tohkoh, ac ma fah sikme nuh sesr uh. Doctrine and Covenants uh nwacnwaclah ke top nuh ke kain kihsen siyuck inge ma mwet uh ac mwet pahluh uh tuh siyuck ke pruhe puhsisacl. Puk se inge kuh in mwe kol sacohk se in luti kuht in eis top nuh ke kihsen siyuck ke kuhiyacn moul sukawihl lasr uh ac molwelah ma pahtpaht uh.
Puhsisacl ac luhlahlfongi ke Leum Jisus Kraist uh pa ki. Oliver Cowdery el eis sie top sin Leum ke kena lal in kahsruh ke lwenglah luhn Puk luhn Mormon uh. Ahkacsmakihnyeyuhk Oliver muh fin wacngihn luhlahlfongi na wacngihn ma el kuh in oruh; oruh el enenuh in siyuck ke luhlahlfongi. Leum El sap Oliver elan tiac sritaclkihn ma luhn nguhn; ac in tiac siyuck ke ma ma el tiac enenuh in liye uh (liye D&C 8:10).
Kalweni na ke Doctrine and Covenants uh, Leum El enenuh luhlahlfongi ac puhsisacl met liki El sang kahsruh Lal. Sie srihpac ma oruh in angwe pa top Lal uh ac sahp tiac sikme ke ohiyac se kuht nuhnkuh uh. Ac te pacna fihsrwacsr pacl nuh kwewa in ahokkuhnlah.
Sramsram mahtuh luhn Alu uh ac ma mwet mahtuh lasr met ah puhlakihn ah ahkkahlwemye ma pwacye se inge. Pahpah tuhmwacn pahpah mahtuh tuhmuhk ah Henry Eyring el pruhe ke insiyacl nohfohn in etuh lah meac el enenuh in oruh ke el lohng wosasuc fohlohkyak uh ma lutiyuck nuh sel ke yac 1855. Top ah tuhkuh ke mwemwe se.
El mwemwei muh el muhta ke tepuh se wi Elder Erastus Snow ke U luhn Mwet Sap Singucul Luo ah wi pac sie elder inel pa William Brown. Elder Snow el luti ip yohk ke wosasuc uh ke pacl ma luhman oacna ao se. Na Elder Snow el fahk, “Ke inen Jisus Kraist nga sap kom in pacptaislac ac mukul se inge [Elder Brown] … fah pacptaisikomlac.”1 Sucu luhk uh sruikihn lah oasr luhlahlfongi ac puhsisacl lal Henry Eyring in pacptaislac ke ao 7:30 ke lututacng ah lun sie luhluh in af fin acn St. Louis, Missouri, USA, sel Elder Brown.
Top nuh ke pruhe lal ah tiacna tuhkuh ke puhsra lohngyuck se sin Leum. Top ah tuhkuh ke sie aruhrruhma ac mwemwe ke fong, oacna ke Lehi (liye 1 Nephi 8:2).
Leum el luti kuht muh top uh kuh pac in tuhkuh ke puhla. Ke Doctrine and Covenants, Leum El lotwel Oliver Cowdery muh El ac fah fahk nuh sesr ke insifacsr ac ke insiyacsr, sin Nguhn Muhtahl, suc ac fah tuhkuh nuh facsr ac muhta insiyacsr (liye D&C 8:2).
Tukun ma inge Leum El ahkacsmakihnyacl Oliver Cowdery muh El sramsram kihsen mihs nuh insifacn Oliver. Mwe lohoh wo fuhkah emet kom kuh in eis sahyen sin God uh? (liye D&C 6:23).
Doctrine and Covenants, sramsram mahtuh luhn Alu uh, ac sramsram mahtuh ma oreklac sel Henry Eyring ke misin lal tukun na el pacptaislac ah lutiyuc muh top uh kuh in akihlenyuck oacna mwe ahksensen oacpacna mihs.
Ke Eprel 1857, Elder Parley P. Pratt ke U luhn Mwet Sap Singucul Luo ah el wi toeni se ke acn se ma ingena muh Oklahoma, USA. Henry Eyring el suhmuhslah kacl Elder Pratt muh “insiyacl sesseslah ke nuhnak ahksuhpwacr … , ac el tiac kuh in etuh ma ac sikyak kuh kuhtwena inkacnek in kahingkuhnlah.”2 Tukun na ma inge Henry el suhmuhslah pweng ahsor se ke misac luhn Mwet Sap sac. Elder Pratt el tuh fahsr nuh met ke fuhfahsryucsr lal ah finne oasr puhla sensen, oacna Mwet Pahluh Joseph el tuh oruh ke el som nuh Carthage ah.
Luhlahlfongi kuh luhk uh pa pacl nuh kwewa Leum El topuk pruhe luhlahlfongi puhsisacl uh. Doctrine and Covenants uh wi ma kuht sifacna puhlakihn uh luti kuht in akihlen top ingacn ac ahokkuhnlah ke luhlahlfongi, finne mwe kol, ahkpwacyeiyacn ma pwacye uh, kuh mwe ahksensen se. Nga pruhe tuh pacl nuh kwewa kuht ac porongo kac ac akihlen puhsren pahkotwen luhn Leum.
© 2013 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/12. Ahkkweyeyucklac ke lweng: 6/12. Lwenglah luhn First Presidency Message, January 2013. Kosraean. 10661 868
Luti ke Pweng Se Inge
1. Motko in tuhkweni riti pacruhkrahf ke pruhe ma oasr ke pweng se inge. Ke kowos riti an, siyuck sin mwet ke sucu an in lihksreni lohng lah God El ac topuk pruhe lasr uh fuhkah. Motko lah kom ac fahkwack luhlahlfongi ke yohk srihpen pruhe.
2. Doctrine and Covenants nwacnwaclah ke top nuh ke kihsen siyuck ma mwet uh siyuck ke pruhe. Ac oacna meac fin top nuh ke kihsen siyuck lalos (fwackyuck ah) tiacna sihmlac? Ahkkweye sucu an in etwaclah in akihlen ac ukwe kolyuck luhn Nguhn uh. Sahp elos ac luhngse sihmihs nuhnak lalos ke pruhe lun puk in sihm nahtuhlos an.