Poraus seni ewe Aewin Presetensi, July 2013
Mi Namwot Chon Akkomw won Fonufan Ikenai
Fan iten chommong, an ekkewe chon akkomw sai non 1847 ese poputa non Nauvoo, Kirtland, Far West, are New York nge a poputa non England, Scotland, Scandinavia, are Germany. Kukkun semirit rese tongeni ennetin weweiti ewe nuku minne a pesepes ngeni semer me iner ne su seni famini, chiechi, tong, me kinamwe.
Meni emon kukkun semirit a eisini, “Inei, pwata sia su seni imwach? Ia sia feino ia?”
“Kopwe feito, nei kukkun; sipwe feino ngeni Saion, ewe teninimwen ach Kot.”
Ewe setin Atlantic mi nowatte a nom nefinen kinamwen ewe imw me ewe pwonen Saion. Io a tongeni aporausa usun ewe niuokus mi kuu netiper non ekkena fansoun sai mi osukosuk? Seni pwarata me ren ewe Ngun mi Fel, pochokununo seni nuku, ekkena Souneng mi chon akkomw ra epinukunuk non Kot me ra saino.
Iwe ra tori Nauvoo nge repwene pwan weri weires fan ar sai won ewe an. Peias mi esinesin ren pon ira me fau ra esisinnata unusen ewe an seni Nauvoo tori Salt Lake City. Ina niwinin ekkoch chon akkomw ra monatiw. Inisir ra peiaseno non kinamwe, nge iter mi soposopweno chok.
Kou mi pekus ra fefetan, ekkewe foun wakon ra akurang, mwan mi pwara ra angang, mi chopup tikin ekkewe tirapw, me konak ra wuuwu. Nge ekkewe chon akkomw ra sopweno non osukosuken fan nang fan ar nuku. Fan chommong ra kon:
Feito, Souneng, ousap niuokus;
Pwe sipwe pwapwa ren.
Ina mo ika weires chapur nom
Nge sipwe fokkun win. …
Sipwe pwapwa ren! Sipwe pwapwa ren!1
Ekkei chon akkomw ra chechemeni ekkewe kapasen ewe Samon nupwen a apasa pwe noun kewe aramas repwe weri sossotun mettoch meinisin, pwe repwe monneta ne angei ewe ning epwe ngenir, ina ewe ningen Saion.2
Fan taman fansoun a kisikisino ach chechemeni me a kukkununo ach kinisou fan iten ekkewe ir ra fetan won ewe anen metek, me a nom mwirir eu anen peias fiti chonun masen kechiw. Nge met usun ach weires ikenai? Ese wor anen weires, chuuk sipwe tota won, pwang sipwe feino ngeni epekin, an sipwe akkomw ne fetan won, chonupupu sipwe feiniu seni? Are mi ennetin wor namwoten ewe ngunun chon akkomw ne atouaua senikich ekkewe osukosuk repwe turufi kich me epwe emwenikich ngeni Saion mi kinamwe?
Non ekkewe ier seni nesoponon Maunen Fonufan II, nongonongen nimenimoch ra kisikisino fan chommong. Fofforungaw a watteno; fofforoch a muttir turuno. Chommong aramas ra fiti ekkewe urumoten tatakis, ra kutta apwapwan iei nge ra asoreno ekkewe pwapwan fansoun ese much. Iwe sia fangeno kinamwe.
Sia monuki ifa usun ekkewe chon Greek me Rome ra pworacho ngeni eu fonufan mi ngaweno me ifa usun ar winino a wesino—ifa usun ar chipwang me apwangapwang a pworacho ngenir tori ra turuno. Nesopononun, napengeni ar mochen ngaseno, ra mochen manauen kinamwe; me a pout senir—kinamwe me ngas.
Ousap fangeno ngeni an Setan kewe sossot; nge, oupwe uta pochokun fan iten ennet. Ekkewe mochenin ngun resap kinamweno me ren akkachocho ngeni pwapwa nein ekkewe sossotun fofforungaw. Fofforungaw ete emwen ngeni fofforoch. Oput ese feita ngeni tong. Mesekuta ese awora pwara. Tipemwaremwar ese efisata nuku.
Ekkoch ra mefi pwe a weires ne uta ngeni kapas mi ngaw seni aramas rese tipachem minne ra takiri nimenimoch, foffor ennet, me anneasochisi an Kot kewe annuk. Nge chon fonufan ra takiri anneasochisi nongonong fan chommong. Nupwen Noah a annuk ne fana efoch waimw, ekkewe aramas ra nenneta ngeni nang ese wor kuuchu me ra takiri—tori a pungutiw ran.
Sipwe kaeo ekkena sokkun nesen fan chommong? Mi siwin ewe fansoun, nge ennet mi chuen nonnom fochofoch. Nupwen sise angei niwinin porausen noom, sipwe ennetin forsefannir fiti ar netipechou, riaffou, me metek. Ese wor ach mirit ne anneasochisi I minne a sinei seni nepoputan tori nesoponon—ach Samon, minne a fori ewe kokkotun manau ese much—nap seni ewe serepenit, minne a oput ningochun?
Eu puken awewen kapas a awewe emon chon akkomw pwe “emon a feino akkomw ne ammonata are suki ewe an fan iten ekkoch repwe tapweno mwirin.”3 Sia tongeni kutta ewe pwara me pochokunen ach popun minne a nikinikin ekkewe chon akkomw seni nom? Kich, sia ennetin tongeni, winiti chon akkomw?
Ua sinei pwe sia tongeni. O, mi fakkun namwot chon akkomw won fonufan ikenai!
© 2013 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/12. Kapungunon chiakun: 6/12. Chiakun ewe First Presidency Message, July 2013. Chuukese. 10667 901
Afanafan seni Ei Poraus
Ekkewe pukfel ra awewe pwe sensen famini repwe pesei ngeni, awewe, me aiti, me tingorei meinisin ne feito ngeni Kraist (Nengeni D&C 20:59). Kopwe ekiekin esisinnata ekkewe kapasen pesepes me tingor seni an Preseten Monson we poraus ngeni ekkewe ir ka churi. Meni oupwe mochen poraus fengen ren ekkoch napanap ra tongeni esinna me tapweno ekkoch nenien appiru, touau seni chon otuputup, me kaeo seni an ekkoch aramas mwanino. Kopwe eisini ekkewe ir ka aiti ifa usun ra tongeni chon akkomw ikenai.