Mensahe sang Unang Panguluhan, Hulyo 2013
Ang Kalibutan Nagakinahanglan sang mga Pionero sa Karon
Para sa kadam-an, ang pagpanglakaton sang mga pionero sang tuig 1847 wala nagsugod sa Nauvoo, Kirtland, Far West, ukon New York kundi sa malayo nga England, Scotland, Scandinavia, ukon Germany. Indi lubos nga mahangpan sang magagmay nga kabataan ang dako nga pagtuo nga nagtulod sa ila mga ginikanan nga bayaan ang ila pamilya, mga abyan, katawhayan, kag seguridad.
Ang isa ka diutay nga bata ayhan nakapamangkot, “’Nay, ngaa mahalin kita sa balay? Diin kita makadto?”
“Dali na, pangga; makadto kita sa Sion, ang siyudad sang aton Dios.”
Nagapatunga sa kasulhay sang puluy-an kag sa promisa sang Sion amo ang mabalod kaayo kag delikado nga mga tubig sang dako nga Atlantiko. Sin-o ang makasugid sang kahadlok nga nagpuno sang tagipusuon sadtong mga pionero sa tion sadtong delikado nga mga pagtabok? Tungod napaisog sang mahinay nga mga hutik sang Espiritu, napursigi sing simple apang mabaskog nga pagtuo, yadtong mga pionero nga Santos nagsalig sa Dios kag naglayag sa pagbiyahe.
Sang ulihi nakalab-ot gid man sila sa Nauvoo pero naghalin naman agud magpangatubang sang mga kabudlayan sa pagpanglakaton. Mga tanda nga bato kag sanga sang kahoy-kahoy ang nagmarka sang mga lulubngan nga yara sa bug-os nila nga gin-agyan halin sa Nauvoo pakadto sa siyudad sang Salt Lake. Amo yadto ang sakripisyo sang pila ka mga pionero. Ang ila mga lawas ginlubong, apang ang ila mga ngalan nagapadayon sa gihapon.
Ang kapoy nga mga baka nagahinay-hinay, ang mga ruyda sang mga karwahe nagaigot, ang maisog nga mga kalalakihan nagahimud-os, ang mga tambor [drum] sang giyera nagatunog, kag ang mga lobo nagainuwang. Apang ang mga pionero nga napaisog sang ila pagtuo kag napilitan nga magsulong (tungod sang mabudlay nga mga sirkumstansya) nagpadayon sa ila pagpanglakaton. Masami sila nga nagakanta:
Kari, kari, kamo mga Santos;
Lakat sa kalipay.
Bisan ‘budlay ining panglakaton,
Grasya mangin aton. …
Ang tanan Matawhay!1
Ining mga pionero nakadumdom sang mga pulong sang Ginuo: “Ang akon mga katawhan kinahanglan nga matilawan sa tanan nga mga butang, agud sila mangin handa sa pagbaton sang himaya nga gintigana ko para sa ila, nga amo ang himaya sang Sion.”2
Ang paglipas sang panahon makapalipat sa aton kag makapabuhin sang aton kapasalamatan para sadtong mga nagpanglakaton sa banas sang kasakit, nga nagbilin sang alagyan nga namarkahan sang mga luha para sa wala’y ngalan nga mga lulubngan. Apang ano naman ang parte sa mga hangkat sa karon? Wala bala sing batuhon nga mga dalan nga laktan, wala sing mahawa nga mga bukid nga taklaron, wala sang mga gawang nga tabukon, wala sing bag-ong mga alagyan nga tukibon, wala sang mga suba nga ubugon? Ukon may yara bala sang matuod-tuod nga kakinahanglan sa karon para sinang espiritu sang pagka-pionero nga maggiya sa aton palayo sa mga peligro nga nagahana nga maglamon sa aton kag agud nga magtuytoy sa aton sa isa ka Sion sang kaluwasan?
Sa pila na ka dekada humalin sang pagtapos sang Ika-duhang Inaway Kalibutanon, ang mga sulundan sa moralidad wala untat nga naganubo. Ang krimen padayon nga nagataas; ang pagkadisente padayon nga naganubo. Madamo ang nagasakay sa higante nga roller coaster sang disgrasya, nga ginatinguhaan nga maagom ang makadali nga kasadyahan samtang ginasakripisyo ang mga kalipayan sang wala’y katapusan. Gani ginasakripisyo naton ang paghidaet.
Ginakalipatan naton kon paano ang mga Greko kag mga Romano nangin madinalag-on sa isa ka mabangis nga kalibutan kag kon paano inang kadalag-an natapos—kon paano ang kauyaya kag kahuyang sa ulihi naglamon sa ila padulong sa ila kalaglagan. Sa katapusan, labaw sangsa kahilwayan, luyag nila ang seguridad kag ang isa ka masulhay nga pangabuhi; kag nadula ini tanan sa ila—ang kasulhayan kag seguridad kag kahilwayan.
Indi magpadaug sa mga pagpangganyat ni Satanas; kundi, tindugan gid kag pangapinan ang kamatuoran. Ang wala matuman nga mga handum sang kalag indi masabat sang wala untat nga paglagas sang kalipay sa tunga sang lawasnon nga mga kasadyahan kag mga bisyo. Ang bisyo wala gid nagapadulong sa kaayuhan. Ang dumot wala gid nagasakdag sang paghigugma. Ang katalaw wala gid nagahatag sang kaisog. Ang pagduda wala gid nagainspirar sang pagtuo.
Ang iban nabudlayan mag-agwanta sang pangyaguta kag mga pang-insulto sang tonto nga mga tawo nga nagahikay sang pagkaputli [chastity], pagkatampad, kag pagkamatinumanon sa mga kasuguan sang Dios. Apang ang kalibutan wala gid man nagahatag importansya sa pagtuman sang mga prinsipyo. Sang si Noe ginsugo nga maghimo sang arko, ang tonto nga mga tawo nagtangla sa masanag nga kalangitan kag dayon nangyaguta kag nagkinadlaw—tubtob nga nagtupa ang ulan.
Dapat bala naton sulit-sulit nga mabatian ining mga leksyon sing tuman kamahal? Ang panahon nagabag-o, apang ang kamatuoran nagapadayon. Kon indi kita makatuon gikan sa mga eksperiyensia sang nagliligad, nasentensiyahan kita nga masulit ang mga ini upod sang tanan sini nga kasakit, pag-antos, kag kalisud. Wala bala kita sang kaalam nga tumanon Sia nga among nakahibalo sang ginsuguran halin sa katapusan—ang aton Ginuo, nga among nagdesinyo sang plano sang kaluwasan—sangsa sinang man-og, nga naghikay sang iya sini katahum?
Ang isa ka diksiyonaryo nagalaragway sang tinaga nga pionero bilang “isa nga nagapanguna agud ihanda ukon buksan ang alagyan para sundon sang iban.”3 Sarang bala naton tipunon ang kaisog kag kabakod sang katuyuan nga naglarawan sa mga pionero sang isa ka nagligad nga henerasyon? Sarang bala ikaw kag ako, sa pagkamatuod, nga mangin mga pionero?
Nakahibalo ako nga sarang kita mangin amo sini. O, daw ano kakinahanglan sang kalibutan sang mga pionero sa karon!
© 2013 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang First Presidency Message, July 2013. Hiligaynon. 10667 861
Pagtudlo gikan sa Sining Mensahe
Ang balaan nga mga kasulatan nagapaathag nga ang mga home teachers dapat “magpaandam, magpaathag, magpaisog, kag magtudlo, kag mag-agda sa tanan nga magkari kay Cristo” (D&C20:59). Binagbinaga ang pagtudlo sang mga paandam kag mga pangagda nga nalakip sa mensahe ni President Monson sa sinang inyo mga ginabisitahan. Mahimo ninyo hambalan upod sa ila ang mga paagi sa pagkilala kag pagsunod sang matarong nga mga halimbawa, paglikaw sa mga pagpanonto, kag pagtuon gikan sa mga sala sang iban. Pamangkuta inang inyo mga ginatudloan kon paano sila sarang mangin mga pionero sa karon.