President a Odzi Kan na n’Apamfo Amandzɛɛbɔ, Ayɛwoho 2013
Wiadzemba Hia Edzikamfo Ndɛ
Dodowara no, 1847 edzikamfo akwantu no annhyɛ ase emmfi Nauvoo, Kirtland, Far West anaa New York, mbom fii ekyirekyir, fii Ngyerisi, Scotland, Scandinavia, anaa Germany. Mbofra nketsenketse enntum anntse ase yie, gyedzi a okenyan hɔn awofo no ma wogyaa hɔn ebusua, anyɛnkofo, ahotɔ na bambɔ ekyir no.
Kumabaa bi tum bisa dɛ, “Mama, ebɛnadze ntsi na yerutu efi fie yi? Hemfa na yɛrekɔ?
“Bra ma yɛnkɔ, mo dɔfo: yɛrekɔ Zion, hɛn Nyankopɔn kuropɔn no.”
Nna Atlantic koroko n’esu a oeyir na wɔayɛ yerɛyerɛw no na ɔda hɔn fie ahobambɔ, nye anohoba Zion no ntamu. Woana botum akae suro a ɔkyekyer dɔm no hɔn akra, akwantu huhu ber mu no ho asɛm? Sunsum no a ɔwasa bɔkɔɔ no kenyaan hɔn, na gyedzi a osi pi no dzii hɔn abamba no, dɛm ahotseweefo edzikamfo no tweer Nyankopɔn, na wosii mu faa hɔn esudo akwantu no.
Nkyii wokodur Nauvoo na wɔsanee sii mu bio a wokehyia anamɔnkwan akwantu no mu nkõdzen no. Abo na ndua sin na wɔdze toow nda do, wɔ kwan no a ofi Nauvoo ara dze kodu Salt Lake Kuropɔn no. Iyi nye edzikamfo binom hɔn afɔrbɔdze. Woesie hɔn honandua no asomdwee mu, mbom hɔn edzin tse ase daapem.
Anantwi a wɔaberɛ soa adzesoa dudur, hwiir sesewee, akwabran yɛɛ edwuma dzen, wɔbɔɔ akõno akyen do, na mpataku sũi. Naaso edzikamfo a gyedzi-ekenyan hɔn na ehum-rohwe hɔn no, peree kɔr kan. Nna wɔtaa tow:
Hom mbra Esiarfo, mma hom nnsuro ɔhaw;
Hom mfa dɛw ntu hom kwan.
Sɛ akwantu n’ yɛ dzen ma hom dɛnara,
Adom bɛyɛ adzekyee. …
Ne nyina ye! Ne nyina ye!1
Edzikamfo yinom kae Ewuradze n’asɛm no: “Ɔsɛ dɛ wɔsɔ mo nkorɔfo hwɛ wɔ ndzɛmba nyina mu, ama woeesiesie hɔnho dze agye enyimnyam a mowɔ dze ma hɔn no, Zion enyimnyam no mpo.”2
Mber twa mu a, ɔmma yɛnkaakaa hɔn a wɔnantsew ɔyaw mu, gyaa owumaa a dzin biara nnyi ho a enyisuwa-yɛ n’ahyɛnsewdze no, na ɔtsew hɛn enyisɔ do ma woyinom. Mbom, ndɛ taferbanyinmbɔmu dodow so ɛ? Ana akwantu kwan wɔ hɔ a abo nnyi, akoko sorɔnsorɔm a yɛbofow nnyi, bɔnsa akɛse a yebotwa, anamɔn kwan a yɛbobue, ana esutsen a yebotwa nnyi? Anaa edzikamfo sunsum ho wɔ hia ndɛ a ɔbɛma hɛn akwankyerɛ efi esian a ɔreyɛ amen hɛn na woegya hɛn akɔ Zion ahobambɔ mu a?
Wiadze Ɔkõ Kɛse II mfedu mfedu ekyir no, wɔaberɛ ahosan su gyinapɛn no ase koraa koraa. Emumuyɛ repirim; enyidzi rohwe ase. Dodowara si esian adende kɛse do retserew a, wɔrohwehwɛ mprɛmprɛ enyikadze ber a wɔrohwer daapem enyigye. Dɛm ntsi asomdwee bɔ hɛn.
Hɛn werɛ efir mbrɛ Greekfo na Romanfo dzii wiadze a enyibuei nnyi do konyim enyimnyam mu, nna mbrɛ dɛm konyimdzi no baa ewiei—mbrɛ nkyii enyihaw na ahombrɛw dze hɔn kɔr ɔsɛɛ mu. Ewiei no, nna wɔrohwehwɛ ahotɔ akã bambɔ nye abrabɔ dwudwooho; na wɔhweer ne nyina—dwudwoo nye bambɔ na ahotɔ.
Mma nngyaa woho mma Abɔnsam ne ndaadaa; mbom gyina pintsinn ma nokwar. Ɔkra n’ahwehwɛdze a ɔmmee no no, nnyɛ enyikadze a wodua honam akɔndɔdze nkã-tse na bɔn do, dze nya. Bɔn nngya hɛn nnkɔ bra pa mu dabiarada. Ɔtan nngyina ɔdɔ ekyir dabiarada. Ehutsɛnyɛ mma akokodur dabiarada. Ekyingye nnkenyan gyedzi dabiarada.
Ɔyɛ binom dzen dɛ wobegyina atwetwesi na kasatsĩa a hɔn a wɔnnsɛ yɛ dze tsĩa ahosan, nokwardzi, nye Nyame Ne mbrasɛm ho setsie. Mbom wiadzemba ebu nkyerɛkyerɛ ndzi do ho enyimtsia daa. Wɔhyɛɛ Noah dɛ ɔmpaam hɛn no, dɔm a wonnyim hwee no hwɛɛ wimu a munumkum biara nnyi na nkyii wosii atwetwe na wɔserewee—kɛpeem dɛ nsu tɔree.
Ana otwar dɛ yɛwɔw do mbordo dze sũa adzesuãdze a ɔyɛ dzen ? Mber sesã, mbom nokwar tsim hɔ. Sɛ yekwetsir dɛ yebenya sũahu a abɛsen kɔ mu mfaso a, ɔyɛ mbusu ma hɛn dɛ yebesi no mu akomayaw, amandzehu, nye atsetsee nyina do bio. Ana yennyi nyansa dɛ yɛbɛyɛ setsei ama Onyia a onyim ahyɛse no fi ewiei no—hɛn Ewuradze a, Ɔhyehyɛɛ nkwagye nhyehyɛɛ no—kyɛn dɛ abowatsena no, nyia ɔpoow ne fɛw no?
Nkasfua nkyerɛase buukuu bi kyerɛ odzikamfo mu dɛ “obi a odzi kan kesiesie anaa obuei kwan ma binom dzi ekyir.”3 Ana yebotum ayeyer akokodur na yegyina pintsinn wɔ botae no a mfeda ebusuasantsen mu edzikamfo no nyae no a? Nokwar, ana emi na ɔwo, yebotum ayɛ edzikamfo?
Minyim dɛ yebotum ayɛ. O, mbrɛ wiadze hia edzikamfo ndɛ!
© 2013 odzi wɔ Intellectual Reserve, Inc. Wɔakora ho tumdzi nyina. Wotsintimii wɔ USA. Ngyirisi kasa ho mpendo: 6/13. Nkyereasee ho mpendo: 6/13. First Presidency Message, July 2013, ne Nkyerɛasee. Fante. 10667 502
Erekyerɛkyerɛ efi Amandzɛɛbɔ Yi Mu
Kyerɛwsɛm no kyerɛkyerɛ mu dɛ fie akyerɛkyerɛfo wɔdɛ “wɔbɔ kɔkɔ, wosansan nsɛm mu, wotu fo, wɔkyerɛkyerɛ hɔn, na wɔto nsa frɛ obiara dɛ ɔmbra Christ hɔ” (N & A 20:59). Susu dɛ ibɛkyerɛ kɔkɔbɔ na ɔfrɛ a ɔwɔ President Monson n’amandzɛɛbɔ no mu ma hɔn a ekɛsera hɔn no. Ibia ibɛpɛ dɛ enye hɔn pɛnsampɛnsam akwan a wobodua do ehu tseneenee fasusu a wobedzi do, na woekwetsir ndaadaa, na woesũa efi binom mfomdo ho. Bisa hɔn a ekyerɛkyerɛ hɔn no mbrɛ wobesi bɛyɛ edzikamfo ndɛ.
Mbofra enyi botum agye edzikamfo ho yie ber a wokenkan “On the Trail” ho nsɛm ntoado no wɔ krataafa 62 a ɔwɔ dawurbɔ krataa yi mu.