Poraus seni ewe Aewin Presetensi, February 2013
Kapasen Ffön Fan Itan Ekkewe Misineri mi Tipemwaramwar
Noun Jises Kraist kewe chon kuno seni chok nomw tori iei ra wisen afanafana An kapas allim ngeni ewe fonufan (nengeni Mark 16:15–16). Nge ina mwo, fan ekkoch a weires ach sipwe suki awach me kapas usun ach nuku ngeni ekkewe aramas unukuch. Ekkoch chon ewe Mwichefen mi feioch ren ar nipwakochun kapas ngeni aramas usun namanam, ngeni pwan ekkoch ra tipemwaramwar, sau, ika nuokus ar repwe fos.
Ina popun, ai upwe apasa ruanu mettoch aramas meinsin mi tongeni fori ren ar repwe tapwei an ewe Chon Amanau annuk ne afanafana ewe kapas allim ngeni aramas meinisin (nengeni D&C 58:64).
Oupwe eu Saram
Ekkoch kapas ua wesen sani anon St. Francis seni Assisi a apasa, “Afanafana ewe kapas allim non fansoun meinisin me ika mi namwot, kopwe nounou kapas.”1 Wewen ekkei kapas pwe ese wor kapas non ekkewe afanafan mi fakkun amwarar.
Nupwen sia wenechar me manaueni ekkewe annuk, aramas ra kuna. Nupwen sia pwapwa, ra kuna nap seni akkom.
Aramas meinisin mi mochen ar repwe pwapwa. Nupwen kich chon ewe Mwichefen sia asarama saramen ewe kapas allim, aramas mi tongeni kuna ukkukun ach pwapwa me ra mefi an Kot tong aureno o amasoua manauach. Ra mochen sinei pwata. Ra mochen weweiti ach monomon.
Ena a efisi ar kapas eis “Pwata ka wesen pwapwa?” ika “Pwata non fansoun meinisin en mi chok pwapwa?” Ponuen ekkei kapas eis, sia sinei, mi emweni kich ne fos ngenir usun ewe niwinsefaniton ewe kapas allim an Jises Kraist.
Oupwe Fofos
Ren ach sipwe kapas usun namanam—ngeni chiechiach ika aramas sia tongei—a tongeni anuokusitikich. Ese namwot an epwe ina usun. Mi mecheres ach sipwe kapas usun ekkoch fansoun non manauch mi pin ika kapas usun sokkopaten mokutokutun Mwichefen ika sipwe chok tipepochokun me tipachem.
Punuwei, Harriet, i eu nenien appiru won ei mettoch. Nupwen aua nom non Germany, i a kutta ifa usun an epwe wata porausen Mwichefen non an kapas ngeni chianan kewe. Ren awewe, nupwen emon a kapas eis ngeni ifa usun an wik, iwe a apasa, “Non ewe Raninfel fan a fakkun murinno! Emon at a 16-ierin a afanafan mwen 200 aramas non am fan an itenap manauen emon mi nimenimoch.” Ika, “Ua kaeo usun emon fefin a 90-ierin a tete 500 kuss me nifang ngeni an ach Mwichefen we prokramen aninis pwe repwe tinano ekkis meinisin won fonufan ngeni ekkewe ir mi osupwang.”
Fan chommong, ekkewe aramas ra rong ei poraus mi mochen sinei pwan och. Ra kakapas eis. Me ena a atufichi kem am aupwe kapas ngenir usun ewe kaps allim non kinamwe, tipepochokun, me pwetete.
Me ren ewe internet me sokkopaten fon me t.v, mi mecheres ikenai ach sipwe kapas usun ekkei mettoch nap seni me nomw. Mi namwot pwe sipwe tipepochokun ach sipwe fori.
Oupwe Uren Chen
Ese och, mi mecheres an esapw wor tipeufengen. A fis fan chomong ach sia aninifengen, kapas ingau, me esita aramas. Nupwen sia song, namanam tekia, are afeiengaua aramas, resapw mochen kaeo usun ach Mwichefen. Ese tufich ach sipwe sinei fitemon aramas mi tou seni ewe Mwichefen ika rese fiti pokiten emon a emeteki netiper.
Mi wor watte fofforingau won fonufan ikenai. Pokiten ewe internet, mi mecheres an emon epwe kapas mi ngau won internet. Ita kich, noun Kraist kewe chon kuno, epwe wor ach annuk mi tekia o tong ennet. Ekkewe pukfen ra aitikich, “Ami afanafan epwe murinno o apwapwai aramas fansoun meinisin, iwe oupwe pwan sinei ne ponuweni an emon me emon kapas eis.” (Colossae 4:6).
Ua sani ewe ekkiek pwe ach kapas epwe fatafatoch usun nang nupwen ewe akkar a ningeno me uren chen. Ka tongeni ekipwichi napanapan ach kewe famini, wart, fonu, me fonufan ika sia manaueni ei nongonong?
Oupwe Uren Nuku
Fan ekkoch sia ekieki pwe pokiten ach angang chok aramas mi etiwa ika ponuku ewe kapas allim. Mi auchea ach sipwe chechemeni pwe ewe Samon ese anamwota ach sipwe siwini netipen ekkewe aramas.
Siwinin netip ese feito me ren ach kapas nge me ren feiton ewe Ngun mi Fel. Fan ekkoch ren fitu chok kapasen pwarata usun och mettoch a fis ngeni kich netipen aramas epwe pweteteno are epwe sukano eu asam ne emwenir ar repwe mefi ewe ennet me ren ewe Ngun mi Fel.
Preseten Brigham Young (1801–77) a apasa pwe a sinei ewe kapas allim mi ennet nupwen “a kuna emon mwan ese angoch ese kan sinei fos, ese angoch afanafan, nge mi tongeni apasa, ‘Ua sinei, me ren manamanen ewe Ngun mi Fel, pwe ewe Puken Mormon mi ennet, me Joseph Smith I emon Soufosun ewe Samon.’” Preseten Young a apasa nupwen a rong ena kapasen pwarata mi tipetekison, “Ewe Ngun mi Fel a nom ren ena mwan a asarama ai ekiek, me saram, ning, me manau ese much a nom mwei.”2
Pwi me fefinei kana, oupwe nuku. Ewe Samon mi tongeni anapano ekkewe kapas oua apasa me forir pwe repwe pochokun. Kot ese mochen oupwe siwini netipan aramas nge a chok mochen oupwe suki auwemi. Ewe wisen siwini netip esapw ami—ena a nom ren ewe emon a ausening ngeni ewe Ngun mi Fel.
Meinisin Chon Mwichefen Miseneri
Ami kana chienei, ikenai mi wor chommong tufichin suki auwach me esinei ngeni aramas ewe porausen pwapwa usun ewe kapas allimen Jises Kraist. Mi wor an emon me emon tufich—ewe mwo miseneri mi meffen—mi tongeni aninis non ei angang mi napanap. Sia tongeni kuna ifa usun ach sipwe aea ach angoch ne anisi ewe angangen asarama ewe fonufan ren saram me ennet. Non ach fori ena, sipwe kuna ewe pwapwa a tori ekkewe mi nukuchar me tipepochokun ne uta usun emon chon pwaratan Kot non fansoun meinisin. (Mosaia 18:9).
© 2013 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/12. Kapungunon chiakun: 6/12. Chiakun First Presidency Message, February 2013. Chuukese. 10662 901
Afanafan seni Ei Poraus
Eu sokkun napanap mi och om kopwe aea ne aiti aramas ena kopwe pesei ekkewe aramas ka aiti … ar repwe fori kokkotur pwe epwe anisir ne manaueni met ka aani afanafan. (Teaching, No Greater Call [1999], 159). Ekipwichi won om kopwe tungor ngeni ekkewe ka aitir ar repwe iotek me fori ar kokkot ne aporausa ewe kapas allim ren fitemon aramas fan ei maram. Sam me in repwe finata ifa usun semirit mi pwan tongeni aninis. Ka pwan tongeni anisi chon om famini ren ar repwe ekieketa ifa usun ar repwe kapas usun ewe kapas allim me ifa usun ar repwe tungor ngeni emon chiener ne fitir ngeni eu mokutokuten Mwichefen.