2013
Mekem man i aktiv
Maj 2013

Visiting Tijing Mesej, Maj 2013

Mekem Man I Aktiv

Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yu.Blong kasem moa infomesen, go long reliefsociety.lds.org.

Fet, Famle, Help

Profet blong yumi Tomas S. Monson, i bin leftemap tingting blong yumi blong “go aot blong sevem olgeta we oli nidim help blong yumi, mo leftemap olgeta long wan rod we i hae mo rod ia we i moa gud. … Hemia i wok blong Lod, mo taem yumi stap mekem wok blong Lod, … yumi gat raet blong kasem help blong Lod.”1

Plante yia i pas, LaVin Kol mo ol visiting tijing kompanion blong hem oli bin visitim wan sista we i no stap kam tumas long Jos. Oli bin noknok long doa mo faenem wan yang mama we i werem wan tawel klos blong hem. I luk olsem se hem i sik, be i no longtaem afta, oli faenemaot se problem blong hem, hem i alkol. Ol visiting tija oli bin sidaon, mo toktok wetem yangfala mama ia we i bin stap traehad.

Afta we tufala i aot, tufala i talem: “Hem i wan pikinini blong God. Yumitu gat responsabiliti ia blong helpem hem.” Mekem se tufala i stap go visitim hem plante taem. Evri taem, tufala i bin save luk mo filim se i gat wan gud jenis i hapen. Tufala i askem sista ia blong kam long Rilif Sosaeti. Nomata hem i no bin wantem, hem i bin kam oltaem afta. Afta ol gudfala toktok we oli givim long hem, hem mo hasban blong hem, mo gel blong hem, oli kam long Jos. Hasban i bin filim Tabu Spirit. Hem i talem: “Bae mi mekem wanem we bisop i talem.” Naoia, tufala i aktiv insaed long Jos, mo tufala i bin sil insaed long tempol.2

I Kamaot long Ol Skripja

3 Nifae 18:32; Doctrine and Covenants 84:106; 138:56

I Kamaot long Histri blong Yumi

Blong stap helpem olgeta we oli go longwe blong kambak long gospel blong Jisas Kraes, oltaem i bin pat blong stap olsem wan Lata-Dei Sent mo wan memba blong Rilif Sosaeti. Presiden Brigham Yang (1801–77) i bin talem: “Yumi mas gat lav mo sore long wanwan long yumi, … mo letem olgeta we oli save luk rod oli lidim olgeta we oli blaen kasem taem we oli save luk rod olgetawan.”3

Ilaesa R. Sno, seken Rilif Sosaeti jeneral presiden, i bin glad blong talemaot ol hadwok blong ol sista long Ogden, Yuta, YSA, blong mekem wanwan long olgeta oli kam strong moa. Hem i talem: “Mi save gud se oli givim fulap samting [olsem seves] we oli neva raetemdaon long wan buk.” Be hem i luksave se i gat wan rekod we oli raetem long heven, long saed blong wok blong ol sista taem oli stap go aot long olgeta we hat blong olgeta i go kolkol, nao hem i talem: “Presiden Josef Smit i bin talem se sosaeti ia i bin oganaes blong i sevem ol sol. … Oli stap kipim wan narafala buk we oli raetem abaot fet blong yufala, kaen fasin blong yufala, ol gud wok blong yufala mo ol toktok blong yufala. … I no gat wan samting we i go lus.”4

© 2013 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/12. Oli letem translesen: 6/12. Translesen blong Visiting Teaching Message, March 2013. Bislama. 10663 852

Ol Not

  1. Thomas S. Monson, “The Sacred Call of Service,” Liahona, Mei 2005, 55, 56.

  2. Leta i go long Rilif Sosaeti jeneral presidensi, we i kam long gel blong LaVin Kol.

  3. Brigham Young, insaed long Daughters in My Kingdom: The History and Work of Relief Society (2011), 107.

  4. Eliza R. Snow, insaed long Daughters in My Kingdom, 83.

Wanem Mi Save Mekem?

  1. Mi mi gat tras long miwan blong askem wan lesaktiv sista blong kam long Rilif Sosaeti miting wetem mi?

  2. Ol sista we mi stap lukaot long olgeta, oli filim gud blong askem mi ol kwestin long saed blong gospel?

Printim