Ennaan eo an Būreejtōnji eo Kein Kajuon, M̧aaj 2013
Aenōm̧m̧an, Kwōn Jab M̧akūtkūt
Juōn raan jet iiō remootļo̧k, ālkin aō kadedeļo̧k jerbal ko ilo opiij eo, iaar en̄jake juon im̧we ekajoor n̄an loļo̧k juōn rūtto eo emej pāleen eo ekar juōn rinan̄inmej ilo m̧ōn rinan̄inmej an wōļeij ilo Salt Lake City. Ikar kattōr im kajipadekļo̧k ijeņ.
Ke Iaar etaļ n̄an ruum̧ eo an, iaar lo bwe ejjeļo̧k armej ie. Iaar kajjitōk ippān juon rijerbal ia eo emaron̄ pād ie im kar tōl ļo̧k n̄an ruum̧ in kōttar eo. Ijo Iaar lo in emej pāleen em̧m̧an ej bwebwenato ippān jejtōr eo an im juon mōttan. Eaar juon iien bwebwenato eo em̧m̧an am ippān doon.
Ilo am kar kōnono, juon em̧m̧aan ekar itok n̄an kōjem eo n̄an bōk juōn kāān in kola jen mijiin in kadiwōj eo. Eaar reitok n̄an eō im ba,“Etke, kwe Tom Monson.”
“Aaet,” Iaar uwaak. “Im kwe āinwōt Hemingway.”
Ekar kwaļo̧k bwe e Stephen Hemingway, ļaddik eo nejin Eugene Hemingway, eo ekar jerbal āinwōt aō rikakpilōklōk ke iaar juōn bisop elōn̄ iiō remootļo̧k im eo iaar kūri Gene. Stephen ekar jiron̄ eō bwe jemān epād ejja ijo wōt im enan̄in mej. Gene ekar pukpukōt eta, im baam̧le eo raar kōņaan tōpar eō bōtaab kar jab maron̄ lo taļboon nōmba eo aō.
Iaar m̧ōkaj in joļo̧k aō bōd im wanlōn̄ļo̧k ippān Stephen n̄an ruum̧ eo an rikakpilōklōk eo kar aō, ijo ajri ro jet nejin rekar barāinwōt kuk ippān doon ie, kōrā eo pāleen emej jet iiō m̧oktaļo̧k. Ro uwaan baam̧le eo raar kam̧oolol kōn aō kar iion Stephen ilo ruum̧ in kōttar eo āinwōt juon uwaak jen Jemedwōj Ilan̄ n̄an kōņaan eo aer eļap bwe in maron̄ lo jemāer m̧okta jen an mej im uwaake kūr eo an. Iaar barāinwōt en̄jake bwe en̄in wāween eo, kōnke eļān̄n̄e Stephen eaar jab deļo̧n̄e ruum̧ eo iaar lo̧ļo̧k ilo awa eo wōt me eaar, iban kar jeļā bwe Gene eaar bar pād ijo.
Kōm kar leļo̧k kōjeram̧m̧an n̄an e. Juon jitōbōn aenōm̧m̧an eaar waļo̧k. Juon am loļo̧k eo em̧m̧an, ālkin iaar ilo̧k.
Jibbon̄in eo tok juon ko̧o̧ļ ekar itok im ba bwe Gene Hemingway emōj an jako— 20 wōt minit ālkin an bōk kōjeram̧m̧ōn jen ļaddik eo nejin im n̄a.
Iaar wujlepļo̧k juon jar in kam̧oolol n̄an Jemedwōj Ilan̄ kōn kareel in tōl eo An, eo ekar im̧we aō loļo̧k m̧ōn rinan̄inmej eo im tōļļo̧k eō n̄an eo m̧ōtta ejitōnbōro Alfred Eugene Hemingway.
Ikōņaan kejokļo̧kjeņ bwe kōlmenļokjeņ eo an Gene Hemingway joten eo— ke kōm kar en̄jake jetōb, ekar pād ilo jar ettā, im kōm̧m̧ane kōjeram̧m̧ōn an priesthood —epaņūjņūj ilo naan ko kwaļo̧ki ilo “Master, the Tempest Is Raging”:
Pād wōt, O Ripinmuur ejaram̧m̧an!
Jab bar kōmakeļo̧k n̄a,
Im kōn lan̄lōn̄ inaaj kōm̧m̧ane op eo ejeram̧m̧an
Im ro jet rej pād ioon parijet eo eanōm̧m̧an.
Ij iakwe wōt al eo im kam̧ool āinwōt kōn kaenōm̧m̧an eo ej letok:
Mekarta illu an mwin to mwin tak in lo̧jet
Ak timōn ro ak em̧m̧aan ro ak jabdewōt men,
Dān ko rej jab maron̄ oran̄ļo̧k tima eo ijo ej eppepe ie
M̧aajta eo an lo̧maļo im laļ in im mejatoto ko.
Er otemjej naaj m̧ōņōņō in pokake ankilaam̧:
Aenōm̧m̧an, kwōn jab m̧akūtkūt.1
Kōn dānin kōmjalal im mālijjon̄ ko, kōn mijak im liājļōļ, kōn būrom̧ōj im ajimakeke kōn jako an ro rejitōnbōro, ewōr juon kam̧ool bwe mour ej n̄an indeeo. Ad Irooj im Rilo̧mo̧or rej rikam̧ool ro remour bwe men kein rem̧ool. 2 Naan ko an ilo jeje ko rekwojarjar rem̧m̧an: “Kom̧win pād wōt im jeļā bwe N̄a Anij” (Sam Ko 46:10). Ij kam̧ool n̄an mool in.
© 2013 jen Intellectual Reserve, Inc. Aolep jim̧we ko rej pād ippān. Kar jeje ilo USA. Kōmālim ilo kajin Pālle: 6/12. Kōmālim an ukook: 6/12. Ukook eo an First Presidency Message, March 2013. Marshallese. 10663 874
Katakin jān Ennaan In
Ennaan in emaron̄ kaenōm̧m̧an ro me emōj an mej ro rejitōnbōro ippāer ro rej en̄taan kōn mālijjon̄. Ilo kakobaba n̄an ennaan eo an Būreejrōn Mosmon, ļōmņak n̄an kwaļo̧k eoon kein, pedped wōt ioon aikuj ko an ro kwoj loļo̧k er: Job 19:25–26; 1 Korint 15:19–22; Mosaia 24:13–15; Doctrine and Covenants 122:7–9. Eļan̄n̄e kar im̧we, komaron̄ kam̧ool aenōm̧m̧an eo Rilo̧m̧oor eaar lewōj n̄an eok ilo mālijjon̄ ko am.