Agtutubo
Agasam Koma ti Pusok
Iti anibersario ti ipapatay ti kabsatko a lalaki, inutobko maipapan iti biagko manipud pay idi ipupusayna. Nalagipko saan laeng ti nakaro saem a nariknak no di ketdi dagiti pay parabur nga inted ti Dios kaniak.
Diak kaano man maawatan no kasano a maibaga dagiti tao a ti ipupusay ti maysa nga ipatpateg ket mabalin a mangisangbay kadagiti bendision. Diak maawatan no kasano a posible a maaddaanak iti rag-o ken panagyaman iti maysa a banag a namagsakit unay iti riknak. Nupay kasta, adda maysa a rabii a namangbalbaliw a namimpinsan iti pannirigak.
Nakariingak iti tengnga ti rabii a nakadagdagsen unay ti pusok. Diak makaanges gapu iti nakaro a sakit. Nagparintumengak ket nagsaibbek a nagkararagak iti Nailangitan nga Amak. Iti unos ti biagko nasuruannak maipapan iti Pannubbot ken iti namilagruan a pangpaimbag a bileg ni Jesucristo. Ita masubsuboken ti pammatik. Pudno kadi a namatiak? Indawatko iti Amak iti Langit nga agasanna koma ti pusok. Nakaro unay ti sakit tapno sagabaek nga agmaymaysa.
Kalpasanna nariknak ti talna, gin-awa, ken ayat a simmallukob iti sibubukel a bagik. Nariknak a kasla inyarakup ti Dios dagiti imana kaniak ken salsalaknibannak manipud iti nakaro a sakit a nariknak. Kailiwko pay laeng ti kabsatko a lalaki, ngem kinabaelak ti kumita iti sabali a mata. Adu pay dagiti masursurok manipud iti daytoy a padas.
Ammok a nakasagana a gun-oden ti ayat ken talna ti Apo. Kasapulantayo laeng ti makiranud.