Mensahe ti Umuna a Panguluen, Marso 2013
Agulimekka, Agtalnaka
Maysa nga aldaw, kalpasan ti panangasikasok kadagiti trabahok iti opisina, nakariknaak iti napigsa a parikna a mapan sumarungkar iti baket a balo a babai a pasiente iti sentro a pagaywanan kadagiti babbaket ken lallakay iti Salt Lake City. Nagdiretsoak a napan sadiay.
Idi napanak iti siledna, awan isuna sadiay. Dinamagko ti maysa nga attendant no sadino ti yanna ket intudona iti paginanaan a lugar. Idiay a nasarakak daytoy makaay-ayo a balo a babai a makisarsarita iti kabsatna a babai ken sabali pay a gayyem. Naragsak ti saritaanmi a dua.
Bayat ti panagsarsaritami, immasideg ti maysa a lalaki iti ridaw ti siled tapno mangala iti delata a soda iti vending machine. Tinaldiapannak ket kinunana, “Apay, sika kadi ni Tom Monson?”
“Wen,” insungbatko. Ket karuprupam ni Hemingway.”
Imbagana nga isu ni Stephen Hemingway, anak ni Alfred Eugene Hemingway, a nagserbi a mamagbagak idi maysaak pay a bishop adun a tawen ti napalabas ken isu ti aw-awagak iti Gene. Imbaga kaniak ni Stephen nga adda ni tatangna iti dayta met la a pagaywanan ken asidegen a matay. Aw-awagan ni Gene ti naganko, ket tinarigagayan ti pamiliana a makontakdak ngem awan ti masarakanda a numero ti teleponok.
Nagpadispensarak a dagus ken kimmuyogak ken Stephen a napan iti siled ti sigud a mamagbagak, a nagguummongan met dagiti dadduma pay nga annakna, pimmusayen ti asawana adun a tawen ti napalabas. Imbilang dagiti miembro ti pamilia ti pannakakitak ken Stephen iti lugar a paginanaan kas sungbat ti Nailangitan nga Ama iti dakkel a tarigagayda a makitak koma ti amada sakbay a matay ket sungbatanna ti awagna. Nariknak pay a kastoy, gapu ta no saan koma a simrek ni Stephen iti siled a simmarungkarak iti dayta met la kanito, diak koma ammo nga adda ni Gene iti dayta met la a pasdek.
Nangtedkami iti pammendision kenkuana. Nagtalinaed ti espiritu ti talna. Naragsak ti isasarungkarmi, kalpasanna pimmanawakon.
Iti kabigatanna naammuak iti maysa nga awag iti telepono a pimmusayen ni Gene Hemingway —20 minuto laeng kalpasan ti yaawatna iti pammendision manipud iti anakna a lalaki ken kaniak.
Inyebkasko ti naulimek a kararag ti panagyaman iti Nailangitan nga Ama para iti pangtarabay nga impluensiana, a nangguyugoy iti isasarungkarko iti sentro a pagaywanan ken nangiturong kaniak iti patpatgek a gayyemko a ni Alfred Eugene Hemingway.
Kayatko a panunoten a dagiti kapanunotan ni Gene Hemingway iti dayta a rabii—idi mariknami ti Espiritu, nakiraman iti napakumbaba a kararag, ken nangipeksa iti pammendision ti priesthood— ket nangulit kadagiti balikas a nadakamat iti himno a “Master the Tempest Is Raging”:
O Mannubbot, agbatika!
Dinak panawan nga agmaymaysa,
Ket sirarag-o a makasangladakto
Ken iti sang-at makainanaakto.
Paggugustok pay la dayta a himno ket paneknekak a makapaliwliwa daytoy:
Kasano man ti rungsot ti bagyo iti baybay
Demonio man wenno tao wenno ania pay,
Awan danum a mangpalned iti bapor a yan
Ti Apo ti taaw ken daga ken tangatang.
Agtungpalda amin iti pagayatam:
Agulimekka, agtalnaka.1
Iti baet dagiti lua ken pannubok, iti baet dagiti buteng ken ladingit, iti baet dagiti sakit ti nakem ken kinaliday iti pannakapukaw dagiti ipatpateg, adda pammatalged a ti biag ket agnanayon. Ti Apo ken Mangisalakantayo ket isu ti sibibiag a pammaneknek a kasta ngarud.2 Umdasen dagiti balikasna iti nasantuan a kasuratan: “Agtalnakayo, ket ammuenyo a siak ti Dios” (Salmo 46:10). Paneknekak daytoy a kinapudno.
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus ti First Presidency Message, March 2013. Ilokano.10663 864
Panangisuro manipud iti Daytoy a Mensahe
Makaliwliwa daytoy a mensahe kadagitay nakapukawen iti ipatpateg gapu iti patay wenno dagitay agkarkarigatan iti pannubok. Mainayon iti mensahe ni Presidente Monson, mangibinglaykayo iti maysa kadagiti sumaganad a nasantuan a kasuratan, a maibatay kadagiti kasapulan dagiti sursuruanyo:Job 19:25–26; 1 Taga Corinto15:19–22; Mosiah 24:13–15; Doktrina ken Katulagan 122:7–9. No maguyugoy, mabalinyo nga ipaneknek maipapan iti talna nga impaay ti Mangisalakan kadakayo kadagiti pannubokyo.