Mensahe sang Unang Panguluhan, Pebrero 2013
Isa ka Laygay para sa Nagaalang-alang nga Misyonero
Ang mga disipulo ni Jesucristo may responsibilidad nga dalhon ang Iya ebanghelyo sa kalibutan (tan-awa sa Marcos 16:15–16). Pero, kon kaisa mabudlay ang magbukas sang aton mga baba kag maghambal parte sa aton pagtuo sa ila nga yara sa aton palibot. Bisan may pila ka miyembro sang Simbahan nga may natural nga abilidad nga makig-istorya sa iban parte sa relihiyon, may iban nga daw nagaalang-alang ukon basi natahap, nahuya, ukon nahadlok sa paghimo sini.
Bangud sina, luyag ko magrekomendar sang apat ka mga butang nga sarang himuon sang bisan sin-o agud sundon ang sugo sang Manluluwas nga iwali ang ebanghelyo sa “tanan nga tinuga” (D&C 58:64).
Mangin isa ka Iwag
Isa ko ka paborito nga hulubaton [saying] nga masami ginapatungod kay St. Francis sang Asisi ang mabasa, “Iwali ang ebanghelyo sa tanan nga tinion kag kon kinahanglan, maggamit sang mga tinaga.”1 Ginapahangop sa sini nga hulubaton nga sa masami ang pinakamabaskog nga wali wala ginahambal.
Kon kita may integridad kag nagakabuhi suno sa aton mga sulukdan [standards], makatalupangod gid ang mga tawo. Kon puno kita sing kasadya kag kalipay, mas matalupangdan pa gid nila.
Ang tanan gusto nga mangin malipayon. Kon kita nga mga miyembro sang Simbahan nagaiwag sang kasanag sang ebanghelyo, ang mga tawo makakita sang aton kalipay kag mabatyagan ang pagpalangga sang Dios nga nagapuno kag nagapalanglapaw sa aton mga kabuhi. Luyag nila mahibaloan kon ngaa. Luyag nila mahibaloan ang aton sekreto.
Nagatulod ini sa ila sa pagpamangkot pareho sang “Ngaa kamalipayon gid sa imo?” ukon “Ngaa daw pirme lang ka positibo sa imo?” Ang mga sabat sa sining mga pamangkot, siyempre, nagapadulong sa isa ka paghinambalanay parte sa ginpanumbalik nga ebanghelyo ni Jesucristo.
Mangin Maistoryahon
Ang pagbukas sang paghinambalanay parte sa relihiyon—labi na sa aton mga abyan kag mga mahal sa kabuhi—mahimo nga makakululba kag mabudlay. Indi dapat mangin amo sini. Ang pagmitlang sang espirituhanon nga mga eksperiyensya ukon pag-istorya parte sa mga kahiwatan ukon mga hitabo sa Simbahan sa isa ka kaswal nga pag-inistoryahanay puede mangin mahapos kag manami kon maggamit kita sing diutay nga kaisog kag kaalam.
Ang akon asawa, nga si Harriet, isa ka maayo nga halimbawa sini. Sang nagapuyo kami sa Germany, makakita gid ina sia sang paagi nga malakip ang mga topiko parte sa Simbahan sa iya paghinambalanay sa iya mga abyan kag mga kakilala. Halimbawa, kon may mamangkot sa iya kon kamusta ang iya nagligad nga semana, mahambal ina sia, “Sang Domingo kanami sang amon eksperiyensya sa amon simbahan! Isa ka 16-ka-tuig nga lamharon nga lalaki naghatag sang matahum nga mensahe sa atubang sang 200 ka tawo sa amon simbahan parte sa pagkabuhi sing matinlo nga kabuhi.” Ukon, “Nahibaluan ko ang parte sa isa ka 90-anyos nga babayi nga naggantsilyo sing masobra 500 ka habol kag ginpanghatag ini sa humanitarian program sang amon Simbahan para ipanagtag sa mga tawo nga nagakinahanglan sa bilog nga kalibutan.”
Sa masami, ang mga tawo nga makabati sini gusto pa gid makahibalo. Nagapamangkot sila. Kag ina nagapadulong sa mga oportunidad sa pag-istorya parte sa ebanghelyo sa isa ka natural, sigurado, di-mapilit nga paagi.
Sugod sang maimbento ang Internet kag social media, mas nangin mahapos karon ang pag-istorya parte sining mga butang sa mas kaswal nga paagi kaysa sang una. Ang kinahanglan lang gid naton amo ang kaisog agud himuon ini.
Mangin Puno sing Bugay
Kasubo nga mahapos kaayo nga mangin palaaway. Pirme ini nagakatabo nga nagapakigbais, nagatamay, kag nagahusgar kita. Kon kita nagapangakig, nagapangaway, ukon nagapanglait sa mga tawo, indi na sila gusto nga makahibalo pa gid parte sa aton. Indi naton mahibaluan kon pila na ka tawo ang nagbiya sa Simbahan ukon wala nagbuylog tungod may isa nga nagbuya sang tinaga nga nakasakit ukon nakasaklaw sa ila.
May sobra na nga kakulang sa pagrespeto sa kalibutan sa karon. Tungod indi mahibaluan kon sin-o ang mga tagsulat sa Internet, mas nangin mahapos ang maghambal sing makasakit ukon makasalaklaw nga mga butang sa Internet. Indi bala dapat nga kita, ang mga nagahandum nga mangin mga disipulo sang aton mapinalanggaon nga si Cristo, may mas mataas, mas maluluy-on nga talaksan? Ang balaan nga mga kasulatan nagatudlo, “Magpamulong kamo sa [gihapon] nga may bugay, nga naunawan sang asin, agud nga makahibalo kamo kon ano ang dapat nga pagsabat ninyo sa tagsatagsa” (Mga Taga-Colosas 4:6).
Nanamian ko mamensar nga ang aton mga pulong mangin maathag pareho sang masanag nga langit kag puno sing bugay. Mahunahuna bala ninyo kon daw mangin ano ang aton mga pamilya, mga ward, mga pungsod, kag bisan gani ang kalibutan kon mahimo naton ining simple nga prinsipyo?
Mangin Puno sing Pagtuo
Kon kaisa labi ang aton pagdayaw ukon pagbasol sa aton kaugalingon kon pagahambalan ang pagbaton sang iban sang ebanghelyo. Importante nga panumdumon nga ang Ginuo wala nagapaabot nga kita ang maghaylo.
Ang pagkahaylo nagakatabo indi paagi sa aton mga pulong kundi paagi sa diosnon nga mga paghikot sang Balaan nga Espiritu. Kon kaisa kinahanglan gid lamang sang isa ka pagsambit sang aton panaksihon ukon sang isa ka eksperiyensya agud sugdan ang pagpahumok sang isa ka tagipusuon ukon pagbukas sang isa ka puwertahan nga sarang maggiya sa iban nga maeksperiyensyahan ang diosnon nga mga kamatuoran paagi sa mga pagpabatyag sang Espiritu.
Si Pangulong Brigham Young (1801–77) nagsiling nga nahibaluan niya nga matuod ang ebanghelyo sang iya “nakita ang isa ka tawo nga wala sing katanlas, ukon talento sa paghambal sa publiko, nga sarang lamang maghambal, ‘Nakahibalo ako, paagi sa gahum sang Balaan nga Espiritu, nga ang Libro ni Mormon matuod, nga si Joseph Smith isa ka Propeta sang Ginuo.’” Si Pangulong Young nagsiling nga sang nabatian niya yadtong mapainubuson nga panaksihon, “Ang Balaan nga Espiritu gikan sa sinang tawo [nag]pasanag sang akon paghangop, kag ang kasanag, himaya, kag imortalidad [nangin] yara sa akon atubang.”2
Mga kauturan, magtuo kamo. Ang Ginuo magapadako sang mga pulong nga inyo ihambal kag magapabaskog sang mga ini. Ang Dios wala nagapangayo sa inyo nga magpanghaylo kundi nga buksan ang inyo mga baba. Ang trabaho sang pagpanghaylo indi inyo—iya ina sang tawo nga nagapamati kag sang Balaan nga Espiritu.
Tagsa ka Miyembro isa ka Misyonero
Mga pinalangga kong kaabyanan, sa karon nga panahon may tuman kadamo nga mga paagi para buksan naton ang aton mga baba kag ipaambit sa iban ang manami nga balita sang ebanghelyo ni Jesucristo. May paagi para sa tanan—bisan sa nagaalang-alang nga misyonero—nga magpasakop sa sining dako nga buluhaton. Sarang kita makakita sang paagi agud magamit ang aton mismo nga mga talento kag mga huyog sa pagsuporta sang dako nga buluhaton sang pagpuno sang kalibutan sang kasanag kag kamatuoran. Sa aton paghimo sini, makit-an naton ang kalipay nga nagaabot sa ila nga matutom kag maisog agud “nga magtindog bilang mga saksi sang Dios sa tanan nga mga tinion” (Mosias 18:9).
© 2013 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/12. Petsa sang pagtugot sa paglubad: 6/12. Paglubad sang First Presidency Message, February 2013. Hiligaynon. 10662 861
Pagtudlo gikan sa Sining Mensahe
Isa ka epektibo nga paagi sa pagtudlo amo ang “pagpaisog sinang inyo ginatudloan sa pagpahamtang … sang mga lalab-uton [goals] nga makabulig sa ila sa pagkabuhi sang prinsipyo nga inyo gintudlo” (Teaching, No Greater Call [1999], 159). Binagbinaga ang pag-agda sinang inyo ginatudloan nga mainampuon nga magpahamtang sang isa ka lalab-uton sa pagpaambit sang ebanghelyo sa isa ukon masobra pa ka mga tawo sini nga bulan. Ang mga ginikanan sarang maghinambalanay sang mga paagi nga makabulig ang mga magagmay pa nga kabataan. Mahimo man ninyo buligan ang mga miyembro sang pamilya sa pagpamensar ukon pagdrama-drama sang mga paagi nga mamitlang ang ebanghelyo sa isa ka regular nga pag-inistoryahanay kag mamensar sang ginapaabot nga mga kahiwatan sa Simbahan nga sa diin mahimo sila mag-imbitar sang isa ka abyan.