Lamharon
Gintulod sang Pagtuo
Ang tagsulat nagapuyo sa North Carolina, USA.
Indi ko gid malipatan ang paglibot-libot sa Winter Quarters, Nebraska, USA, sa diin ang mga pionero nagpuyo pila na katuig ang nagligad. Ang palibot daw kasagrado, nga halos pareho nga nagabisita ako sa gwa sang templo.
Naglumaw-lumaw ang akon mga mata sa bagay nga nagburon ang akon panan-awan. Nakakita ako sang isa ka estatwa apang indi ko maklaro kon ano ini. Sang ginpahid ko ang akon mga luha, nakita ko ang isa ka lalaki kag isa ka babayi nga ang mga nawong puno sang kasubo. Sang ginpalapitan ko, nakita ko ang porma sang isa ka lapsag nga yara sa isa ka lulubngan sa ila tiilan.
Ining talan-awon nagpuno sa akon sang tuman nga emosyon: kasubo, kaakig, kapasalamatan, kag kalipay. Luyag ko kontani kuhaon ang sakit nga ginbatyag sadtong mga Santos, apang nagapasalamat man ako sa ila ginsakripisyo para sa ebanghelyo.
Ang akon eksperiyensya sa Winter Quarters nagbulig sa akon nga marealisar nga ang Amay nga Langitnon nagahatag sang ebanghelyo sa Iya mga kabataan kag nagatugot sa ila nga magpili kon ano ang ila luyag nga himuon sa sini. Ang mga ginikanan sadtong lapsag sarang kontani nga magpili kon ano ang mas mahapos. Ang pagsunod sa propeta kag pagpangabuhi sang ebanghelyo nagkinahanglan sa sining mga pionero nga magsulong bisan nagakahulugan ini sa paglubong sang ila anak. Apang ginpili nila nga dalhon ang ebanghelyo sa ila kabuhi kag ginbaton ang ila mga hangkat. Natun-an ko nga ang kaukod sang mga Santos sa ebanghelyo kag ang ila determinasyon sa pagsulong gintulod sang pagtuo kag paglaum—paglaum para sa mas masanag nga palaabuton kag pagtuo nga ang Ginuo nakakilala sa ila kag makapaumpaw sang ila mga kasakit.