Cov Hluas
Faib rau ib tug Phooj Ywg
Muaj ib hnub kuv tab tom kawm vaj lug kub tom tsev kawm ntawv, kuv tau ib txoj kev tshoov siab uas meej kawg nkaus. Kuv tab tom nyeem zaj lus qhia uas yuav qhia hnub tom ntej, ces kuv txawm xav pom ib tug phooj ywg tom tsev kawm ntawv lub ntsej muag thiab tau kev tshoov siab kom kuv yuav tsum hais kuv zaj lus tim khawv rau nws.
Txawm txoj kev tshoov siab ntawd meej ua luaj li los, kuv tseem ntshai. Kuv ntshai tsam kuv tus phooj ywg yuav tso kuv tseg, vim hais tias nws yog ib tug ntxhais uas tej zaum tsis tshuav nyiam koom lub Koom Txoos.
Kuv tau xav txog ib zaj lus uas Muam Mary N. Cook ntawm Koom Haum Ntxhais Hluas tuam pawg thawj tswj hwm hais es yaum kom peb yuav sib zog ua hauj lwm thiab rau siab ntseeg.1 Kuv yeej xav ua li no, ces kuv tau sau ib tsab ntawv rau tus ntxhais hluas no thiab hais lus tim khawv tias lub Koom Txoos muaj tseeb thiab tias kuv nyiam Phau Ntawv Maumoos heev. Hnub tom qab ntawd kuv tau muab ib Phau Ntawv Maumoos, nrog rau kuv tsab ntawd, tso rau hauv nws hnab.
Kuv xav tsis thoob, vim kuv tus phooj ywg qhib siab rau txoj moo zoo. Pib hnub ntawd mus, nws qhia kuv seb nws kawm tau dab tsi thaum nws nyeem Phau Ntawv Maumoos. Ob peb lim piam tom qab ntawd, kuv tau coj nws mus ntsib cov tub txib. Tsis ntev ces, tus Vaj Ntsuj Plig Dawb Huv qhia rau nws paub tias tej uas nws tab tom kawm ntawd muaj tseeb. Kuv thiab ob tug tub txib quaj thaum nws qhia seb nws xav li cas. Ces tsis ntev kuv tus phooj ywg tau ua kev cai raus dej, thiab nws niam txiv xav tsis thoob vim nws tus cwj pwm tau hloov hlo.
Kuv zoo siab vim kuv tau kov yeej kuv tej kev ntshai thiab tau pab coj txoj moo zoo los rau hauv nws lub neej.