Mensahe iti Visiting Teaching, Marso 2013

Panagaktibo

Sikakararag nga adalenyo daytoy a material ken, no maitutop, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset ti bukodyo a biag. Para iti ad-adu pay nga impormasion, mapan iti reliefsociety.lds.org.

Pammati , Pamilia , Tulong

Inallukoynatayo ti propetatayo, ni Presidente Thomas S. Monson, a “tumulong a mangispal kadagiti agkasapulan iti tulongtayo ken mangitag-ay kadakuada iti nangatngato ken nasaysayaat a dalan. … Daytoy ti aramid ti Apo, a no addatayo iti panangibaon ti Apo, … maikaritayo iti tulong ti Apo.”¹

Adun a tawen ti napalabas sinarungkaran ni LaVene Call ken ti kompanionna iti visiting teaching ti maysa a saan unay nga aktibo a kabsat a babai. Nagtuktokda iti ridaw ket nakitada ti maysa nga ubing nga ina a nakabata. Kasla masakit daytoy, ngem naammuanda a dagus a problemana ti panagbartekna. Nagtugaw ken kinasarita dagiti visiting teacher ti marigrigatan nga ubing nga ina.

Kalpasan ti ipapanawda, kinunada, “Isu ket anak ti Dios. Adda pagrebbenganta a tumulong kenkuana.” Isu a masansan a simmarungkarda. Tunggal isasarungkarda, makita ken mariknada ti nasayaat a panagbalbaliwna. Kiniddawda iti kabsat a babai a dumar-ay iti Relief Society. Nupay addaan panagkedked, dimmar-ay a masansan iti kamaudiananna. Kalpasan ti panangallukoy, nakimisa isu ken ti asawa ken anakna a babai. Narikna ti asawa a lalaki ti Espiritu Santo. Kinunana, “Aramidek no ania ti isingasing ti bishop.” Itan aktiboda iti Simbaan ken nailantipdan iti templo.²

Manipud kadagiti Nasantuan a Kasuratan

3 Nephi 18:32; Doktrina ken Katulagan 84:106; 138:56

Manipud iti Pakasaritaantayo

Ti panangtulong kadagiti nayaw-awan nga agsubli iti ebanghelio ni Jesucristo ket kanayon a paset ti panagbalin a Santo iti Ud-udina nga Aldaw ken miembro ti Relief Society. Kinuna ni Presidente Brigham Young (1801–77), “Agkikinnaasitayo koma, … ken tarabayen koma dagiti makakita dagiti bulsek agingga a makitada ti dalan para iti bagbagida.”³

Eliza R. Snow, maikadua a sapasap a president ti Relief Society, siyayaman a binigbigna dagiti aramid dagiti kakabsat a babbai iti Ogden, Utah, USA, a mangpapigsa iti tunggal maysa. “Ammok unay nga adu ti naidonar [a serbisio] a di kaano man nakaabot kadagiti libro ti [kasuratan],” kinunana. Ngem ti panangbigbig a naidulin ti nailangitan a kasuratan ti aramid dagiti kakabsat a babbai bayat ti panangtulongda kadagiti limmamiisen ti puspusoda, kinunana: “Kinuna ni Presidente Joseph Smith a nabukel daytoy a gimong tapno mangisalakan kadagiti kararua. … Naidulin ti sabali pay a libro ti pammatiyo, kinaimbagyo, dagiti nasayaat nga aramidyo, ken dagiti balikasyo. … Awan ti napukaw.”⁴

© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus ti Visiting Teaching Message, March 2013. Ilokano. 10663 864

Dagiti Nagadawan

1. Thomas S. Monson, “The Sacred Call of Service,” Liahona, Mayo 2005, 55, 56.

2. Surat iti sapasap a panguluen ti Relief Society manipud iti anak a babai ni LaVene Call.

3. Brigham Young, iti Daughters in My Kingdom: The History and Work of Relief Society (2011), 107.

4. Eliza R. Snow, iti Daughters in My Kingdom, 83.

Ania ti Maaramidko?

1. Agtalekak kadi a mangkiddaw iti saan unay nga aktibo a kabsat a babai tapno makikuyog kaniak a dumar-ay iti miting ti Relief Society?

2. Marikna kadi a komportable dagiti kakabsat a babbai nga ay-aywanak a mangsaludsod kaniak maipapan iti ebanghelio?