Thawj Pawg Thawj Tswj Hwm tsab Xov, Ob Hlis Ntuj 2013
Ib Lo Lus rau tus Tub Txib uas Ib Nyuag Txaj Muag
Yexus Khetos cov thwj tim ib txwm muaj kev lav ris kom coj Nws txoj moo zoo mus rau lub ntiaj teb (saib Malakaus 16:15–16). Txawm li cas los puam chawj, tej thaum yuav nyuaj rau peb qhib peb qhov ncauj thiab qhia cov neeg ntawm peb ib ncig txog peb txoj kev ntseeg. Ib txhia mej zeej hauv lub Koom Txoos yeej txawj nrog lwm tus neeg tham txog kev teev ntuj, es lwm cov ib nyuag txaj muag los sis tsis paub tham, tsis muaj siab xav, los sis yeej ntshai tham txog tej ntawd.
Yog li ntawd, kuv xav hais plaub yam uas ib tug neeg twg ua tau kom thiaj ua raws li tus Cawm Seej txoj lus txib kom tshaj tawm txoj moo zoo “rau txhua tus neeg” (Q&K 58:64).
Ua ib qho Kaj
Ib zag nkauj uas kuv nyiam heev uas St. Francis hauv Assisi sau hais tias, “Tshaj tawm txoj moo zoo txhua lub caij thiab yog xav tau ces, cia li hais tej lo lus.”1 Txoj kab lus no qhia tseeb hais tias feem ntau zaj lus qhia uas zoo tshaj plaws yog tej yam uas yus tsis hais tsuas ua xwb.
Thaum peb ua siab zoo thiab ua neej nyob raws li peb tej kev cai, tib neeg yeej pom. Thaum peb qhia peb txoj kev xyiv fab thiab kev zoo siab, lawv haj yam pom.
Sawv daws xav muaj kev zoo siab. Thaum peb cov uas yog mej zeej hauv lub Koom Txoos tshaj tawm qhov kaj uas los ntawm txoj moo zoo los, tib neeg yuav pom peb txoj kev zoo siab thiab pom hais tias peb hlub Vajtswv thiab peb lub neej muaj hmoov ntau nplua mias. Lawv yuav xav paub seb yog vim li cas. Lawv xav to taub peb ua li cas.
Ua li ntawd lawv thiaj yuav nug hais tias “Vim li cas koj zoo siab heev?” los sis “Vim li cas koj pheej xav txog tej yam zoo xwb?” Ces, cov lus teb rau cov lus nug zoo li no, yuav pab peb los sib tham txog Yexus Khetos txoj moo zoo uas raug txum tim rov qab los lawm.
Cia Li Sib Tham
Txoj kev pib sib tham txog kev teev ntuj—nrog peb cov phooj ywg thiab cov neeg uas peb hlub—tej thaum yuav txaus ntshai thiab nyuaj nyuaj. Tsis tas yuav muaj li ntawd. Thaum sib tham txog tej yam ntawm sab ntsuj plig los sis txog tej yam hauj lwm los sis tej kev ua ub ua no hauv lub Koom Txoos thaum sib tham pem xwb yeej yooj yim ua yog tias peb ua siab loj thiab txawj xav xwb.
Kuv tus poj niam, Harriet, yog ib tug yam ntxwv zoo txog qhov no. Thaum peb tseem nyob hauv Yelemis teb, thaum nws nrog nws cov phooj ywg thiab neeg uas nws paub sib tham ces nws tau hais me ntsis txog lub Koom Txoos. Piv xam hais tias, thaum ib tug nug seb ob hnub so hauj lwm nws ua li cas, nws mam teb hais tias, “Hnub Caiv no peb muaj ib yam xwm zoo kawg nkaus hauv peb lub koom txoos! Muaj ib tug tub hluas uas muaj 16 xyoos los hais lus qhia txog kev ua neej nyob uas neeg huv rau ntawm 200 leej hauv peb pawg ntseeg.” Los yog, “Kuv hnov txog ib tug pog laus uas muaj 90 xyoo uas xaws ntau tshaj 500 daim pam thiab tau muab rau peb lub Koom Txoos lub koom haum uas pab tib neeg txom nyem yuav xa cov pam ntawd rau neeg uas xav tau kev pab thoob plaws ntiaj teb no.”
Feem ntau mas, cov neeg uas hnov nws hais li ntawd tau xav paub ntxiv txog qhov ntawd. Lawv tau nug tej lus nug. Ua li ntawd lawv thiaj tau lam sib tham txog txoj moo zoo tsis txaj muag li, tsis yog nws tau sim hais lus txog tej no.
Vim muaj qhov Internet thiab tej kev sib txuas lus, niaj hnub no nws haj yam yooj yim sib tham txog tej no. Peb tsuas yuav tsum muaj siab loj ua li ntawd xwb.
Muaj Kev Tshav Ntuj
Tu siab kawg, vim yeej yooj yim heev kom tib neeg muaj kev tsis sib haum xeeb. Feem ntau peb yuav sib cav, saib tsis tau, thiab thuam lwm tus neeg. Thaum peb pib npau taws, hais lus tsis zoo, los sis ua rau lwm tus neeg mob siab, yam kawg uas lawv xav tau yog kom kawm tej yam los ntawm peb. Yeej tsis paub tib neeg coob npaum li cas tau khiav ntawm lub Koom Txoos los sis yeej tsis kam tuaj koom vim muaj ib tug neeg uas tau hais ib yam uas mob lawv siab los sis tub qaug lawv lawm.
Niaj hnub no muaj tej kev phem ntau dhau hauv ntiaj teb no. Vim hais tias hauv Internet yus tsis tas qhia yus lub npe, ces haj yam yooj yim hais tej lus phem phem los sis tsis zoo nyob online. Ces peb cov uas yog tus Khetos cov pab coj yuav tsum coj tej kev cai siab, thiab zoo dua lawm poj? Cov vaj lug kub qhia tias, “Tej lus uas nej hais, nej yuav tsum ua tib zoo hais kom sawv daws xav mloog. Tej uas lwm tus nug nej, nej yuav tsum paub teb” (Kaulauxais 4:6).
Kuv nyiam qhov tswv yim uas hais tias peb cov lus yuav tsum meej npaum li lub ntuj thiab muaj kev tshav ntuj puv npo. Nej sim xav seb peb tej yim neeg, pawg ntseeg, tej teb chaws, thiab peb lub ntiaj teb yuav zoo li cas yog tias peb yuav ua raws li txoj ntsiab cai no xwb?
Muaj Kev Ntseeg Puv Npo
Tej thaum peb lees yuav los sis raug luag liam ntau dhau thaum hais txog qhov uas lwm tus neeg puas kam txais yuav txoj moo zoo. Tseem ceeb heev kom peb nco qab tias tus Tswv tsis xav kom peb yuav ua tus uas kom lawv hloov siab los ntseeg.
Kev hloov siab los ntseeg tsis los dhau ntawm peb cov lus tiam sis dhau ntawm tus Vaj Ntsuj Plig Dawb Huv tej kev tshoov siab. Tej thaum tsuas yog ib kab lus ntawm peb zaj lus tim khawv los sis ib zaj dab neeg uas kom lwm tus neeg ua siab mos siab muag los sis qhib qhov rooj rau lwm tus neeg los kawm paub txog tej kev tseeb vim lawv hnov tus Ntsuj Plig txoj kev tshoov siab.
Thawj Tswj Hwm Brigham Young (1801–77) hais tias nws paub tias txoj moo zoo muaj tseeb thaum nws pom “ib tug txiv neej uas tsis paub hais lus zoo, los sis tsis txawj sawv los hais lus, uas tsuas hais tau tias, ‘Kuv paub, los ntawm tus Vaj Ntsuj Plig Dawb Huv lub hwj chim, tias Phaw Ntawv Maumoos muaj tseeb, tias Yauxej Xamiv yog tus Tswv ib tug Yaj Saub.’” Thawj Tswj Hwm Young hais tias thaum nws hnov zaj lus tim khawv ntawd, “Tus Vaj Ntsuj Plig Dawb Huv uas tawm ntawm tus neeg ntawd tau ua rau kuv to taub zoo, thiab qhov kaj, qhov yeeb koob, thiab kev tsis txawj tuag yeej nyob rau ntawm kuv lawm.”2
Cov kwv tij thiab cov muam, cia li muaj kev ntseeg. Tus Tswv yuav txhawb nqa cov lus uas koj hais thiab yuav ua kom cov lus muaj zog zis. Vajtswv tsis hais kom koj yuav pab lawv hloov siab los ntseeg tiam sis tsuas thov kom koj yuav qhib koj lub qhov ncauj. Txoj hauj lwm pab tib neeg hloov siab los ntseeg tsis yog koj lav ris ua—txoj kev lav ris ntawd yog rau tus neeg uas hnov thiab tus Vaj Ntsuj Plig Dawb Huv.
Txhua tus Mej Zeej yog ib tug Tub Txib
Kuv cov me phooj ywg, niaj hnub no muaj ntau txoj kev rau peb qhib peb lub qhov ncauj thiab faib txoj kev zoo siab uas los ntawm Yexus Khetos txoj moo zoo rau lwm tus neeg. Muaj ib txoj kev rau sawv daws—txawm yog rau tus tub txib uas txaj muag los xij—kom lawv pab khiav txoj hauj lwm zoo no. Peb nrhiav tau kev rau peb siv peb tej kev txawj thiab tej yam uas peb nyiam kom txhawb pab coj qhov tseeb thiab qhov kaj mus rau tag nrho lub ntiaj teb. Thaum peb ua li no, peb yuav tau kev xyiv fab uas los rau cov uas rau siab ntseeg thiab ua siab loj txaus los “sawv ua tim khawv txog Vajtswv hauv txhua lub caij” (Mauxiyas 18:9).
© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/12. Pub txhais ua lus Hmoob: 6/12. Kev txhais First Presidency Message, February 2013. Hmong. 10662 295
Qhia los ntawm tsab Xov No
Ib txoj kev qhia uas zoo yog kom “yaum cov uas nej qhia kom cuab … cov hom phiaj uas yuav pab lawv ua neej nyob raws li txoj ntsiab cai uas koj tau qhia” (Teaching, No Greater Call [1999], 159). Xav seb puas tsim nyog caw cov uas koj qhia kom thov Vajtswv seb yuav cuab hom phiaj li cas kom faib txoj moo zoo rau ib tug los sis ob peb tug neeg hauv lub hlis no. Niam txiv mam li sib tham seb cov me nyuam yaus yuav ua li cas thiaj pab tau. Koj kuj pab tau tsev neeg sib ntaus tswv yim los sis ua txuj seb yuav tham txog txoj moo zoo li cas thaum lawv lam sib tham pem xwb thiab xav txog tej kev ua ub ua no hauv lub Koom Txoos tom ntej no uas lawv caw tau ib tug phooj ywg tuaj koom.