Fas Presidensi Mesej, Maj 2013
Yu Gat Pis Yu Stap Kwaet
Wan dei, sam yia i pas, afta we mi lukluk long sam samting long ofis, mi bin filim strong blong go visitim wan olfala wido we i bin wan sikwoman long senta blong lukaotem ol olfala long Sol Lek Siti. Mi draev stret i go long ples ia.
Taem mi go long rum blong hem, mi faenem rum i emti. Mi bin askem wan wokman se hem i stap wea mo hem i poenem mi i go long siting rum. Long ples ia, mi faenem swit wido ia i stap storian wetem sista blong hem mo wan narafala fren. Mifala i bin gat wan gud storian tugeta.
Taem mifala i stap storian i go, wan man i go long doa blong rum blong karem wan tin limonad long wan masin we i stap. Hem i lukluk mi mo talem: “Hey, yu yu Tom Monson.”
Mi ansa: “Yes, mo yu luk olsem Hemingwei.”
Hem i talem se yes, hem i Stiven Hemingwei, boe blong Alfred Yujin Hemingwei, we i bin stap olsem kaonsela blong mi taem mi bin stap bisop plante yia i pas, mo mi stap singaotem hem Jin. Stiven i talem long mi se papa blong hem tu i stap long semfala kea senta ia mo i stap rere blong ded nao. Jin i bin stap singaotem nem blong mi, mo famle i bin wantem blong kasem mi, be oli no save faenem wan telefon namba blong mi.
Mi talem sore kwiktaem mo mi go wetem Stiven, mi go long rum blong foma kaonsela blong mi, mo i gat tu sam narafala pikinini blong hem i stap, be waef blong hem i bin ded sam yia i pas finis. Ol memba blong famle oli bin tekem se taem mi mitim Stiven long siting rum, i olsem wan ansa we i kam long Papa long Heven long bigfala tingting blong hat blong olgeta se bambae mi save luk papa blong olgeta bifo hem i ded, mo long wei ia, ansa long singaot blong hem. Mi bin filim sem samting tu, from se sapos Stiven i no kam long rum ia we mi bin stap storian insaed long hem stret long taem ia, bae mi no save se Jin i stap long senta ia.
Mifala i bin givim wan blesing long hem. Wan spirit blong pis i rul i stap. Mifala i storian, mo afta, mi bin go.
Long nekis moning, wan telefon kol i talemaot long mi se Jin Hemingwei i bin ded—stret 20 minit afta we hem i bin kasem blesing we i kam long boe blong hem mo mi.
Mi talem wan saelen prea blong tangkyu i go long Papa long Heven from paoa blong Hem we i lidim mi, we i mekem se mi go visit long kea senta mo i lidim mi i go long dia fren blong mi, Alfred Yujin Hemingwei.
Mi laekem blong stap tingting se Jin Hemingwei, long naet ia—taem mifala i bin filim Spirit, i bin tekem pat long prea ia wetem tingting we i stap daon, mo i talem wan prishud blesing—olsem we i stap long ol toktok blong hym ia “Master, the Tempest Is Raging (Masta Strong Win I Stap Blo)”:
Stap, O tabu Ridima!
Nomo livim mi, mi stap miwan
Mo wetem glad, bae mi kasem tabu haba ia
Mo spel long sanbij blong hem we i gat pis.
Mi stap lavem hym ia yet, mo testifae se hem i givim kamfot:
Nomata kros blong solwota we i brok olbaot
O ol devel, o man o eni kaen samting moa,
I no gat wota i solemdaon sip ia
We Masta blong wota, graon mo skae i stap long hem.
Evriwan bae i obei long yu:
Yu gat pis, yu stap kwaet.1
Tru long ol wota blong ae we i ron mo ol tes, tru long ol fraet mo harem nogud, tru long hat we i brok mo fasin blong filim yuwan from yu lusum wan we yu lavem, i gat i stap, wan stret save se laef i no gat en. Lod mo Sevya blong yumi, i witnes we i laef, se hemia i olsem. 2Ol toktok blong Hem long ol tabu raeting oli naf finis: “Yufala i no moa faet! Yufala i mas save we mi mi God” (Ol Sam 46:10). Mi testifae long trutok ia.
© 2013 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/12. Oli letem translesen: 6/12. Translesen blong First Presidency Message, March 2013. Bislama. 10663 852
Yusum Mesej Ia blong Tij
Mesej ia i save givim kamfot long olgeta we oli lusum wan we oli lavem o i save givim kamfot long olgeta we oli stap traehad wetem wan tes. Antap long mesej blong Presiden Monson, tingting blong serem wan long ol skripja ia, folem ol nid blong olgeta we yu stap tijim: Job 19:25–26; Fas Korin 15:19–22; Mosaea 24:13–15; Doctrine and Covenants 122:7–9. Sapos yu filim olsem, yu save testifae abaot pis we Sevya i bin givim long yu long ol tes blong yu.