Mensahe sa Visiting Teaching, Hulyo 2013

Pagtudlo kag Pagtuon sang Ebanghelyo

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita. Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi. Para sa dugang nga impormasyon, mag-logon sa reliefsociety.lds.org.

Pagtuo, Pamilya, Bulig

Si Jesucristo nangin isa ka punong manunudlo. Iya ginpakita ang ehemplo sa aton sang Sia “nagtudlo sa mga kababayin-an sa panong kag sing tinag-isa-isa, sa dalanon kag sa baybayon, sa bubon kag sa ila mga puluy-an. Iya ginpakita ang mahigugmaon nga kaluoy sa ila kag gin-ayo sila kag ang ila pamilya.”¹

Iya gintudloan sila ni Marta kag Maria kag “gin-agda sila nga mangin Iya mga disipulo kag mag-ambit sang kaluwasan, ‘inang maayong bahin’ [Lucas 10:42] nga indi makuha sa ila.”²

Sa aton balaan nga mga kasulatan sa ulihing mga adlaw, ang Ginuo nagsugo sa aton nga “magtudlo sa isa kag isa sang doktrina sang ginharian” (D&C 88:77). Parte sa pagtudlo kag pagtuon sang doktrina, si Cheryl A. Esplin, second counselor sa Primary general presidency, nagsiling, “Ang pagtuon agud mahangpan sing lubos ang mga doktrina sang ebanghelyo isa ka bug-os-kabuhi nga proseso kag nagaabot ‘dinalan sa dinalan, pagsulundan sa pagsulundan, diutay diri kag diutay didto’ (2 Nefi 28:30).”³

Sa aton pagtuon, pag-usisa kag pagpangamuyo, magatudlo kita upod sang gahum sang Balaan nga Espiritu, nga magadala sang aton mensahe “sa mga tagipusuon sang mga anak sang tawo” (2 Nefi 33:1).

Gikan sa Balaan nga mga Kasulatan

Alma 17:2–3; 31:5; Doctrine and Covenants 42:12–13; 84:85

Gikan sa Aton Kasaysayan

Ang aton nagliligad nga mga propeta nagpahanumdom sa aton bilang mga babayi nga may importante kita nga papel bilang mga manunudlo sa puluy-an kag Simbahan. Sang Septyembre 1979, si President Spencer W. Kimball (1895–1985) nagpangabay sa aton nga mangin “sister scriptorians.” Nagsiling sia: “Magmangin maalam sa balaan nga mga kasulatan—indi agud itamay ang iban, kundi agud itib-ong sila! Kay sa katapusan, sin-o bala ang may mas daku nga panginahanglan nga ‘hatagan-bili’ ang mga kamatuoran sang ebanghelyo (kon diin sarang sila magdangop sa tinion sang ila panginahanglan) sangsa ang mga kababayin-an kag mga iloy nga nagahimo sang tuman kadamo nga mga pagbatiti kag pagpanudlo?”⁴

Tanan kita mga manunudlo kag mga manugtuon. Kon magtudlo kita gikan sa balaan nga mga kasulatan kag sa pulong sang aton buhi nga mga propeta, sarang naton mabuligan ang iban nga magkari kay Cristo. Kon makigbahin kita sa proseso sang pagtuon paagi sa pagpamangkot sing makahulugan nga mga pamangkot kag dayon sa pagpamati, sarang naton masalapuan ang mga sabat nga magsolbar sang aton personal nga mga panginahanglan.

Ano ang Sarang Ko Mahimo?

Paano ako nagahanda nga mangin mas maayo nga manunudlo?
Ginapaambit ko bala ang akon testimonya sa mga sisters nga akon ginabantayan?

© 2013 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang Visiting Teaching Message, July 2013. Hiligaynon. 10667 861