Yut
Plis Hilim Hat blong Mi
Long taem blong tingbaot dei blong ded blong brata blong mi, mi bin tingtingbak long laef blong mi stat long taem we hem i ded. Mi no save tingbaot, be mi tingbaot bigfala soa we mi bin filim, be tu, ol blesing we God i bin givim long mi.
Mi neva andastanem olsem wanem nao ol pipol i save talem se ded blong wan we yu lavem i save tekem ol blesing i kam. Mi no save andastanem olsem wanem i posibol blong gat glad mo tangkyu from wan samting we i mekem yu harem nogud tumas from. Be, i bin gat wan naet, we i bin jenisim ful tingting blong mi.
Mi bin wekap long medel blong naet, wetem wan hat we i hevi tumas we mi neva filim olsem. Soa ia i stap mekem mi sotwin. Mi foldaon long ni blong mi, mo krae mo talem wan prea long Papa blong mi long Heven. Ful laef blong mi, oli bin tijim mi long saed blong Atonmen mo ol hiling paoa blong Jisas Kraes we i olsem wan merikel. Naoia, fet blong mi i stap long tes. I tru se mi bilivim? Mi bin askem Papa blong mi we i stap long Heven, plis, yu hilim hat blong mi. Soa ia i bin bigwan tumas blong miwan mi tekem.
Afta, wan filing blong pis, kamfot, mo lav i kavremap ful bodi blong mi. Mi filim olsem se God i bin raonem mi wetem ol han blong Hem, mo i stap protektem mi long bigfala soa we mi bin stap filim. Mi misim brata blong mi yet, be mi save luk samting wetem ol defren ae. I bin gat fulap samting blong mi lanem aot long eksperiens ia.
Mi save se lav mo pis blong Lod i stap ia. Yumi nomo, yumi nidim blong tekem.