Mensahe sang Unang Panguluhan, Marso 2013
Maglinong, Magpuas
Isa ka adlaw pila na katuig ang nagligad, pagkatapos ko sang akon mga ulubrahon sa opisina, may mabaskog ako nga pamatyagon nga bisitahan ang isa ka may edad na nga balo nga pasyente sa isa ka sentro sa pag-atipan sang mga tigulang sa Salt Lake City. Nagdiretso ako didto.
Pagsulod ko sa iya kwarto, wala ini sang tawo. Nagpamangkot ako sa isa ka attendant kon diin sia kag gintudlo ako sa salas sang sentro. Didto nakita ko ining manami nga balo nga nagasugilanon sa iya utod nga babayi kag sa isa pa gid ka abyan. Nangin manami ang amon pagsinugilanon.
Sang nagasugilanon kami, isa ka tawo ang nagsulod sa puertahan sang kwarto agud magkuha sang isa ka lata sang softdrink halin sa vending machine. Nagpasiplat sia sa akon kag nagsiling, “Uy, ikaw si Tom Monson.”
“Huo,” sabat ko. “Kag ikaw daw isa ka Hemingway.”
Nagsabat sia nga sia si Stephen Hemingway, bata ni Alfred Eugene Hemingway, nga akon counselor sang isa pa ako ka bishop madamo na nga tinuig ang nagligad kag ginatawag ko nga Gene. Ginsugiran ako ni Stephen nga ang iya tatay ara man sa amo nga lugar kag nagagrabe. Ginasambit ni Gene ang akon ngalan, kag ang iya pamilya luyag nga manawag sa akon pero wala makahibalo sang akon numero sa telepono.
Naglisensya ako gilayon kag nag-upod kay Stephen pakadto sa kwarto sang akon anay counselor , kon sa diin ang iban niya nga kabataan nagatipon man, ang iya asawa napatay na mga pila na katuig ang nagligad. Ang mga miyembro sang pamilya nagkabig sang amon pagkitaay ni Stephen sa salas (sang sentro) bilang sabat sang aton Amay nga Langitnon sa ila daku nga handum nga makita ko ang ila amay antes sia mapatay kag masabat ang iya panawagan. Amo man sini ang akon nabatyagan, kay kon wala si Stephen nagsulod sa kwarto sa amo gid nga tion nga ara ako nagabisita, wala ko kuntani mahibaloan nga si Gene ara man sa sinang lugar.
Ginhatagan namon sia sang blessing. Isa ka balatyagon sang kalinong ang naghari. Nangin manami ang amon pagkilit-anay, pagkatapos naglakat na ako.
Sang madason nga aga may tawag sa telepono nga nagpahibalo nga si Gene Hemingway napatay—20 gid lang ka minutos pagkatapos nga nabaton niya ang blessing gikan sa iya anak kag sa akon.
Malinong ako nga nagpangamuyo sang pagpasalamat sa Amay nga Langitnon para sa Iya paggiya, nga nagtulod sa akon nga magbisita sa sentro kag nagtuytoy sa akon sa pinalangga ko nga abyan nga si Alfred Eugene Hemingway.
Luyag ko pinsaron nga ang panghunahuna ni Gene Hemingway sadto nga gab-i—samtang nagkalipay kami sa kasanag sang Espiritu, nag-entra sa mapainubuson nga pagpangamuyo, kag naghatag sang isa ka priesthood blessing—pareho sa mga pulong nga ginsambit sa himno “Master, the Tempest Is Raging”.
Updi ako, Manunubos!
Indi ko pagbayai,
Kag malab-ot ko nga may kalipay
Sa baybay kapahuway.
Nanamian ako sa gihapon sina nga himno kag nagapamatuod sa kaumpawan nga iya sini ginahatag:
Kamadlos sang balod nga dalagku
O yawa o tawo o kon ano pa,
Indi makalugdang sang sakayan
Sang Hari sang tubig, duta kag langit.
Sundon nila imo pagbuot:
Maglinong, Magpuas.1
Sa pihak sang mga luha kag mga pagtilaw, sa pihak sang mga kahadlok kag mga kalisod, sa pihak sang mga kasakit kag kasubo sa pagkadula sang mga pinalangga, may kaseguradohan nga ang kabuhi wala’y katapusan. Ang aton Ginuo kag Manluluwas amo ang buhi nga saksi nga ina matuod.2 Ang iya mga pulong sa balaan nga mga kasulatan bastante: “Magpahimuyong, kag kilalaha nga ako amo ang Dios” (Psalm 46:10). Nagapamatuod ako sa sining kamatuoran.
© 2013 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas.Petsa sang pagtugot sa Ingles: 6/12. Petsa sang pagtugot sa paglubad: 6/12. Paglubad sang First Presidency Message, March 2013. Hiligaynon. 10663 861
Pagtudlo gikan sa Sining Mensahe
Ining mensahe makabulig pasulhay sinang mga namatyan ukon sinang mga nagapangatubang sang pagtilaw. Dugang pa sa mensahe ni Pangulong Monson, binagbinaga ang pagpaambit sing isa sa masunod nga balaan nga mga kasulatan, base sa mga panginahanglan sang inyo mga ginatudloan: Job 19:25–26; 1 Mga Taga-Corinto 15:19–22; Mosias 24:13–15; Doctrine and Covenants 122:7–9. Kon luyag ninyo, mahimo kamo magpanaksihon sang kalinong nga ginhatag sa inyo sang Manluluwas sa inyo mga pagtilaw.