Lamharon
Palihog Ayuha ang Akon Tagipusuon
Sa anibersaryo sang pagkamatay sang akon utod nga lalaki, ginbinagbinag ko ang akon kabuhi sumugod sang napatay sia. Nadumduman ko indi lang ang sobra nga kasakit nga akon nabatyagan kundi pati man ang mga bugay nga ginhatag sang Dios sa akon.
Indi ko maintiendihan kon paano ang mga tawo makasiling nga ang kamatayon sang isa ka pinalangga makadala sang mga bugay. Indi ko maintiendihan kon paano ako makaangkon sang kalipay kag kapasalamatan para sa isa ka butang nga naghatag sa akon sing sobra nga kasakit. Pero, may isa ka gab-i nga nagpabag-o sang akon panan-awan sing lubos.
Nakabugtaw ako sa tungang gab-i nga may tuman kabug-at nga balatyagon nga wala ko pa naagyan sang una. Ang kasakit daw nagakuga sa akon. Nagluhod ako kag nagahibubun-ot nga nagpangamuyo sa akon Amay nga Langitnon. Sa bilog ko nga kabuhi natudloan ako parte sa Pagpasag-uli [Atonement] kag sang milagroso nga gahum ni Jesucristo sa pagpang-ayo. Karon ang akon pagtuo ginatilawan. Nagpati gid bala ako? Ginpangabay ko ang akon Amay sa Langit nga palihog ayuhon ang akon tagipusuon. Ang kasakit tuman kabug-at para sa akon nga dalhon sing nagaisahanon.
Dayon isa ka balatyagon sang kalinong, kasulhay, kag pagpalangga ang naglikop sa bilog ko nga lawas. Nabatyagan ko kasubong nga daw ang Dios naghakos sa akon kag nagaprotekta sa akon sa pwerti nga kasakit nga akon ginabatyag. Nahidlaw gihapon ako sa akon utod, pero nagliwat na ang akon napatihan. Madamo kaayo ang sarang ko matun-an gikan sini nga eksperiyensa.
Nakahibalo ako nga ang pagpalangga kag kalinong sang Ginuo yara lang dira para sa aton. Kinahanglan lang naton nga mag-ambit sini.