2013
Hloov Siab Los Ntseeg tus Tswv
February 2013

Cov Mus Saib Xyuas tom Tsev tsab Xov, Ob Hlis Ntuj 2013

Hloov Siab Los Ntseeg tus Tswv

Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej. Kom tau ntaub ntawv xov xwm ntxiv, cia li txuas rau reliefsociety.lds.org.

Daim Duab
lub cim rau lub Koom Haum Niam Tsev

Kev Ntseeg, Tsev Neeg, Kev Pab

Cov viv ncaus tshiab hauv lub Koom Txoos—kuj hais txog cov Ntxhais Hluas uas tab tom mus hauv lub Koom Haum Niam Tsev, cov viv ncaus uas tab tom rov qab tuaj teev ntuj, thiab cov neeg uas hloov siab los ntseeg tshiab—xav tau cov neeg mus saib xyuas tom tsev kev txhawb pab thiab kev ua phooj ywg. Txwj Laug M. Russell Ballard ntawm Pawg Kaum Ob tug Thwj Tim hais tias, “Qhov uas mej zeej sib koom tes pab yog qhov uas pab cov neeg uas hloov siab los ntseeg nyob tau ruaj khov thiab pab cov mej zeej uas tsis tshua muaj siab ntseeg rov qab muaj siab rau ntseeg. Cia li kawm paub tias lub Koom Haum Niam Tsev … muaj cuab kav rais los mus ua txoj kev ua phooj ywg zoo tshaj plaws uas peb muaj hauv lub Koom Txoos. Ncav tes mus pab cov uas tab tom qhia thiab tab tom rov qab los ntseeg, thiab hlub lawv kom los rau hauv lub Koom Txoos dhau ntawm koj lub koom haum.”1

Ua cov mej zeej hauv lub Koom Haum Niam Tsev, peb muaj cuab kav pab cov mej zeej tshiab kawm txog lub Koom Txoos tej kev cai coj ua, zoo li:

  • Hais ib zaj lus.

  • Hais lus tim khawv.

  • Ua raws li txoj kev cai yoo mov.

  • Them ib feem kaum thiab lwm cov nyiaj pab.

  • Pab ua tej hauj lwm tshawb nrhiav peb tsev neeg zaj keeb kwm.

  • Ua kev cai raus dej thiab kev pom zoo rau lawv cov poj koob yawm txwv uas tau tau tas sim neej lawm.

Txwj Laug Ballard hais tias, “Yuav tsum muaj phooj ywg zoo los pab cov mej zeej tshiab xis nyob thiab zoo siab tuaj rau lub koom txoos.”2 Peb sawv daws, tiam sis cov tseem ceeb tshaj yog cov neeg mus saib xyuas tom tsev, muaj kev lav ris kom yuav tsum ua phooj ywg zoo rau cov mej zeej tshiab los pab lawv “hloov siab los ntseeg tus Tswv” (Amas 23:6).

Los ntawm cov Vaj Lug Kub

2 Nifais 31:19–20; Maulaunais 6:4

Los ntawm Peb zaj Keeb Kwm

Thawj Tswj Hwm Gordon B. Hinckley (1910–2008), tau hais tias “Vim haj yam muaj neeg coob uas hloov siab los ntseeg, peb yuav tsum sib zog ua hauj lwm txhawb pab lawv thaum lawv tab tom nrhiav kev. Lawv txhua tus xav tau peb yam: ib tug phooj ywg, ib txoj kev lav ris, thiab kev tu zoo zoo ‘los ntawm Vajtswv txoj lus zoo’ (Maulaunais 6:4).”3

Cov mus saib xyuas tom tsev muaj cuab kav pab cov uas lawv saib xyuas. Feem ntau yuav xub muaj ib tug phooj ywg, ib yam li ib tug poj niam hluas hauv lub Koom Haum Niam Tsev ua thaum nws ua ib tug neeg mus saib xyuas tom tsev rau ib tug pog laus. Nkawd tsis tshua ua phooj ua ywg mus txog thaum nkawd ua hauj lwm ua ke pab tu tsev. Nkawd txawm ua phooj ywg, thiab thaum nkawd sib tham txog cov Mus Xyuas tom Tsev tsab Xov, nkawd ob leeg tau kev tu zoo zoo los ntawm “Vajtswv txoj lus zoo.”

Thawj Tswj Hwm Joseph Fielding Smith (1876–1972) hais tias lub Koom Haum Niam Tsev “ib qho tseem ceeb rau kev tsa Vajtswv lub nceeg vaj hauv lub ntiaj teb thiab … pab tau cov mej zeej muaj siab ntseeg txais tau txoj sia ntev mus ib txhis nyob hauv peb Leej Txiv lub nceeg vaj.”4

© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/12. Pub txhais ua lus Hmoob: 6/12. Kev txhais Visiting Teaching Message, February 2013. Hmong. 10662 295

Lus Cim

  1. M. Russell Ballard, “Members Are the Key,” Liahona, Cuaj Hli Ntuj 2000, 18.

  2. M. Russell Ballard, Liahona, Cuaj Hli Ntuj 2000, 17.

  3. Gordon B. Hinckley, “Every Convert Is Precious,” Liahona, Ob Hlis Ntuj 1999, 9.

  4. Joseph Fielding Smith, hauv Daughters in My Kingdom: The History and Work of Relief Society (2011), 97.

Kuv Yuav Pab Li Cas?

  1. Kuv puas thov Vajtswv pab kuv tus khub thiab thov kom tus Ntsuj Plig yuav coj wb kev thaum wb mus xyuas wb cov viv ncaus?

  2. Peb ua li cas thaum peb ua hauj lwm pab txhua tus viv ncaus uas peb saib xyuas kom lawv paub tias peb hlub nws tiag tiag li?

Luam