Jodikdik ro
Jouj Kaenōm̧m̧an Būruō
Ilo raan in mej eo an būratōr eo aō, iaar kejokļo̧kjeņ kōn mour eo aō jen iien eo eaar mej. Ij keememej ejjab wōt metak eo eļap iaar en̄jake ak barāinwōt kōjeram̧m̧an ko Anij eaar litok n̄an eō.
Ijjamin meļeļe ekōjkan an armej maron̄ ba bwe mej an juon eo ejitōnbōro emaron̄ boktok kōjeram̧m̧an ko. Ijjamin meļeļe ekōjkan Aō maron̄ lan̄lōn̄ im kam̧oolol kōn jet men ko me relukkuun m̧wilaļ aer kōmetak eō. Ekar wōr juon bon̄, ijowōke, menin eaar ukōt aolepān erremaanļo̧k eo aō.
Iaar jerkak lukwōn bon̄en eo, kōn juon bōro eo eddotata ijjan̄in kar en̄jake. Metak eo eaar kakkure eō. Iaar bukelōlō im mōtato kōn juon jar n̄an Jemedwōj Ilan̄. Aolepān mour eo aō Iaar ekkatak kōn Pinmuur im kajoor in kāājmour eo ekabwilōn̄lōn̄ an Jisōs Kraist. Kiiō tōmak eo aō em̧ōj mālijjon̄ e. Ij ke lukkuun tōmak? Iaar kajjitōk ippān Jema ilo Lan̄ n̄an jouj im kaenōm̧m̧an būruō. Metak eo elukkuun ļap n̄an aō make jelm̧ae.
Innām juon en̄jake an aenōm̧m̧an, inem̧m̧an, im iakwe eaar itok ioon aolepān ānbwinū. Iaar en̄jake āinwōt an Anij kar jiburlep eō im kōjparok eō jen metak eo iaar en̄jake. Ij būrom̧ōj wōt kōn būratōr eo aō, bōtaab iaar maron̄ lo kōn māj ko reoktak. Elukkuun lōn̄ men ko n̄an aō ekkatak jen en̄jake in.
Ijeļā bwe iakwe im aenōm̧m̧an eo an Irooj repeļļo̧k. Jej aikuj wōt n̄an bōk m̧ōttan.