Poraus Seni An Fefin Chon Amwa, May 2013
“Oupwe feito Rei”
Seni An kapas me An nenien appiru, Kraist a pwarata ngenikich ifa usun ne arap ngeni I.
Ua kinisou ai nom remi non ei mwichen Ewe Mwichefenin Jises Kraist ren Aramas mi Pin non Fansoun Soponon. Iei An Mwichefen. Sipwe mwarei Itan we nupwen sia tonong non Muun we. I Kot, ewe Chon For, mi unusoch. Sia nom fan nemenien mano me tipis. Nge non An tong ngenikich me ach famini, a tingor sipwe arap ngeni I. A apasa pwe sipwe “mareno Ren me I epwe mareto rech; sipwe kutta I iwe sipwe kuna I; sipwe eis iwe sipwe angei; sipwe fichifich iwe epwe suk ngenikich.”1
Non ei fansoun Easter sia chechemeni pwe sia tongei I me ewe pwon a fori ngeni Noun kewe chon kuno mi tupwon pwe repwe chiechian mi achengicheng. Ewe Chon Amanau a fori ena pwon me a erenikich ifa usun, nupwen sia angang ngeni I, A feito rech. Ew awewe non ew pwarata ngeni Oliver Cowdery nupwen a angang ngeni ewe Samon fiti ewe Soufos Joseph Smith ne chiakuni ewe Puken Mormon. Ewe Samon a ereni Oliver pwe I a kapas ngeni pokiten an Oliver mochen. Oliver epwe aucheani aurouren ewe Samon non netipan. Oliver epwe tupwon ne aucheani ekkewe annukun Kot, iwe mwirin ewe Samon epwe rokopwanieno i non An tong.2
Ua mefi ewe pwapwa ai arap ngeni ewe Chon Amanau me An arapeto rei non fofforun aneasochis ngeni an kewe annuk.
Ami oua fen mefi. Eni epwe atun ami finata pwe oupwe no eti mwichen sakrament. Ua fen mefi non ew Sabbath nupwen ua fokkun kukkun. Non ekkewe ran am aua angei ewe sakrament fansoun nekunion. Ua chechemeni ew ran nap seni 65 ier a no, nupwen ua aneasochisi ewe annuk ne fiti ai famini me ekkewe souneng, a chok anisiei ne arap ngeni ewe Chon Amanau.
A roch me patapat nukun. Ua chechemeni pwe ua pwapwa me pwich me non ewe imwen fan non ena nekunion fiti semei me inei. Am aua angei ewe sakrament, ekkewe Pristut seni Aaron ra wato, am aua pwon ngeni Samach mi Napanap pwe am aupwe chechemeni Noun we me aneasochisi An kewe annuk.
Nesoponon ewe mwich am aua konu ewe kon “Abide with Me; ‘Tis Eventide,” fiti ekkewe kapas non: “O Savior, stay this night with me.”3
Ua mefi an ewe Chon Amanau tong me arapeto non ena nekunion. Me ua mefi ewe kinamwein ewe Ngun mi Fel.
Ua mochen efisi sefani ekkewe memefin ewe tongen ewe Chon Amanau me An arapeto ua fen mefi fansoun ena mwichen sakrament nekukkuni we. Iwe ua aneasochisi pwan ew annuk. Ua kaeo ewe pukfel. Ai anneanir, ua sinei pwe ua tongeni angei ewe Ngun mi Fel epwe amemefi ngeniei met ekkewe chon kunon ewe Samon mi manau ra fen mefi nupwen A ponueni ar tingor pwe epwe no ngeni imwer me nonnom rer.
Ua anneani usun ewe aunungatin ran mwirin An we Irapengesino me peias. Fefin mi tupwon me ekkoch ra fitir ra kuna ewe fau a kunnuno seni ewe peias me Inisin we ese nom ikewe. Ra feito pokiten ar tong ngeni I pwe repwe epiti Inisin.
Ruemon chon nang ra uta me eis pwata ra nuokus, ra apasa:
“Pwata oua kutta ewe emon mi manau nein ekkewe mi mano?
“Ese nom ikei pwe a fen manaueta: chechemeni minne a apasa ngenikemi nupwen a nom non Galilee,
“Repwe afangema ewe Noun aramas ngeni ekkewe chon tipis, iwe repwe irapengesino, nge mwirin unungat ran epwe manaueta.”4
Non Kapas Allimen Mark a sopwei ewe emmwen seni emon ekkewe chon nang: “Oupwe feino o esinei ngeni noun kewe chon kaeo, pwan Peter pwe a akkomono mwemi ngeni Galilee ikewe oupwe kuna i me ie, usun chok a fen apasa ngenikemi.”5
Ekkewe Aposel me chok kuno ra ioifengen non Jerusalem. Usun chok ita repwe fori, ra nuokus me aurek nupwen ra kapas fengen usun wewen an mano me porousen An manaueta ngeni ir.
Ruemon ekkewe chon kuno ra fetan non ena nekunion seni Jerusalem won anen Emmaus. Ewe Kraist mi manueta a pwato non ewe roch won ewe aan me fetan rer. Ewe Samon mi manaueta a fen feito rer.
Ewe puken Luke a mut ngenikich sipwe sipwe nonnom rer non ena nekunion:
“Nupwen ra poporous fengen, nge pwisin Jises a fetan ngenir o a fitir ne feffetan.
“Ra kuna i, nge rese sinneni”
“A apasa ngenir, Met oua porous fengen won, nupwen oua feffetan?
“Emon me neir, itan Cleopas, a eisini, “En chok emon wasona non Jerusalem kose sinei ekkewe mettoch ra fis non ekkei ran?”6
Ra ereni I usun ar netipechou pwe Jises a mano nupwen ra fen apinukunuku pwe I epwe Chon Angasanon Israel.
Eni ewe Samon mi manaueta a kapas non tong nupwen A kapas ngeni ekkei ruomon chon kuno mi netipechou.
“Iwe a apasa ngenir, pwata ina umwesimi, pwata ouse tongeni nuku mettoch meinisin ekkewe soufos ra apasa:
“Met ese namwot an ewe Christ epwe kuna ekkei riaffou o tonong non an ning?
“Iwe Jises a awewei ngenir mettoch meinisin mi makketiw usun pwisin i non ewe Pukepin, seni ekkewe puken Moses tori puken ekkewe soufos meinisin.”7
Iwe a fis ew fansoun a ku netipei nupwen ua emon kukkun at:
“Nupwen ra arap ngeni ewe sop, repwe feino ngeni, ita Jises epwene nu senir.
“Nge ra aueno i, ra ereni, Kopwe nom rem: pun a pwinituk. Iwe a nomeno rer.”8
Non ewe pwinin ewe Chon Amanau a etiwa ewe tingor ne tonong non imwen Noun kewe chon kuno arap ngeni ewe sopun Emmaus.
A mwongo rer. A angei pinewa, efeiochu, kini, me ngenir. Meser a suk me ra esinna I. Iwe A mworeno me mwer. Luke a makkei ngenikich ekkewe memef an ekkei chon kuna: “Ra kapas fengen nefiner, Netipach ese mwokutukut usun chok ew ekkei mi ngetenget nupwen a kapas ngeni kich won ewe aan o a awewei ngenikich ewe pukepin?”9
Non ewe chok awa ruomon chon kuno ra mwitirito seni Jerusalem pwe repwe ereni ekkewe engon me emon Aposel usun met a fis ngenir. Non ena fansoun ewe Chon Amanau a pwato sefan.
A apasa sefanni ekkewe osini usun An misin pwe epwe achasefani tipisin Noun Seman kewe meinisin me mutti ekkewe senin mano.
“Iwa a apasa ngenir, Iei usun a makketiw ewe Christ epwe riaffou o epwe manaueta seni mano murin unungat ran:
“Ewe poraus usun aier me omusomusen tipis repwe aronga fetanei, poputa seni non Jerusalem.
“Ami chon pwarata ekkei mettoch.”10
An ewe Chon Amanau kapas ra chok pwan ennet ngenikich usun ngeni Noun kewe chon kuno. Kich chon pwarata ekkei mettoch. Me ewe amararen wiis sia etiwa nupwen sia papataisinong non Ewe Mwichefenin Jises Kraist ren Aramas mi Pin non Fansoun Soponon a fat ngenikich me ren ewe soufos Alma ipuku ier a no non ekkewe konikin Mormon:
“Iwe non ewe fansoun a apasa ngenir: Nengeni iei ewe chonun Mormon (pokiten ina itan ewe konik), iwe are ami oua mochen pwe oupwe feito non ewe muun Kot, pwe oupwe kokko pwe ami noun, are mochen mwarei fengeni ami kewe netipechou ar repwe pwas;
Ewer, are oua mochen netipeta pokiten ami fiti chon netipeta; ewer, me aururu netipen ekkewe ir mi mochen aurur, iwe, are oupwe utano pwe ami chon pwarata Kot ren mettoch meinisin non fansoun meinisin, me non sakkopaten neni meinisin ami mi nom non, tori mano, pwe oupwe manaueta ren Kot, o anea nein ekkewe repwe fiti ewe aeuin manausefanita pwe oupwe angei ewe manau esemuch—
“Iei ua apasa ngenikemi, pwe are iei usun mochenin netipemi, pwata chok ousap papataisino fan iten ewe Samon, pwe minen pwarata mwen mesan pwe ami oupwene tonong non eu pwon mi fo ngeni pwe oupwene angang ngeni me amochu an kewe annuk meinisin. Pwe epwe tinau Ngunun me an feioch womi?
“Iwe nupwen ekkewe aramas ra rong ekkei kapas, ra episipis pwe ra pwapwa me apasa: Iei wesewesen mochenin netipach.”11
Sia pwon pwe sipwe anisi ekkewe mi osupwang me sipwe chon pwarata usun ewe Chon Amanau nupwen kich mi manau.
Sia chok tongeni fori ei an epwe fisioch nupwen sia mefi ewe tong ngeni ewe Chon Amanau me An tong ngenikich. Nupwen sia tupwon ngeni ekkewe pwon sia fori, sipwe mefi ach tong ngeni I. Epwe anapano pokiten sipwe mefi An manaman me an arap ngenikich non An Angang.
Preseten Thomas S. Monson a soun achema ngenikich usun an ewe Samon pwon ngeni Noun chon kuno: “Pwe ion epwe etiwa Noun chon angang I epwe pwan nom ikewe, pun I a ammonata ewe aan. I epwe nom won peniemwanir me peniefefinir, iwe Ngunun epwe nom non netiper, me noun chon nang repwe rokopwanireno, pwe repwe seikireta.12
Mi pwan wor ew aan en me ngang sia fen mefi An arap ngenikich. Nupwen sia awora angang ngeni I, A arap ngeni ekkewe sia tonger non ach famini. Iteiten fansoun ua koko me ren an ewe Samon angang ai upwe no are nikiti ai famini, ua kuna pwe ewe Samon a efeiochu punuwei me nei kewe. A amwonta chon angang mi tong me tufich pwe epwe repwe arap ngeni I.
Oua fen mefi ena pwan chok feioch non manauemi. Chommong me neimi mi wor noumi mi achengicheng ra fen towaweno seni ewe aanen manau esemuch. Oua aureki ika met oupwe fori ne eniwinireto. Oupwe apinukunuk non ewe Samon pwe epwe arap ngenir nupwen oupwe nukuchar ne angang ngeni I.
Oua chechemeni an ewe Samon pwon ngeni Joseph Smith me Sidney Rigdon nupwen ra no seni ar famini won An angang. Ewe Samon a ereni Sidney me Joseph, pwe ar famini mi pochokun; ir mi nom non Poun, me i epwe for ngenir met A ekieki pwe mi och; pun I mi unusen manaman.13
Usun Alma me King Mosaia, ekkoch ami mi tupwon ekkewe oua fen angang ngeni ewe Samon non nangatam me oua angangoch a fen wor noumi ra tawaneno inamo an semer me iner fangeno ngeni ewe Samon. Ra fori met ra tongeni usumi, pwan mwo ren aninis seni aramas mi tong me tupwon.
Alma me ekkewe Souneng ra iotek fan itan noun we me noun King Mosaia kewe. Emon chon nang a feito. Ami iotek me iotekin ekkewe ra aea ar nuku epwe wato noun ewe Samon chon angang pwe repwe anisi chon om famini. Repwe anisir ne finata ewe aanen Kot, pwan nupwen ra sossot me ren Setan me noun kewe, ekkewe ra mochen atai famini non ei manau me feinfeino.
Oua chechemeni ekkewe kapas minne ewe chon nang a apasa ngeni Alma ewe kukkun me noun Mosaia kewe non ar ungeni: “Ewe chon nang a apasa ngeni Alma pwe a feito ren pwe ewe Samon a rongorong an Noun kewe aramas iotek me pwan iotekin Noun we chon angang, seman Alma we. Ewe chon nang a apasa pwe seman Alma we a iotek non nuku pwe Alma epwe angei ewe miritin ennet; iei minne, ewe chon nang a feito pwe epwe pesei Alma usun ewe manaman me mumuta an Kot, pwe an Noun ewe Samon kewe chon angang iotek epwe ponu anongonong won ar nuku.14
Ai pwon ngeni ekkewe oua iotek me angang ngeni ewe Samon esap ita pwe oupwe angei feioch meinisin oua aneanei fan itemi me ami famini. Nge ua tongeni pwon pwe ewe Chon Amanau epwe arap ngenikemi me efeiochukemi me ami famini ren met mi murino. Epwe nom remi kinamwein An tong me mefi An arap ngenikemi nupwen ami eitieu poumi ne anisi ekkoch. Nupwen ka anisi ekkewe ir mi osupwang me awora ewe nimenimochun An we Achasefan ngeni ekkewe netipengaw pokiten tipis, an ewe Samon manaman ewe anisuk. Poun ra keitiu fiti poum pwe kopwe anisi noun Samach won Nang, fiti ekkewe ir non om famini.
Mi wor ew apwapwan wareto a mwoneta fan itach. Sipwe kuna ewe pwon epwe pwonuta an ewe Samon kich mi tongei. I ewe epwe etiwakichenong non manau esemuch Ren me Samach won Nang. Jises Kraist a anapanapa non ei napanap:
“Kutta om kopwe wato me forata An Zion. Aneasochisi an annuk non mettoch meinisin.
“Ika sipwe aneasochisi An kewe annuk me nikitu ngeni soponon, sipwe angei manau esemuch, ina ewe niffang mi nap seni meinisin niffang an Kot.”15
“Ekkewe ir mi manau repwe muuni ewe fonufan, me ekkewe repwe mano repwe asoso seni ar angang, iwe ar angang epwe tapwer; iwe repwe angei ew mwarin king non imwen ewe Sam, minne Jises Kraist a amwonata ngenir.”16
Ua pwarata pwe seni ewe Ngun mi Fel sia tongeni tapweno mwirin an Samach won Nang tingor: “Nei we At mi Achengicheng. Ausening ngeni I!”17
Ren An kapas me an nenien appiru, Kraist a pwar ngenikich ifa usun sipwe arap ngeni I. Meinisin noun Samach won Nang a finata epwe tonong non ewe tittin papatais non An Mwichefen epwe angei tufich ne kaeo An kapas allim me epwe rong seni Noun chon angang an we tingor pwe “Oupwe feito rei.”18
Meinisin noun kewe chon angang ra pwon ngeni I non Muun won fonufan, me non ewe nenien ngun repwe angei An emmwen nupwen repwe efeiochu me anisi ekkoch Fan itan. Mwirin repwe mefi an tong, me kuna pwapwa non ar arap ngeni I.
Ngang emon chon pwarata usun Manausefanin ewe Samon usun ita ngang mi nom non ewe pwinin ren noun kewe ruomon chon kuno non ewe imw won aanen Emmaus. Ngang mi sinei pwe I mi manau usun chok Joseph Smith nupwen a kuna ewe Sam me ewe Nau non ewe saramen nesosor nein ekkoch ira non Palmyra.
Iei ewe Mwichefenin Jises Kraist. Non chok ekkewe pristut kii Preseten Thomas S. Monson a amwochu a nom ewe manaman an famini repwe ririfengen pwe sipwe manau feinfeino ren Samach won Nang me ewe Samon Jises Kraist. Sipwe uta me mwen ewe Chon Amanau non ewe Ranin Kapung sipwe nenefengen. Epwe fansoun pwapwa ren ekkewe ra mareno ngeni I non An angang non ei manau. Epwe minen apwapwa fansoun ar repwe rong ekkewe kapas: “Fokkun murino, en emon chon anagng mi murino.”19 Ua pwarata usun ewe Chon Amanau mi manau me ach Chon Angasano non iten Jises Kraist, amen.
© 2013 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/12. Kapungunon chiakun: 6/12. Chiakun Visiting Teaching Message, May 2013. Chuukese. 10665 901