Mensahe sa Visiting Teaching, Marso 2013

Pagpabalik

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita.Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi. Para sa dugang nga impormasyon, mag-logon sa reliefsociety.lds.org.

Pagtuo, Pamilya, Bulig

Ang aton propeta, nga si Pangulong Thomas S. Monson, nagpaisog sa aton nga “magdab-ot sa pagluwas sinang mga nagakinahanglan sang aton bulig kag hakwaton sila [pakadto] sa mas mataas nga dalan kag mas maayo nga alagyan. … Ini buluhaton sang Ginuo, kag kon nagaalagad kita sa Ginuo, … nagakabagay kita sa bulig sang Ginuo.¹

Madamo nga tinuig ang nagligad si LaVene Call kag ang iya companion sa visiting teaching nagbisita sa isa ka less-active nga sister. Nagpanuktok sila sa pwertahan kag nakita ang isa ka lamharon nga iloy nga naga-bathrobe. Daw masakiton sia kon tulukon, pero wala madugayi nahibal-an nila nga ang iya problema amo ang pag-inom. Ang mga visiting teachers nagpungko kag nakigsugilanon sa problemado nga bataon nga iloy.

Paghalin nila, nagsiling sila, “Anak sia sang Dios. May responsibilidad kita sa pagbulig sa iya.” Gani nagbisita sila pirme. Sa tagsa ka tion, makita nila kag mabatyagan ang pagbag-o para sa kaayuhan. Ginpangabay nila ang sister nga mag-attend sa Relief Society. Bisan pa nagaalang-alang, nag-attend gid man sia sang ulihi sing tayuyon na. Pagkatapos sang mga pagpaisog, sia kag ang iya bana kag bata nga babayi nagsimba na. Nabatyagan sang bana ang Balaan nga Espiritu. Sia nagsiling, “Himuon ko kon ano ang ginapanugyan sang bishop.” Karon aktibo na sila sa Simbahan kag nahugpong na sa templo.²

Gikan sa Balaan nga mga Kasulatan

3 Nefi 18:32; Doctrine and Covenants 84:106; 138:56

Gikan sa Aton Kasaysayan

Ang pagbulig sa mga nagtalang nga magbalik sa ebanghelyo ni Jesucristo kabahin na halin pa sadto sang pagka-Santo-sa-Ulihing mga Adlaw kag pagkamiyembro sang Relief Society.Si Pangulong Brigham Young (1801–77) nagsiling, “Mangin maluluy-on kita sa isa kag isa,”… kag tugotan ang mga makakita nga maggiya sa mga bulag tubtob nga sila mismo makakita na sang alagyan.”³

Si Eliza R. Snow, ika-duha nga general president sang Relief Society, mapinasalamaton nga nagkilala sang mga paghimulat sang mga sisters sa Ogden, Utah, sa Estados Unidos sang Amerika, nga pabakuron ang isa kag isa. “Nakahibalo gid ako nga daku kaayo ang ginahatag [nga mga pagserbisyo] nga wala [nabantala] sa mga libro,” siling niya. Pero tungod ginakilala niya nga isa ka langitnon nga libro ang ginahuptan parte sa mga hinimuan sang mga sisters samtang sila nagadab-ot sa pagbulig sa sadtong ang mga tagipusuon nagbugnaw, sia nagsiling: “Si Pangulong Joseph Smith nagsiling nga ining katilingban ginpasad agud magluwas sang mga kalag. … Isa pa gid ka libro ang ginahuptan parte sa inyo pagtuo, inyo kaayo, inyo maayong mga buhat, kag mga pulong. … Wala sing [bisan isa nga] madula.”⁴

© 2013 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas.Petsa sang pagtugot sa Ingles: 6/12. Petsa sang pagtugot sa paglubad: 6/12. Paglubad sang Visiting Teaching Message, March 2013. Hiligaynon. 10663 861

Mga Tanda

1. Thomas H. Monson, “The Sacred Call of Service,” Liahona, Mayo 2005, 55, 56.

2. Sulat sa general presidency sang Relief Society gikan sa bata nga babayi ni La Vene Call.

3. Brigham Young, sa Daughters in My Kingdom, 107. The History and Work of Relief Society (2011), 107.

4. Eliza R. Snow, sa Daughters in My Kingdom, 83.

Ano ang Sarang Ko Mahimo?

1. May kaisog bala ako sa paghagad sang isa ka less-active nga sister nga mag-attend sang miting sang Relief Society upod sa akon?

2. Ang mga sisters bala nga akon ginabantayan komportable sa pagpamangkot sa akon parte sa ebanghelyo?