Lamharon
Pagpaambit sa isa ka Abyan
Isa ka adlaw samtang nagatuon ako para sa akon klase sa seminary, may ara ako sang manami kag maathag nga pamatyagon. Samtang nagabasa ako sang leksyon para sa madason nga adlaw, nakita ko ang nawong sang isa ka abyan gikan sa eskwelahan kag may mabaskog nga nabatyagan nga dapat ko ipaambit ang akon panaksihon sa iya.
Bisan pa nga tama kaathag sining pamatyagon, nahadlok ako. Nabalaka ako nga basi sikwayon ako sang akon abyan, labi na gid kay daw indi sia ang tipo sang babayi nga mangin interesado sa pagbuylog sa Simbahan.
Ginpanumdom ko ang isa ka pamulong-pulong ni Sister Mary N. Cook sang general presidency sang Young Women kon sa diin ginhangkat niya kita nga magpisan kag mangin maisog.1 Gusto ko mangin pareho sini, gani ginsulatan ko ining babayi kag nagsaksi sang kamatuoran sang Simbahan kag sang akon pagpalangga sa Libro ni Mormon. Pagkabwas ginsuok ko ang isa ka kopya sang Libro ni Mormon, upod ang akon sulat, sa iya bag.
Sa kakibot ko, ang akon abyan bukas kaayo sa pagpamati sa ebanghelyo. Sugod sadto nga adlaw, ginasugiran niya ako kon ano ang iya natun-an sa iya pagtuon sa Libro ni Mormon. Pila ka semana ang nagligad, ginpakilala ko sia sa mga misyonero. Halos insigida, nakabaton sia sang kompirmasyon gikan sa Balaan nga Espiritu nga ang iya ginatun-an matuod. Ako kag ang mga misyonero naghibi samtang ginasugid niya sa amon ang iya mga nabatyagan. Wala madugayi ang akon abyan ginbunyagan, kag ang iya mga ginikanan natingala gid sa mga pagbag-o nga natabo sa iya.
Nalipay gid ako nga nalampuwasan ko ang akon mga kahadlok kag nakabulig ako dala sang ebanghelyo sa iya kabuhi.