Mbasirmba

Gyedzi na Ogya hɔn

Maggi Earl na ɔkyerewee

Ɔkyerɛwfo no tse Carolina Etsifi, USA.

Mowerɛ remmfir Winter Quarters, Nebraska, USA asaase do a menantsewee da, bea a edzikamfo no tsenae mfe pii a abɛsen no. Nna metse nkã dɛ asaase no yɛ krɔnkrɔn, tse dɛ meresera temple abowano bi.

Enyisuwa hyɛɛ m’enyiwa mu mã a, osiw m’adzehu. Muhun edwin bi a mbom mennhu no hwɛbea yie. Ber a mepepaa m’enyisuwa no, muhun banyin na ɔbaa bi a hɔn enyim abɔm awerɛhow mu. Me bɛn ho hwɛɛ no yie no, muhun abodomaba bi a ɔda owumaa mu wɔ hɔn ananadze.

Dza muhunii no dze nkã-tse horow hyɛɛ me mã: awerɛhow, ebufuw, enyisɔ, nye enyigye. Nna mepɛ dɛ meyi yaw a dɛm Ahotseweefo no tsee no, mbom nna ɔyɛ me enyisɔ so dɛ wɔbɔɔ afɔr maa asɛmpa no.

Mo sũahu wɔ Winter Quarters no boaa me ma muhun dɛ Ɔsor Egya dze asɛmpa no ma Ne mba, na Ɔma hɔn kwan ma wɔyɛ dza wɔpɛ. Nkyɛ abodomaba n’awofo no botum afa kwan a ɔyɛ mberɛw do. Woridzi nkɔnhyɛnyi ekyir na wɔdze asɛmpa no robɔ bra no, kehiaa dɛ edzikamfo yinom per kɔ kan, sɛ wobesia hɔn abodomabo mpo a. Mbom wɔsaan mu yii dɛ wɔdze asɛmpa no bɔbɔ hɔn bra, na wɔagye dza ɔbɛba hɔn do. Muhun dɛ Ahotseweefo no asɛmpa nokwar som nye hɔn pisi dɛ wɔbɛper akɔ kan no, gyedzi na enyidado na ogyaa hɔn—ndaamba enyidado a ɔhyerɛn na gyedzi dɛ Ewuradze nyim hɔn na Obotum abrɛ hɔn yaw adze.